വാഷിങ്ടണ്‍: അമേരിക്കന്‍ ഇടക്കാല തിരഞ്ഞെടുപ്പില്‍ ഡെമോക്രാറ്റുകള്‍ക്ക് വന്‍ മുന്നേറ്റമെന്ന് ആദ്യ സൂചനകള്‍. ജോര്‍ജിയയില്‍ ഡെമോക്രാറ്റിക് സെനറ്റര്‍ ജോണ്‍ ഒസോഫ് വീണ്ടും തിരഞ്ഞെടുക്കപ്പെട്ടു. റിപ്പബ്ലിക്കന്‍ സ്ഥാനാര്‍ഥി മൈക്ക് കോളിന്‍സിനെ പരാജയപ്പെടുത്തിയാണ് ഒസോഫ് സെനറ്റിലെ സീറ്റ് നിലനിര്‍ത്തിയത്. ഡെലവെയര്‍, ഇല്ലിനോയി, മസാച്യുസെറ്റ്‌സ്, റോഡ് ഐലന്‍ഡ്, ന്യൂജഴ്‌സി എന്നിവിടങ്ങളിലും ഡെമോക്രാറ്റുകള്‍ സീറ്റുകള്‍ നിലനിര്‍ത്തി.
ഡെലവെയറില്‍ നിലവിലെ സെനറ്റര്‍ ക്രിസ് കൂണ്‍സ് സീറ്റ് നിലനിര്‍ത്തി. ഇല്ലിനോയിയില്‍ ഡെമോക്രാറ്റിക് സ്ഥാനാര്‍ഥി ജൂലിയാന സ്ട്രാറ്റണ്‍ വിജയിക്കുമെന്നാണ് പ്രവചനം. മസാച്യുസെറ്റ്‌സില്‍ സെനറ്റര്‍ എഡ്വേര്‍ഡ് ജെ. മാര്‍ക്കിയും റോഡ് ഐലന്‍ഡില്‍ ജാക്ക് റീഡും വീണ്ടും തിരഞ്ഞെടുക്കപ്പെട്ടു. നോര്‍ത്ത് കരോലിനയില്‍ റിപ്പബ്ലിക്കന്‍ പാര്‍ട്ടിയുടെ സീറ്റ് ഡെമോക്രാറ്റുകള്‍ പിടിച്ചെടുത്തു. ഇതോടെ സെനറ്റിലെ ഭൂരിപക്ഷത്തിനായുള്ള പോരാട്ടത്തില്‍ ഡെമോക്രാറ്റുകള്‍ക്ക് കൂടുതല്‍ മുന്നേറ്റമുണ്ടായി. നിര്‍ണായക സ്വിങ് സ്‌റ്റേറ്റായ ജോര്‍ജിയയില്‍ ഡെമോക്രാറ്റുകള്‍ക്ക് ലഭിച്ച നേട്ടം സെനറ്റിലെ ഭൂരിപക്ഷത്തിനായുള്ള പോരാട്ടത്തിലും പ്രാധാന്യമര്‍ഹിക്കുന്നു.
ജീവിതച്ചെലവിലെ വര്‍ധനയും പ്രസിഡന്റ് ഡോണള്‍ഡ് ട്രംപിന്റെ ഭരണനയങ്ങളുമായിരുന്നു ഒസോഫ് പ്രചാരണത്തില്‍ പ്രധാനമായും ഉയര്‍ത്തിക്കാട്ടിയത്. പരാജയപ്പെട്ട പ്രസിഡന്റിനോട് കൂറുപുലര്‍ത്തുന്നയാളാണ് തന്റെ എതിരാളിയെന്ന് അദ്ദേഹം ആരോപിച്ചു. 2024ലെ പ്രസിഡന്റ് തിരഞ്ഞെടുപ്പില്‍ ട്രംപിനെ പിന്തുണച്ച സംസ്ഥാനമാണ് ജോര്‍ജിയ.
നിലവില്‍ ജനപ്രതിനിധിസഭയിലും സെനറ്റിലും റിപ്പബ്ലിക്കന്‍ പാര്‍ട്ടിക്കാണ് ഭൂരിപക്ഷം. സെനറ്റിന്റെ നിയന്ത്രണം നേടാന്‍ ഡെമോക്രാറ്റുകള്‍ക്ക് നാല് സീറ്റും ജനപ്രതിനിധിസഭയില്‍ ഭൂരിപക്ഷം നേടാന്‍ മൂന്ന് സീറ്റും ആവശ്യമാണ്. 435 ജനപ്രതിനിധിസഭാ സീറ്റുകളിലേക്കും സെനറ്റിലെ 35 സീറ്റുകളിലേക്കുമാണ് ഇത്തവണ തിരഞ്ഞെടുപ്പ് നടക്കുന്നത്.
Related News
