റിയാദ്: കിംഗ് ഖാലിദ് അന്താരാഷ്ട്ര വിമാനത്താവളത്തില്‍ ഒക്ടോബര്‍ 10-നുണ്ടായ ഹൂതി ആക്രമണത്തില്‍ ഗുരുതരമായി പരിക്കേറ്റ് ചികിത്സയിലിരിക്കെ മരണമടഞ്ഞ ഇന്ത്യക്കാരന്റെ മൃതദേഹം റിയാദില്‍ ഖബറടക്കും. തെലങ്കാനയിലെ കാമറെഡ്ഡി ജില്ല സ്വദേശി ഷെയ്ഖ് സയ്യിദ് (39) ആണ് മരിച്ചത്. റിയാദിലെ നാഷണല്‍ ഗാര്‍ഡ് ആശുപത്രിയിലായിരുന്നു അന്ത്യം.
വിമാനത്താവളത്തിലെ മൂന്നാം ടെര്‍മിനലിലുള്ള സ്റ്റാര്‍ബക്‌സില്‍ ജീവനക്കാരനായിരുന്നു സയ്യിദ്. ആക്രമണത്തില്‍ ശരീരത്തില്‍ അറുപത് ശതമാനത്തോളം പൊള്ളലേറ്റ ഇദ്ദേഹം തീവ്രപരിചരണ വിഭാഗത്തില്‍ കഴിയുകയായിരുന്നുവെന്ന് ബന്ധുക്കള്‍ അറിയിച്ചു. സഹോദരങ്ങളായ അബ്ദുല്‍ ഹമീദും അബ്ദുല്‍ റഹ്‌മാനും ആശുപത്രിയില്‍ കൂട്ടിനുണ്ടായിരുന്നു.
പരേതനായ ഷെയ്ഖ് അഹമ്മദിന്റെയും ഷമീമിന്റെയും മകനാണ്. ഭാര്യ: നിഷാത്. മക്കള്‍: അല്‍വിയ (10), സാറ (6), സയാന്‍ (16 മാസം). ഖബറടക്കവുമായി ബന്ധപ്പെട്ട തുടര്‍നടപടികള്‍ പൂര്‍ത്തിയാക്കുന്നതിന് ബന്ധുക്കള്‍ക്കും സുഹൃത്തുക്കള്‍ക്കുമൊപ്പം സഹായവുമായി റിയാദിലെ ഇന്ത്യന്‍ എംബസിയും ഒപ്പമുണ്ട്.
Related News
