വാഷിംഗ്ടണ്‍- യു.എസ് ഇടക്കാല തിരഞ്ഞെടുപ്പില്‍ ഡെമോക്രാറ്റിക് പാര്‍ട്ടി നേടിയ തകര്‍പ്പന്‍ വിജയത്തിന് പിന്നാലെ, യു.എസ് ജനപ്രതിനിധി സഭയുടെ അടുത്ത സ്പീക്കറായി ഹക്കീം ജെഫ്രീസ് ചുമതലയേല്‍ക്കാനൊരുങ്ങുന്നു. ഈ പദവിയിലെത്തുന്ന ആദ്യ കറുത്തവര്‍ഗ്ഗക്കാരന്‍ എന്ന ചരിത്ര നേട്ടത്തിനരികിലാണ് 56-കാരനായ ജെഫ്രീസ്.
നാല് വര്‍ഷത്തെ റിപ്പബ്ലിക്കന്‍ ഭരണത്തിന് ശേഷം ജനുവരി ആദ്യവാരം പുതിയ കോണ്‍ഗ്രസ് സമ്മേളിക്കുമ്പോള്‍ ഡെമോക്രാറ്റുകള്‍ സഭയുടെ നിയന്ത്രണം ഏറ്റെടുക്കും. വൈസ് പ്രസിഡന്റ് ജെ.ഡി വാന്‍സ് കഴിഞ്ഞാല്‍ അമേരിക്കന്‍ ഭരണസിരാകേന്ദ്രത്തില്‍ പ്രസിഡന്റ് പദവിയിലേക്ക് രണ്ടാമത് എത്തുന്ന പ്രമുഖ പദവിയാണ് ഹൗസ് സ്പീക്കറുടേത്.
തിരഞ്ഞെടുപ്പ് വിജയത്തിന് ശേഷം മാധ്യമങ്ങളെ അഭിസംബോധന ചെയ്ത ജെഫ്രീസ്, 'ഇന്ന് അമേരിക്കയുടെ മഹത്തായ തിരിച്ചുവരവിന്റെ തുടക്കമാണ്' എന്ന് പ്രഖ്യാപിച്ചു. ട്രംപ് ഭരണകൂടത്തിന് കീഴില്‍ നടന്ന തീവ്ര നിലപാടുകള്‍ക്കും അഴിമതിക്കുമെതിരെ ജനങ്ങള്‍ നല്‍കിയ ശക്തമായ മറുപടിയാണ് ഈ ജനവിധിയെന്നും അദ്ദേഹം കൂട്ടിച്ചേര്‍ത്തു.
മെഡിക്കെയ്ഡ് ആരോഗ്യ പരിരക്ഷാ പദ്ധതിയില്‍ കഴിഞ്ഞ വര്‍ഷം വരുത്തിയ വെട്ടിക്കുറവുകള്‍ റദ്ദാക്കുക, ജനങ്ങളുടെ ജീവിതച്ചെലവ് കുറയ്ക്കുക എന്നിവയ്ക്കാണ് ഡെമോക്രാറ്റിക് ഭൂരിപക്ഷം മുന്‍ഗണന നല്‍കുക. ട്രംപ് ഭരണകൂടത്തിന് സാമ്പത്തിക പിന്തുണ നല്‍കിയ വന്‍കിട കോര്‍പ്പറേറ്റ് എക്‌സിക്യൂട്ടീവുകളുമായുള്ള ബന്ധങ്ങളെക്കുറിച്ച് അന്വേഷണം നടത്തുമെന്ന് ജെഫ്രീസ് വ്യക്തമാക്കിയെങ്കിലും, പ്രസിഡന്റിനെ ഇംപീച്ച് ചെയ്യുന്ന കാര്യത്തില്‍ തല്‍ക്കാലം ഉറപ്പൊന്നും നല്‍കിയിട്ടില്ല. ഹൗസ് ഓവര്‍സൈറ്റ് കമ്മിറ്റിയുടെ അടുത്ത അധ്യക്ഷനാകാന്‍ സാധ്യതയുള്ള റോബര്‍ട്ട് ഗാര്‍ഷ്യ, ട്രംപ് ഭരണകൂടത്തിലെ പ്രമുഖരോടായി 'വക്കീലിനെ ഒരുക്കി നിര്‍ത്തിക്കോളൂ' എന്ന് പ്രതികരിച്ചു.
