റിയാദ്: സൗദി അറേബ്യയില്‍ ഗതാഗത സുരക്ഷ ശക്തമാക്കുന്നതിന്റെ ഭാഗമായി നടത്തിയ സംയുക്ത ഫീല്‍ഡ് പരിശോധനയില്‍ നിയമലംഘനം നടത്തിയ 9,006 ബൈക്കുകള്‍ പിടിച്ചെടുത്തു. ഒക്ടോബര്‍ 25 മുതല്‍ 31 വരെയുള്ള കാലയളവിലാണ് രാജ്യത്തിന്റെ വിവിധ മേഖലകളില്‍ ട്രാഫിക് വിഭാഗം പരിശോധന നടത്തിയത്.

നിയമലംഘനങ്ങളില്‍ റിയാദ് പ്രവിശ്യയാണ് ഏറ്റവും മുന്നില്‍. 4,245 നിയമലംഘനങ്ങളാണ് റിയാദില്‍ റിപ്പോര്‍ട്ട് ചെയ്തത്. 2,444 ബൈക്കുകള്‍ പിടിച്ചെടുത്ത ജിദ്ദ ഗവര്‍ണറേറ്റ് പട്ടികയില്‍ രണ്ടാം സ്ഥാനത്താണ്. 812 ബൈക്കുകള്‍ പിടിച്ചെടുത്ത ജാസാന്‍ പ്രവിശ്യയാണ് മൂന്നാമത്.

മറ്റ് മേഖലകളിലെ കണക്കുകള്‍: കിഴക്കന്‍ പ്രവിശ്യ: 299, മക്ക: 266, അസീര്‍: 185, താഇഫ്: 160, ഖസീം: 146, നജ്‌റാന്‍: 125, മദീന: 122, തബൂക്ക്: 108, ഹാഇല്‍: 55, അല്‍-ജൗഫ്: 16, ഖുറയ്യത്ത്: 9, അല്‍-ബാഹ, നോര്‍ത്തേണ്‍ ബോര്‍ഡേഴ്‌സ്: 7 വീതം

രാജ്യത്തുടനീളം ഗതാഗത സുരക്ഷ വര്‍ദ്ധിപ്പിക്കുന്നതിനും ഗതാഗത നിയമങ്ങള്‍ ലംഘിച്ച് സര്‍വീസ് നടത്തുന്ന ഇരുചക്രവാഹനങ്ങളെ നിയന്ത്രിക്കുന്നതിനുമുള്ള ഫീല്‍ഡ് പരിശോധനകള്‍ വരും ദിവസങ്ങളിലും തുടരുമെന്ന് ട്രാഫിക് വിഭാഗം വ്യക്തമാക്കി.