അല്‍ ഖോബാര്‍: സ്ത്രീകളുടെ ആത്മവിശ്വാസം ശക്തിപ്പെടുത്തുന്നതിനും സ്വയം തിരിച്ചറിവിലൂടെ വ്യക്തിത്വവികസനത്തിന് പ്രചോദനം നല്‍കുന്നതിനുമായി വേള്‍ഡ് മലയാളി കൗണ്‍സില്‍ (ഡബ്ലു.എം.സി.) അല്‍ ഖോബാര്‍ പ്രൊവിന്‍സ് വിമന്‍സ് കൗണ്‍സിലിന്റെ ആഭിമുഖ്യത്തില്‍ സംഘടിപ്പിച്ച 'Rediscover You' ലൈഫ് കോച്ചിംഗ് അവയര്‍നെസ് ശില്‍പശാല ശ്രദ്ധേയമായി. അല്‍ ഖോബാറിലെ ദാര്‍ റയ്ഹാന്‍ റൊട്ടാനയില്‍ നടന്ന പരിപാടിയില്‍ വിവിധ മേഖലകളില്‍ നിന്നുള്ള നിരവധി വനിതകള്‍ പങ്കെടുത്തു.
പ്രശസ്ത ലൈഫ് കോച്ചും മോട്ടിവേഷണല്‍ ട്രെയിനറുമായ ബിസ്മി അജി ശില്‍പശാലയ്ക്ക് നേതൃത്വം നല്‍കി. സ്വയം തിരിച്ചറിവ്, ആത്മവിശ്വാസം, വ്യക്തിത്വവികസനം, ജീവിതലക്ഷ്യങ്ങളുടെ നിര്‍വചനം, വ്യക്തിപരമായ കഴിവുകളുടെയും സാധ്യതകളുടെയും തിരിച്ചറിവ് തുടങ്ങിയ വിഷയങ്ങളെ ആസ്പദമാക്കിയുള്ള സെഷന് പങ്കെടുത്തവര്‍ക്ക് ഏറെ പ്രചോദനവും പുതിയ ഉള്‍ക്കാഴ്ചകളും പകര്‍ന്നു. ജീവിതാനുഭവങ്ങളോട് ചേര്‍ത്തുവെച്ചുള്ള ഉദാഹരണങ്ങളും ലളിതവും ഹൃദ്യവുമായ അവതരണശൈലിയും സെഷനെ കൂടുതല്‍ ആകര്‍ഷകമാക്കി.
സ്വന്തം കഴിവുകളെയും പരിമിതികളെയും തിരിച്ചറിയുന്നതിനും വ്യക്തിജീവിതത്തിലും സാമൂഹിക ജീവിതത്തിലും കൂടുതല്‍ ആത്മവിശ്വാസത്തോടെ മുന്നേറുന്നതിനും വ്യക്തമായ ലക്ഷ്യബോധം വളര്‍ത്തുന്നതിനും ശില്‍പശാല സഹായകമായി. സംവേദനാത്മകമായ പരിശീലനരീതിയിലൂടെ പങ്കെടുത്തവരുടെ ചിന്തകളും അനുഭവങ്ങളും പങ്കുവെക്കാന്‍ അവസരമൊരുക്കിയ സെഷന് മികച്ച പ്രതികരണമാണ് ലഭിച്ചത്.
ഡബ്ലു.എം.സി. വിമന്‍സ് കൗണ്‍സില്‍ ജനറല്‍ സെക്രട്ടറി റെയ്‌നി ബാബു സ്വാഗതം ആശംസിച്ചു. പ്രസിഡന്റ് അനുപമ ദിലീപ് അധ്യക്ഷത വഹിച്ചു. ശില്‍പശാല മുരളി ഊട്ടുകുളം ഉദ്ഘാടനം ചെയ്തു. വിമന്‍സ് കൗണ്‍സില്‍ ചെയര്‍പേഴ്‌സണ്‍ അര്‍ച്ചന അഭിഷേക് പരിശീലക ബിസ്മി അജിയെ വേദിയിലേക്ക് സ്വാഗതം ചെയ്തു.
