റിയാദ്: നാട്ടിലേക്ക് മടങ്ങാനുള്ള ഒരുക്കങ്ങളെല്ലാം പൂര്‍ത്തിയാക്കി വിമാനത്താവളത്തിലേക്ക് പുറപ്പെടാന്‍ ഒരുങ്ങുന്നതിനിടെ ആരോഗ്യനില വഷളായതിനെ തുടര്‍ന്ന് ആശുപത്രിയില്‍ പ്രവേശിപ്പിക്കപ്പെട്ടശേഷം മരണമടഞ്ഞ തിരുവനന്തപുരം വെമ്പായം വെട്ടനാട് സ്വദേശി രാജേഷിന്റെ (58) മൃതദേഹം നാട്ടിലെത്തിച്ച് സംസ്‌കരിച്ചു. ദീര്‍ഘകാലത്തെ ചികിത്സയ്ക്കും നാട്ടിലേക്കുള്ള മടക്കയാത്രയ്ക്കായുള്ള കാത്തിരിപ്പിനുമൊടുവില്‍ ഒക്ടോബര്‍ നാലിനായിരുന്നു മരണം.
ദിവസങ്ങളോളമായി അല്‍ഖര്‍ജിലെ കിങ് ഖാലിദ് ആശുപത്രിയില്‍ ചികിത്സയിലായിരുന്നു രാജേഷ്. നാട്ടിലേക്ക് മടങ്ങാന്‍ തീരുമാനിച്ചതോടെ കേളി കലാസാംസ്‌കാരിക വേദി കേന്ദ്ര ജീവകാരുണ്യ വിഭാഗം ആവശ്യമായ നടപടികള്‍ ആരംഭിച്ചു. ടിക്കറ്റ്, വീല്‍ചെയര്‍, വിമാനയാത്രയ്ക്കുള്ള അനുമതി എന്നിവയുള്‍പ്പെടെയുള്ള ക്രമീകരണങ്ങള്‍ പൂര്‍ത്തിയാക്കി വിമാനത്താവളത്തിലേക്ക് പോകാന്‍ ഒരുങ്ങുന്നതിനിടെയാണ് രക്തസമ്മര്‍ദം താഴുകയും ഓക്‌സിജന്റെ അളവ് കുറയുകയും ചെയ്തത്. തുടര്‍ന്ന് വീണ്ടും ആശുപത്രിയില്‍ പ്രവേശിപ്പിച്ചു.
ആരോഗ്യനില മെച്ചപ്പെട്ട് നാട്ടിലേക്ക് മടങ്ങാനാകുമെന്ന പ്രതീക്ഷയില്‍ യാത്രയ്ക്കുള്ള തുടര്‍നടപടികള്‍ നടന്നുവരുന്നതിനിടെയാണ് മരണം സംഭവിച്ചത്. പ്രവാസജീവിതത്തിന്റെ അവസാന നാളുകളില്‍ നാട്ടിലെത്തി കുടുംബത്തോടൊപ്പം കഴിയണമെന്ന ആഗ്രഹം സഫലമാകാതെ പോയത് ബന്ധുക്കള്‍ക്കും സുഹൃത്തുക്കള്‍ക്കും തീരാനൊമ്പരമായി.
മരണശേഷം മൃതദേഹം നാട്ടിലെത്തിക്കുന്നതിനുള്ള മുഴുവന്‍ നടപടികളും കേളി കേന്ദ്ര ജീവകാരുണ്യ വിഭാഗം ഏറ്റെടുത്തു. ഇന്ത്യന്‍ എംബസിയുടെ വെല്‍ഫെയര്‍ ഫണ്ടില്‍നിന്ന് ആവശ്യമായ സഹായം ലഭ്യമാക്കുകയും ചെയ്തു. ചില സാങ്കേതിക കാരണങ്ങളാല്‍ മൃതദേഹം നാട്ടിലെത്തിക്കുന്നതില്‍ പ്രതിസന്ധികള്‍ നേരിട്ടെങ്കിലും, ഒടുവില്‍ ഒക്ടോബര്‍ 29-ന് ദമാം വിമാനത്താവളത്തില്‍നിന്ന് ബഹ്‌റൈന്‍ വഴി തിരുവനന്തപുരത്ത് എത്തിച്ചു. ഒക്ടോബര്‍ 30-ന് മൃതദേഹം സംസ്‌കരിച്ചു.
32 വര്‍ഷമായി അല്‍ഖര്‍ജിലെ സഹന പ്രദേശത്ത് വര്‍ക്ക്ഷോപ്പില്‍ മെക്കാനിക്കായി ജോലി ചെയ്തുവരികയായിരുന്നു രാജേഷ്. പരേതനായ സുകുമാരപിള്ളയുടെയും ഓമനയമ്മയുടെയും മകനാണ്. ഭാര്യ: സരിതകുമാരി. മക്കള്‍: ശ്രീരാഗ്, ശ്രീനാഥ് (ഇരുവരും വിദ്യാര്‍ഥികളാണ്). ഏക സഹോദരന്‍: സുരേഷ് കുമാര്‍.
Related News
