ഓക്ലന്‍ഡ്: ഇന്ത്യ-ന്യൂസിലന്‍ഡ് ഏകദിന ക്രിക്കറ്റ് പരമ്പരയിലെ ആദ്യ മത്സരത്തിന്റെ ടോസ് ചാറ്റല്‍മഴയെ തുടര്‍ന്ന് വൈകി. എന്നാല്‍ ഓക്ലന്‍ഡില്‍ മഴ മാറി സൂര്യപ്രകാശം തെളിഞ്ഞതോടെ ഗ്രൗണ്ടിലെ കവറുകള്‍ നീക്കിത്തുടങ്ങി. മത്സരം ഓവറുകള്‍ നഷ്ടമില്ലാതെ നടത്താനാകുമെന്ന പ്രതീക്ഷയിലാണ്.
ടി20 പരമ്പരയ്ക്കു പിന്നാലെ ഇന്ത്യയും ന്യൂസിലന്‍ഡും ഏകദിന പോരാട്ടത്തിനിറങ്ങുകയാണ്. ട്വന്റി20 പരമ്പരയിലെ ആദ്യ മൂന്നു കളികളും ഇന്ത്യ ജയിച്ചപ്പോള്‍ അവസാന രണ്ടില്‍ ആതിഥേയര്‍ മേല്‍ക്കൈ നേടി. മൂന്ന് ഫോര്‍മാറ്റുകളിലും മത്സരങ്ങളുള്ള അപൂര്‍വ പര്യടനത്തിലെ ഏകദിന പരമ്പരയ്ക്ക് ഈഡന്‍ പാര്‍ക്കിലാണ് തുടക്കം. ഒരു വര്‍ഷത്തിനുള്ളില്‍ നടക്കാനിരിക്കുന്ന ഏകദിന ലോകകപ്പിനുള്ള ഒരുക്കങ്ങളുടെ ഭാഗമായും ഇരുടീമുകളും ഈ പരമ്പരയെ കാണുന്നു.
രോഹിത് ശര്‍മ, വിരാട് കോഹ്‌ലി, ശുഭ്മന്‍ ഗില്‍, മുഹമ്മദ് സിറാജ് എന്നിവര്‍ ഇന്ത്യന്‍ ടീമിലേക്ക് മടങ്ങിയെത്തുന്നത് ശ്രദ്ധേയമാണ്. ന്യൂസിലന്‍ഡ് നിരയില്‍ ടോം ലാഥവും വില്‍ യങും തിരിച്ചെത്തിയിട്ടുണ്ട്.
പരിശീലനത്തിനിടെ മാറ്റ് ഹെന്റിയുമായി കൂട്ടിയിടിച്ച് തലകറക്കം സംഭവിച്ചതിനെ തുടര്‍ന്ന് ഡെവണ്‍ കോണ്‍വേ ആദ്യ മത്സരത്തില്‍നിന്ന് പിന്മാറി. പകരം ടിം സീഫര്‍ട്ടിനെ കളിപ്പിക്കാനാണ് സാധ്യത. കൂട്ടിയിടിയില്‍ ഹെന്റിക്കും പരിക്കേറ്റിട്ടുണ്ട്. രചിന്‍ രവീന്ദ്രയും മാര്‍ക്ക് ചാപ്മാനും ലഭ്യമല്ലാത്തതിനാല്‍ ന്യൂസിലന്‍ഡിന് ബാറ്റിങ് നിരയില്‍ കൂടുതല്‍ മാറ്റങ്ങളുണ്ടാവും.
ടി20 മത്സരങ്ങളില്‍നിന്ന് വ്യത്യസ്തമായ വെല്ലുവിളിയാണ് ഈഡന്‍ പാര്‍ക്കിലെ ഏകദിനത്തില്‍ പ്രതീക്ഷിക്കുന്നത്. കഴിഞ്ഞ വെള്ളിയാഴ്ച നടന്ന ടി20 മത്സരത്തില്‍ ന്യൂസിലന്‍ഡ് ഇവിടെ 259 റണ്‍സ് നേടിയിരുന്നു. എന്നാല്‍ ഏകദിനത്തിലെ ഉയര്‍ന്ന സ്‌കോര്‍ 2007ല്‍ പിറന്ന 340 റണ്‍സാണ്. ഫ്‌ലഡ്‌ലൈറ്റിനു കീഴില്‍ നടന്ന അവസാന രണ്ട് ഏകദിനങ്ങളില്‍ ടീമുകള്‍ യഥാക്രമം 150, 76 റണ്‍സിന് പുറത്തായിട്ടുണ്ട്.
പിച്ചില്‍ ബൗണ്‍സ് ലഭിക്കുമെന്നാണ് പ്രതീക്ഷ. പേസര്‍മാര്‍ക്ക് അനുകൂലമായ സാഹചര്യം ലഭിക്കുമെന്ന കണക്കുകൂട്ടലിലാണ് ന്യൂസിലന്‍ഡ്.