മുംബൈ: മുംബൈ ഛത്രപതി ശിവജി മഹാരാജ് അന്താരാഷ്ട്ര വിമാനത്താവളത്തിലെ (സി.എസ്.എം.ഐ.എ.) ടെര്‍മിനല്‍ 1 നവീകരണത്തിന്റെ ഭാഗമായി 12 അന്താരാഷ്ട്ര വിമാനക്കമ്പനികളുടെ സര്‍വീസുകള്‍ നവി മുംബൈ അന്താരാഷ്ട്ര വിമാനത്താവളത്തിലേക്ക് (എന്‍.എം.ഐ.എ.) മാറ്റും. 2027 മാര്‍ച്ച് അവസാനം മുതലാണ് മാറ്റം നടപ്പാക്കുക. 2027ലെ വേനല്‍ക്കാല ഷെഡ്യൂളിലേക്കുള്ള സ്ലോട്ട് അനുവദിക്കല്‍ മുംബൈ വിമാനത്താവളം പൂര്‍ത്തിയാക്കി.
വിമാനത്താവളത്തില്‍നിന്ന് സര്‍വീസ് നടത്തുന്ന 50 അന്താരാഷ്ട്ര വിമാനക്കമ്പനികളില്‍ 38 എണ്ണത്തിനാണ് വേനല്‍ക്കാല ഷെഡ്യൂളിലേക്ക് സ്ലോട്ടുകള്‍ അനുവദിച്ചത്. ശേഷിക്കുന്ന 12 കമ്പനികള്‍ക്ക് മുംബൈയില്‍ സ്ലോട്ടുകള്‍ അനുവദിച്ചിട്ടില്ല. ഇവയുടെ 14 ലക്ഷ്യസ്ഥാനങ്ങളിലേക്കുള്ള പ്രതിദിനം ഏകദേശം 16 സര്‍വീസുകളാണ് നവി മുംബൈയിലേക്ക് മാറ്റുക.
ഈ ക്രമീകരണത്തിലൂടെ മുംബൈ വിമാനത്താവളത്തിലെ നിലവിലെ ഗതാഗതശേഷിയുടെ 91 ശതമാനത്തോളം നിലനിര്‍ത്താനാകുമെന്നാണ് അധികൃതരുടെ വിശദീകരണം. പ്രതിവര്‍ഷം ഏകദേശം 50 ലക്ഷം യാത്രക്കാരുടെ യാത്രകള്‍ പുതിയ വിമാനത്താവളത്തിലേക്ക് മാറുമെന്നാണ് പ്രതീക്ഷ.
നേരത്തേ ഇന്‍ഡിഗോ, എയര്‍ ഇന്ത്യ, ആകാശ എയര്‍ തുടങ്ങിയ ഇന്ത്യന്‍ വിമാനക്കമ്പനികളും 14 ലക്ഷ്യസ്ഥാനങ്ങളിലേക്കുള്ള ചില സര്‍വീസുകള്‍ നവി മുംബൈയിലേക്ക് മാറ്റാനുള്ള പദ്ധതി പ്രഖ്യാപിച്ചിരുന്നു. അന്താരാഷ്ട്ര വിമാനക്കമ്പനികളുമായി കൂടിയാലോചന നടത്തിയ ശേഷമാണ് സ്ലോട്ട് അനുവദിച്ചതെന്ന് മുംബൈ വിമാനത്താവള അധികൃതര്‍ അറിയിച്ചു.
ടെര്‍മിനല്‍ 1ന്റെ നവീകരണത്തിനും വിപുലീകരണത്തിനും ആവശ്യമായ സ്ഥലം ഒരുക്കുകയാണ് വിമാനസര്‍വീസുകള്‍ മാറ്റുന്നതിന്റെ ലക്ഷ്യം. നിലവില്‍ പ്രതിവര്‍ഷം 1.5 കോടി യാത്രക്കാരെ കൈകാര്യം ചെയ്യാന്‍ ശേഷിയുള്ള ടെര്‍മിനലിന്റെ ശേഷി രണ്ട് കോടിയായി ഉയര്‍ത്തും.
2027 ജനുവരിയില്‍ നിര്‍മാണപ്രവര്‍ത്തനങ്ങള്‍ ആരംഭിക്കാനാണ് പദ്ധതി. നവീകരിച്ച ടെര്‍മിനല്‍ 2029 മാര്‍ച്ചോടെ പ്രവര്‍ത്തനസജ്ജമാക്കുകയാണ് ലക്ഷ്യം. നാല് നിലകളിലായുള്ള വിപുലീകരണത്തില്‍ ആഭ്യന്തര യാത്രക്കാര്‍ക്കായി നാല് അധിക ബസ് ബോര്‍ഡിങ് ഗേറ്റുകള്‍ ഒരുക്കും. യാത്രക്കാരുടെ പരിശോധന, സുരക്ഷാ പരിശോധന, ജീവനക്കാര്‍ക്കുള്ള സൗകര്യങ്ങള്‍ എന്നിവയും വിപുലീകരിക്കും.
1964ല്‍ പ്രവര്‍ത്തനം ആരംഭിച്ച ടെര്‍മിനല്‍ 1ന് പ്രതിവര്‍ഷം 1.5 കോടി യാത്രക്കാരെ കൈകാര്യം ചെയ്യാനാണ് രൂപകല്‍പ്പന ചെയ്തിരുന്നത്. ടെര്‍മിനലിന്റെ പഴക്കം ചെന്ന ഘടനയെക്കുറിച്ച് 2017ല്‍ സ്ട്രക്വെല്‍ നടത്തിയ പരിശോധനയിലും 2024ല്‍ ഐ.ഐ.ടി. ബോംബെ നടത്തിയ പരിശോധനയിലും ആശങ്കകള്‍ രേഖപ്പെടുത്തിയിരുന്നു.
2027 ഏപ്രിലില്‍ പൊളിച്ചുനീക്കല്‍ ആരംഭിക്കാനും തുടര്‍ന്ന് ഘട്ടംഘട്ടമായി പുനര്‍നിര്‍മാണം നടത്താനുമാണ് തീരുമാനം.
വിമാനക്കമ്പനികള്‍ക്ക് നേരത്തേ അനുവദിച്ചിരുന്ന സ്ലോട്ടുകള്‍ താല്‍ക്കാലിക മാറ്റത്തിനിടെ നഷ്ടപ്പെടില്ലെന്നും നവീകരണം പൂര്‍ത്തിയായാല്‍ അവ പുനഃസ്ഥാപിക്കുമെന്നും സി.എസ്.എം.ഐ.എ. അധികൃതര്‍ ഉറപ്പുനല്‍കിയിട്ടുണ്ട്. ദീര്‍ഘകാല സര്‍വീസ് ക്രമീകരണങ്ങളെ ബാധിക്കാതെയാണ് മാറ്റം നടപ്പാക്കുകയെന്നാണ് വിമാനത്താവളത്തിന്റെ നിലപാട്.