ഡബ്ലു.എം.സി. ഗ്ലോബല്‍ വിമന്‍സ് കൗണ്‍സില്‍ ട്രഷറര്‍ ജമീല ഹമീദ്, അല്‍ ഖോബാര്‍ പ്രൊവിന്‍സ് പ്രസിഡന്റ് ഷമീം കാട്ടാക്കട, ചെയര്‍മാന്‍ ഗുലാം ഹമീദ് ഫൈസല്‍, ജോയിന്റ് സെക്രട്ടറി ദിലീപ്, ഗ്ലോബല്‍ എഡ്യൂക്കേഷന്‍ ഫോറം ചെയര്‍മാന്‍ നജീബ് അരഞ്ഞിക്കല്‍, ബിസിനസ് ഫോറം ചെയര്‍മാന്‍ ഷഫീക്ക് സി.കെ., വിമന്‍സ് കൗണ്‍സില്‍ വൈസ് ചെയര്‍പേഴ്‌സണ്‍ ഷംല നജീബ്, ഡബ്ലു.എം.സി. ടോസ്റ്റ്മാസ്റ്റേഴ്‌സ് പ്രസിഡന്റ് ഭാവന ദിനേഷ് എന്നിവര്‍ ആശംസകള്‍ അര്‍പ്പിച്ചു. പരിപാടിക്ക് നേതൃത്വം നല്‍കിയ പരിശീലക ബിസ്മി അജിയെയും വേദിയൊരുക്കിയ ദാര്‍ റയ്ഹാന്‍ റൊട്ടാന അധികൃതരെയും ഡബ്ലു.എം.സി. ഭാരവാഹികള്‍ മൊമെന്റോ നല്‍കി ആദരിച്ചു. വിമന്‍സ് കൗണ്‍സില്‍ ജോയിന്റ് സെക്രട്ടറി ആശാ രാഹുല്‍ നന്ദി രേഖപ്പെടുത്തി.
പരിപാടിയുടെ ഭാഗമായി വിമന്‍സ് കൗണ്‍സില്‍ ഭാരവാഹികളും എക്‌സിക്യൂട്ടീവ് അംഗങ്ങളും ജനറല്‍ അംഗങ്ങളും ശില്‍പശാലയില്‍നിന്ന് ലഭിച്ച അനുഭവങ്ങളും അഭിപ്രായങ്ങളും പങ്കുവെച്ചു. വനിതകളുടെ സജീവമായ പങ്കാളിത്തവും തുറന്ന സംവാദങ്ങളും പരിപാടിക്ക് കൂടുതല്‍ മികവേകി. പരിശീലകയുടെ അവതരണ മികവിനെയും ശില്‍പശാലയുടെ വിഷയസമ്പന്നതയെയും പങ്കെടുത്തവര്‍ പ്രത്യേകം അഭിനന്ദിച്ചു.
സ്ത്രീകളുടെ വ്യക്തിത്വവികസനം, മാനസിക ഉന്നമനം, ആത്മവിശ്വാസം, സാമൂഹിക ശാക്തീകരണം എന്നിവ പ്രോത്സാഹിപ്പിക്കുന്നതിനുള്ള പ്രവര്‍ത്തനങ്ങള്‍ ഡബ്ലു.എം.സി. വിമന്‍സ് കൗണ്‍സിലിന്റെ സാമൂഹിക പ്രതിബദ്ധതയുടെ ഭാഗമാണെന്ന് സംഘാടകര്‍ അറിയിച്ചു. സ്ത്രീകള്‍ക്ക് സ്വന്തം കഴിവുകളും സ്വപ്നങ്ങളും തിരിച്ചറിഞ്ഞ് ജീവിതത്തില്‍ പുതിയ ലക്ഷ്യങ്ങള്‍ കണ്ടെത്താനും ആത്മവിശ്വാസത്തോടെ മുന്നേറാനും പ്രചോദനം നല്‍കുന്ന കൂടുതല്‍ വിജ്ഞാനപ്രദവും പ്രചോദനാത്മകവുമായ പരിപാടികള്‍ ഭാവിയിലും സംഘടിപ്പിക്കുമെന്നും ഭാരവാഹികള്‍ വ്യക്തമാക്കി.
