ഹൈദരാബാദ്: ബംഗാള്‍ ഉള്‍ക്കടലില്‍ രൂപംകൊണ്ട 'മുരസു' ചുഴലിക്കാറ്റ് ശക്തിപ്രാപിച്ച് തീവ്ര ചുഴലിക്കാറ്റായി മാറിയതായി കേന്ദ്ര കാലാവസ്ഥാ വകുപ്പ് (ഐ.എം.ഡി). നവംബര്‍ മൂന്നിന് പുലര്‍ച്ചെ ആന്ധ്രപ്രദേശിലെ നെല്ലൂരിനും നരസാപുരത്തിനും ഇടയില്‍ ചുഴലിക്കാറ്റ് കരതൊടുമെന്നാണ് പ്രവചനം. മണിക്കൂറില്‍ 100 മുതല്‍ 110 കിലോമീറ്റര്‍ വരെ വേഗത്തില്‍ കാറ്റുവീശാനും ചില സമയങ്ങളില്‍ വേഗം 120 കിലോമീറ്റര്‍ വരെയാകാനും സാധ്യതയുണ്ട്.
ചുഴലിക്കാറ്റിന്റെ സ്വാധീനത്തില്‍ ദക്ഷിണേന്ത്യയുടെ വിവിധ ഭാഗങ്ങളില്‍ അടുത്ത ദിവസങ്ങളില്‍ ശക്തമായ മഴ ലഭിക്കുമെന്നാണ് മുന്നറിയിപ്പ്. ആന്ധ്രപ്രദേശ്, ഒഡിഷ, തമിഴ്‌നാട്, തെലങ്കാന, ആന്‍ഡമാന്‍ നിക്കോബാര്‍ ദ്വീപുകള്‍ എന്നിവിടങ്ങളിലാണ് ജാഗ്രത നിര്‍ദേശം. കേരളത്തിലും മഴ മുന്നറിയിപ്പുണ്ട്.
നവംബര്‍ രണ്ടിന് തീരദേശ ആന്ധ്രപ്രദേശിലും യാനത്തിലും ഒറ്റപ്പെട്ട അതിതീവ്ര മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. മൂന്നിന് ഒറ്റപ്പെട്ട അതിശക്തമായ മഴയും പ്രതീക്ഷിക്കുന്നു. പുതുച്ചേരി, കാരയ്ക്കല്‍ എന്നിവിടങ്ങളില്‍ രണ്ടും മൂന്നും തീയതികളില്‍ ശക്തമായ മഴ ലഭിച്ചേക്കും. കേരളത്തിലും മാഹിയിലും നവംബര്‍ നാല് വരെയും തീരദേശ കര്‍ണാടകയിലും വടക്കന്‍ ഉള്‍നാടന്‍ കര്‍ണാടകയിലും മൂന്നിനും ഒറ്റപ്പെട്ട ശക്തമായ മഴയ്ക്ക് സാധ്യതയുണ്ട്.
ചുഴലിക്കാറ്റിന്റെ പശ്ചാത്തലത്തില്‍ ഒഡിഷയിലും ജാഗ്രത ശക്തമാക്കി. നവംബര്‍ രണ്ടുമുതല്‍ സംസ്ഥാനത്ത് മഴ ആരംഭിക്കുമെന്നും മൂന്നിന് മഴയുടെ തീവ്രത വര്‍ധിച്ച് നാലുവരെ തുടരുമെന്നും ഭുവനേശ്വര്‍ കാലാവസ്ഥാ കേന്ദ്രം ഡയറക്ടര്‍ മനോരമ മൊഹന്തി അറിയിച്ചു. തെക്കന്‍ ഒഡിഷയിലെ ജില്ലകള്‍ക്ക് പ്രത്യേക ജാഗ്രതാ നിര്‍ദേശം നല്‍കിയിട്ടുണ്ട്. കഴിഞ്ഞ ചുഴലിക്കാറ്റില്‍ കനത്ത നാശനഷ്ടമുണ്ടായ ഗഞ്ചാം ജില്ലയും ജാഗ്രതയിലാണ്.
ഇന്ത്യയാണ് ചുഴലിക്കാറ്റിന് 'മുരസു' എന്ന പേര് നല്‍കിയത്. യുദ്ധമുറസ് അഥവാ യുദ്ധത്തിന് വിളിച്ചറിയിക്കുന്ന ചെണ്ട എന്ന അര്‍ഥമാണ് പേരിനുള്ളത്. ഒക്ടോബര്‍ 28ന് ആന്ധ്ര തീരത്ത് കരതൊട്ട 'അര്‍ണബ്' ചുഴലിക്കാറ്റിന് പിന്നാലെ ഒരാഴ്ചയ്ക്കുള്ളിലാണ് പുതിയ ചുഴലിക്കാറ്റ് രൂപംകൊണ്ടത്.