വിശാഖപട്ടണം: ആന്ധ്രപ്രദേശിലെ വിശാഖപട്ടണത്തുള്ള ഹിന്ദുസ്ഥാന്‍ പെട്രോളിയം കോര്‍പറേഷന്‍ ലിമിറ്റഡിന്റെ (എച്ച്.പി.സി.എല്‍) റിഫൈനറിയില്‍ തിങ്കളാഴ്ച രാത്രി വന്‍ തീപിടിത്തം. മല്‍ക്കാപുരത്തെ റിഫൈനറിയിലെ സള്‍ഫര്‍ പിച്ച് ടാങ്കിലാണ് രാത്രി 10.15ഓടെ തീ പടര്‍ന്നത്. സംഭവത്തില്‍ ആളപായമോ പരിക്കുകളോ റിപ്പോര്‍ട്ട് ചെയ്തിട്ടില്ല. തീ നിയന്ത്രണവിധേയമാക്കിയെങ്കിലും പുക ഉയരുന്നത് തുടര്‍ന്നത് ആശങ്കയുണ്ടാക്കി.
റിഫൈനറിയിലെ റെസിഡ്യൂ അപ്ഗ്രഡേഷന്‍ ഫെസിലിറ്റിയുടെ (ആര്‍.യു.എഫ്) ഭാഗമായ സള്‍ഫര്‍ പിച്ച് ടാങ്കിലാണ് തീപിടിത്തമുണ്ടായതെന്ന് മല്‍ക്കാപുരം പൊലീസ് ഇന്‍സ്‌പെക്ടര്‍ പ്രകാശ് റാവു പറഞ്ഞു. തീ പടരുന്നതിന് തൊട്ടുമുമ്പ് സ്‌ഫോടനശബ്ദം കേട്ടതായി ജീവനക്കാര്‍ അറിയിച്ചതായും അദ്ദേഹം വ്യക്തമാക്കി. പ്രദേശവാസികളും സ്‌ഫോടനശബ്ദം കേട്ടതായി പറഞ്ഞെങ്കിലും സ്‌ഫോടനം നടന്നതായി പൊലീസ് സ്ഥിരീകരിച്ചിട്ടില്ല.
മുകളിലൂടെയുള്ള വൈദ്യുത ലൈനില്‍നിന്നുണ്ടായ പ്രശ്‌നമാകാം തീപിടിത്തത്തിന് കാരണമെന്നാണ് സംശയം. തീ പടര്‍ന്നതോടെ റിഫൈനറിയിലെ ജീവനക്കാരെ മുന്‍കരുതലായി സുരക്ഷിത സ്ഥാനങ്ങളിലേക്ക് മാറ്റി. അപകടമുണ്ടായ ഭാഗത്തെ വൈദ്യുതി ബന്ധവും വിച്ഛേദിച്ചു.
എച്ച്.പി.സി.എല്ലിന്റെ അഞ്ച് അഗ്‌നിരക്ഷാ വാഹനങ്ങള്‍ സ്ഥലത്തെത്തി തീയണയ്ക്കല്‍ പ്രവര്‍ത്തനങ്ങള്‍ നടത്തി. തീ നിയന്ത്രണവിധേയമാക്കിയെങ്കിലും രണ്ട് ഭാഗങ്ങളില്‍ തീ കത്തിക്കൊണ്ടിരുന്നതായും അത് അണയ്ക്കാന്‍ ഫോമുപയോഗിച്ചതായും മേഖലാ ഫയര്‍ ഓഫീസര്‍ നിരഞ്ജന്‍ റെഡ്ഡി അറിയിച്ചു. നാശനഷ്ടങ്ങളുടെ വ്യാപ്തി ഇതുവരെ കണക്കാക്കിയിട്ടില്ല.
നഗരത്തിലെ മറ്റ് അഗ്‌നിരക്ഷാ നിലയങ്ങളെയും വിവരം അറിയിച്ചിരുന്നെങ്കിലും റിഫൈനറിയുടെ ആഭ്യന്തര അഗ്‌നിരക്ഷാസംഘത്തിന് തന്നെ തീ നിയന്ത്രിക്കാനായതിനാല്‍ പുറത്തുനിന്നുള്ള സംഘങ്ങളുടെ സഹായം ആവശ്യമായി വന്നില്ലെന്ന് പൊലീസ് അറിയിച്ചു. ഒരു മണിക്കൂറിനുള്ളില്‍ തീ നിയന്ത്രണവിധേയമാക്കിയെന്നും ജീവനക്കാരോ സമീപവാസികളോ പരിഭ്രാന്തരാകേണ്ട സാഹചര്യമില്ലെന്നും അധികൃതര്‍ വ്യക്തമാക്കി.
തീപിടിത്തത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചതോടെ സമീപപ്രദേശങ്ങളില്‍ പരിഭ്രാന്തിയുണ്ടായി. കറുത്ത പുക ഉയരുന്നത് കണ്ട് പ്രദേശവാസികള്‍ വീടുകളില്‍നിന്ന് പുറത്തേക്കിറങ്ങി.
Related News
