ന്യൂഡല്‍ഹി: രാജ്യത്തെ ജനസംഖ്യാ സെന്‍സസ് 2027 ജനുവരി 25 മുതല്‍ ഫെബ്രുവരി 28 വരെ നടത്തും. കേന്ദ്ര ആഭ്യന്തര മന്ത്രാലയം പുറത്തിറക്കിയ വിജ്ഞാപനത്തിലാണ് തീയതികള്‍ പ്രഖ്യാപിച്ചത്. കണക്കെടുപ്പിന് മുന്നോടിയായി ജനുവരി 10 മുതല്‍ 24 വരെ പൊതുജനങ്ങള്‍ക്ക് സ്വയം വിവരങ്ങള്‍ നല്‍കാനുള്ള സൗകര്യമുണ്ടാകും. മാര്‍ച്ച് ഒന്നു മുതല്‍ അഞ്ചുവരെ പുനഃപരിശോധനാ ഘട്ടവും നടത്തും.
മണിപ്പൂര്‍, ഗോവ, ഉത്തര്‍പ്രദേശ്, പഞ്ചാബ്, ഉത്തരാഖണ്ഡ്, ലഡാക്ക് എന്നിവിടങ്ങളില്‍ സെന്‍സസ് നടപടികള്‍ സംബന്ധിച്ച് പ്രത്യേക തീരുമാനമുണ്ടാകുന്നതുവരെ കണക്കെടുപ്പ് മാറ്റിവെച്ചിട്ടുണ്ട്. ഹിമാചല്‍ പ്രദേശിലെയും ജമ്മു കശ്മീരിലെയും മഞ്ഞുവീഴ്ചയുള്ളതും മറ്റു പ്രദേശങ്ങളുമായി ഒരേസമയം കണക്കെടുപ്പ് നടത്താന്‍ കഴിയാത്തതുമായ മേഖലകളിലും ഇതേ ക്രമീകരണമാണ്.
അടുത്ത വര്‍ഷം ആദ്യം ഗോവ, ഉത്തര്‍പ്രദേശ്, പഞ്ചാബ്, ഉത്തരാഖണ്ഡ്, മണിപ്പൂര്‍ എന്നീ സംസ്ഥാനങ്ങളില്‍ നിയമസഭാ തിരഞ്ഞെടുപ്പ് നടക്കാനിരിക്കെയാണ് അവിടങ്ങളില്‍ സെന്‍സസ് മാറ്റിവെച്ചിരിക്കുന്നത്.
രണ്ട് ഘട്ടങ്ങളിലായാണ് സെന്‍സസ് നടത്തുക. ആദ്യഘട്ടത്തില്‍ വീടുകളുടെയും പാര്‍പ്പിടങ്ങളുടെയും പട്ടിക തയ്യാറാക്കും. രണ്ടാം ഘട്ടത്തിലാണ് ജനസംഖ്യാ കണക്കെടുപ്പ്. രാജ്യത്തെ എട്ടാമത്തെ സെന്‍സസാണിത്. 2021ല്‍ നടത്തേണ്ടിയിരുന്ന കണക്കെടുപ്പ് കോവിഡ് മഹാമാരിയെ തുടര്‍ന്നാണ് മാറ്റിവെച്ചത്.
സെന്‍സസ് നടത്തിപ്പിനായി 11,718 കോടി രൂപയുടെ പദ്ധതിക്ക് കേന്ദ്ര മന്ത്രിസഭ അംഗീകാരം നല്‍കിയിട്ടുണ്ട്. രാജ്യത്തെ ഏറ്റവും വലിയ ജനസംഖ്യാ കണക്കെടുപ്പായിരിക്കും ഇത്.
2011ലാണ് ഇന്ത്യയില്‍ അവസാനമായി സെന്‍സസ് നടന്നത്. അന്ന് രാജ്യത്തെ ജനസംഖ്യ 121 കോടിയായിരുന്നു. ഇതില്‍ 62.32 കോടി പുരുഷന്മാരും 58.75 കോടി സ്ത്രീകളുമായിരുന്നു. ആകെ 24.95 കോടി കുടുംബങ്ങളാണ് അന്ന് കണക്കാക്കിയത്.