സ്പീക്കര്‍ സ്ഥാനത്തേക്ക് ഡെമോക്രാറ്റിക് പാര്‍ട്ടിയില്‍ ജെഫ്രീസിന് വലിയ എതിര്‍പ്പുകളില്ലെങ്കിലും, പാര്‍ട്ടിക്കുള്ളിലെ തീവ്ര പുരോഗമനവാദികളെ ഒപ്പം നിര്‍ത്തി മുന്നോട്ട് പോവുക എന്നത് വലിയ വെല്ലുവിളിയാണ്. ഡാരിയലിസ ആവില ഷെവലിയെയെ പോലുള്ള പുതിയ പുരോഗമന സ്ഥാനാര്‍ത്ഥികള്‍ ജെഫ്രീസിന് വോട്ട് ചെയ്യുന്ന കാര്യത്തില്‍ ഇതുവരെ പരസ്യമായ ഉറപ്പ് നല്‍കിയിട്ടില്ല. വോട്ടിങ് അവകാശ പരിഷ്‌കരണം, സാര്‍വത്രിക ആരോഗ്യ ഇന്‍ഷുറന്‍സ്, പബ്ലിക് ഹൗസിങ് നിക്ഷേപം, ഇസ്രായേലിനുള്ള ആയുധ വിതരണം തടയല്‍ തുടങ്ങിയ ഉപാധികളാണ് ഇവര്‍ മുന്നോട്ടുവെക്കുന്നത്.
എന്നാല്‍, ഇസ്രായേല്‍ അനുകൂല ഗ്രൂപ്പുകള്‍ ജെഫ്രീസിന്റെ തിരഞ്ഞെടുപ്പ് പ്രചാരണത്തിന് നല്‍കിയ വലിയ സാമ്പത്തിക സഹായവും, സാര്‍വത്രിക ആരോഗ്യ ഇന്‍ഷുറന്‍സിനോട് അദ്ദേഹം പുലര്‍ത്തുന്ന മിതമായ നിലപാടുകളും പാര്‍ട്ടിക്കുള്ളിലെ മിതവാദികളും പുരോഗമനവാദികളും തമ്മിലുള്ള ഭിന്നത രൂക്ഷമാക്കിയേക്കാം.
സാമ്പത്തിക പ്രതിസന്ധിയും നിയമനിര്‍മ്മാണ വെല്ലുവിളികളും
നാന്‍സി പെലോസിയുടെ കര്‍ശന ഭരണരീതിയില്‍ നിന്ന് വ്യത്യസ്തമായി, എല്ലാവരെയും കൂട്ടിയിണക്കി കൊണ്ടുപോകുന്ന നേതാവായാണ് ന്യൂയോര്‍ക്കില്‍ നിന്നുള്ള പ്രതിനിധിയായ ജെഫ്രീസ് അറിയപ്പെടുന്നത്.
കുട്ടികള്‍ക്കുള്ള നികുതി ഇളവുകള്‍, ഭവന വായ്പ സഹായങ്ങള്‍, ഇന്ധന-ആരോഗ്യ സബ്സിഡികള്‍ എന്നിവ പുനഃസ്ഥാപിക്കുന്നതിനുള്ള ബില്ലുകളാകും ആദ്യ ഘട്ടത്തില്‍ അവതരിപ്പിക്കുക. ഗവണ്‍മെന്റ് പ്രവര്‍ത്തനങ്ങള്‍ സ്തംഭിക്കാതിരിക്കാനും കടമെടുപ്പ് പരിധി ഉയര്‍ത്താനും റിപ്പബ്ലിക്കന്‍മാരുടെ പിന്തുണ ജെഫ്രീസിന് അത്യാവശ്യമാണ്. ഇറാന്‍ യുദ്ധത്തിന് വിരാമമിടാനുള്ള രാഷ്ട്രീയ സമ്മര്‍ദ്ദം ശക്തമാക്കുമെന്നും അദ്ദേഹം സൂചിപ്പിച്ചു.
ട്രംപ് ഭരണകൂടത്തിനെതിരെ നിരന്തരം ഇംപീച്ച്മെന്റ് നടപടികള്‍ക്ക് മുതിരാതെ, സാധാരണക്കാരന്റെ സാമ്പത്തിക ബുദ്ധിമുട്ടുകള്‍ക്ക് പരിഹാരം കാണുന്ന നിലപാടാണ് കൂടുതല്‍ അനുയോധ്യമെന്ന് രാഷ്ട്രീയ നിരീക്ഷകര്‍ ചൂണ്ടിക്കാണിക്കുന്നു.
Related News
