മുംബൈ: എന്‍സിപി (എസ്പി) അധ്യക്ഷന്‍ ശരദ് പവാറിനെ എന്‍.സി.പി നേതാവ് പ്രഫുല്‍ പട്ടേല്‍ മുംബൈയിലെ ബ്രീച്ച് കാന്‍ഡി ആശുപത്രിയിലെത്തി സന്ദര്‍ശിച്ചു. പവാറിന്റെ ആരോഗ്യസ്ഥിതി തൃപ്തികരമാണെന്നും പരിശോധനകള്‍ പൂര്‍ത്തിയാക്കി ഒന്നോ രണ്ടോ ദിവസത്തിനകം വീട്ടിലേക്ക് മടങ്ങാനാകുമെന്നാണ് പ്രതീക്ഷയെന്നും പ്രഫുല്‍ പട്ടേല്‍ മാധ്യമങ്ങളോട് പറഞ്ഞു.
85കാരനായ ശരദ് പവാറിനെ ബുധനാഴ്ചയാണ് ദക്ഷിണ മുംബൈയിലെ ബ്രീച്ച് കാന്‍ഡി ആശുപത്രിയില്‍ പ്രവേശിപ്പിച്ചത്. തിങ്കളാഴ്ച മുതല്‍ ചികിത്സയിലായിരുന്ന അദ്ദേഹം പൂനെയിലെ റൂബി ഹാള്‍ ക്ലിനിക്കില്‍നിന്ന് ഡിസ്ചാര്‍ജ് ചെയ്ത ശേഷമാണ് മുംബൈയിലേക്ക് മാറ്റിയത്.
എന്‍.സി.പിയുടെ രണ്ട് വിഭാഗങ്ങള്‍ ലയിക്കുമെന്നും ശരദ് പവാര്‍ പക്ഷം എന്‍.ഡി.എയില്‍ ചേരുമെന്നും പവാറിന്റെ മകള്‍ സുപ്രിയ സൂലെ കേന്ദ്ര മന്ത്രിസഭയില്‍ ചേരുമെന്നുമുള്ള ഊഹാപോഹങ്ങള്‍ക്കിടെയാണ് പ്രഫുല്‍ പട്ടേലിന്റെ കൂടിക്കാഴ്ച. സന്ദര്‍ശനത്തിന് രാഷ്ട്രീയ ലക്ഷ്യമില്ലെന്ന് പ്രഫുല്‍ പട്ടേല്‍ വിശദീകരിച്ചു. ശരദ് പവാറിനെയും മകള്‍ സുപ്രിയ സുലെയെയും താന്‍ ഇടയ്ക്കിടെ സന്ദര്‍ശിക്കാറുണ്ടെന്ന് പ്രഫുല്‍ പട്ടേല്‍ പറഞ്ഞു. കുടുംബബന്ധം നിലനില്‍ക്കുന്നതിനാലാണ് സന്ദര്‍ശനമെന്നും അദ്ദേഹം വ്യക്തമാക്കി. ആശുപത്രിയില്‍ രാഷ്ട്രീയ ചര്‍ച്ചകള്‍ നടന്നെന്ന അഭ്യൂഹങ്ങളും പട്ടേല്‍ തള്ളി. രാഷ്ട്രീയം ചര്‍ച്ച ചെയ്യാനുള്ള സ്ഥലമല്ല ആശുപത്രിയെന്നും അദ്ദേഹം പറഞ്ഞു.
കഴിഞ്ഞ ദിവസം ഡല്‍ഹിയില്‍ കേന്ദ്ര ആഭ്യന്തരമന്ത്രി അമിത് ഷായുമായി പ്രഫുല്‍ പട്ടേലും എന്‍സിപിയിലെ മറ്റ് മുതിര്‍ന്ന നേതാക്കളും കൂടിക്കാഴ്ച നടത്തിയിരുന്നു. അതിനു ശേഷമാണ് പവാറിനെ പ്രഫുല്‍ പട്ടേല്‍ സന്ദര്‍ശിച്ചത്. പവാറിനെ ഫോണില്‍ വിളിച്ച് പ്രധാനമന്ത്രി നരേന്ദ്ര മോദി സുഖ വിവരങ്ങള്‍ അന്വേഷിച്ചതും സുപ്രിയ സൂലെ ഇനി രാജ്യത്തിന്റെ കാര്യങ്ങള്‍ നോക്കുമെന്ന് അറിയിച്ചതും വലിയ വാര്‍ത്തയായിരുന്നു. എന്‍സിപി അധ്യക്ഷ സുനേത്ര പവാറും മക്കളായ പാര്‍ഥ്, ജയ് എന്നിവരും അമിത് ഷായുമായുള്ള കൂടിക്കാഴ്ചയില്‍ പങ്കെടുത്തിരുന്നില്ല. പാര്‍ഥ് പവാറിന്റെ പാര്‍ട്ടിയിലെ സ്വാധീനം വര്‍ധിക്കുന്നതില്‍ എന്‍സിപി നേതൃത്വത്തിലെ ഒരു വിഭാഗത്തിന് അതൃപ്തിയുണ്ടെന്ന റിപ്പോര്‍ട്ടുകള്‍ക്കിടയിലായിരുന്നു അമിത് ഷായുമായുള്ള കൂടിക്കാഴ്ച.
Related News
