വാഷിംഗ്ടണ്‍: റഷ്യന്‍ മിസൈല്‍ ആക്രമണങ്ങളെ പ്രതിരോധിക്കാന്‍ യുക്രെയിന് 500 പേട്രിയറ്റ് മിസൈലുകള്‍ ലഭ്യമാക്കുന്നതിന് അമേരിക്കന്‍ വിദേശകാര്യ മന്ത്രാലയം അംഗീകാരം നല്‍കി. ബാലിസ്റ്റിക് മിസൈലുകളെ ഫലപ്രദമായി ചെറുക്കാന്‍ ശേഷിയുള്ള ഈ മിസൈല്‍ കരാറിനായി അമേരിക്കയുടെ 'ജമ്പ്സ്റ്റാര്‍ട്ട്' പദ്ധതി വഴി കാനഡ, ജര്‍മ്മനി, നോര്‍വേ എന്നീ രാജ്യങ്ങളും, യൂറോപ്യന്‍ യൂണിയന്റെ 'യുക്രെയിന്‍ സപ്പോര്‍ട്ട് ലോണ്‍' വഴിയുമാണ് ഫണ്ട് സമാഹരിക്കുന്നത്.

അമേരിക്കന്‍ പ്രതിരോധ ആസ്ഥാനമായ പെന്റഗണിന്റെ 'ജമ്പ്സ്റ്റാര്‍ട്ട്' പ്രോഗ്രാം വഴി സഖ്യരാജ്യങ്ങളുടെ സാമ്പത്തിക സഹായത്തോടെയാണ് യുക്രെയിന് ആവശ്യമായ ആയുധങ്ങളും പരിശീലനങ്ങളും ലഭ്യമാക്കുന്നത്. മുന്‍പ് ഓഗസ്റ്റില്‍ ഈ പദ്ധതിയിലൂടെ 825 മില്യണ്‍ ഡോളര്‍ ചെലവഴിച്ച് 3,350 എയര്‍-ലോഞ്ച്ഡ് ക്രൂയിസ് മിസൈലുകള്‍ വാങ്ങിയിരുന്നു. ലോക്ക്ഹീഡ് മാര്‍ട്ടിന്‍ കമ്പനിക്കാണ് ഈ വന്‍ മിസൈല്‍ കരാറിന്റെ പ്രധാന നിര്‍മ്മാണച്ചുമതല.

ജൂലൈയില്‍ ലഭിച്ച 58.6 ശതകോടി ഡോളറിന്റെ കരാറിന്റെ അടിസ്ഥാനത്തില്‍, 2030-ഓടെ പേട്രിയറ്റ് മിസൈലുകളുടെ ഉല്‍പ്പാദന ശേഷി മൂന്നിരട്ടിയാക്കുമെന്നും അര്‍ക്കന്‍സാസിലെ പ്ലാന്റിലെ തൊഴിലവസരങ്ങള്‍ 50 ശതമാനം വര്‍ദ്ധിപ്പിക്കുമെന്നും കമ്പനി അറിയിച്ചിരുന്നു. പ്രതിവര്‍ഷം 2,000 പേട്രിയറ്റ് മിസൈലുകള്‍ നിര്‍മ്മിക്കുകയാണ് കമ്പനിയുടെ ലക്ഷ്യം.

അതേസമയം, യുക്രെയിന്‍ ഉള്‍പ്പെടെയുള്ള സഖ്യരാജ്യങ്ങള്‍ക്ക് വന്‍തോതില്‍ ആയുധങ്ങള്‍ നല്‍കുന്നതും സ്വന്തം സൈനിക ആവശ്യങ്ങളും അമേരിക്കയുടെ വ്യോമപ്രതിരോധ, കൃത്യതയാര്‍ന്ന മിസൈല്‍ ശേഖരത്തില്‍ കുറവുണ്ടാക്കുന്നു എന്ന ആശങ്കയും ശക്തമാകുന്നുണ്ട്.