ജിദ്ദ: ആഗോളതലത്തില്‍ ഇസ്ലാമിനെ സൂഫിസത്തിന്റെ ലേബലില്‍ അവതരിപ്പിച്ച്, അവരാണ് യഥാര്‍ത്ഥ മുസ്ലിംകള്‍ എന്ന് പ്രചരിപ്പിച്ച് വിശ്വാസികളെ സൂഫിസത്തിന്റെ ആശയധാരയില്‍ മയക്കിക്കിടത്താന്‍ ശ്രമിക്കുന്നവര്‍ ഇസ്ലാമിന്റെ ശത്രുക്കളാണെന്ന് പ്രമുഖ പണ്ഡിതനും മദീന തൈബ സര്‍വകലാശാല മുന്‍ പ്രൊഫസറുമായ ഡോ. യാസിര്‍ ബിന്‍ ഹംസ അഭിപ്രായപ്പെട്ടു. സൂഫിസം അഹ്ലുസ്സുന്നക്ക് പരിചയമില്ലാത്ത വികല ആശയങ്ങളുടെയും ആചാരങ്ങളുടെയും സങ്കേതമാണെന്നും അതിന് ഇസ്ലാമിന്റെ അടിസ്ഥാന പ്രമാണങ്ങളുമായി ബന്ധമില്ലെന്നും അദ്ദേഹം കൂട്ടിച്ചേര്‍ത്തു. ജിദ്ദാ ദഅവാ കോര്‍ഡിനേഷന്‍ കമ്മിറ്റി (ജെ.ഡി.സി.സി.) ഹയ്യു തയ്സീറിലെ സൗത് ദഅവാ സെന്ററുമായി സഹകരിച്ച് നടത്തിയ വൈജ്ഞാനിക സംഗമത്തില്‍ 'സൂഫിസം; അഹ്ലുസ്സുന്നയുടെ നിലപാട്' എന്ന വിഷയം അവതരിപ്പിച്ച് സംസാരിക്കുകയായിരുന്നു അദ്ദേഹം.
ഇന്ത്യയിലും ഭരണകൂടത്തിന്റെയടക്കം ഒത്താശയോടെ സൂഫിസത്തെ വളര്‍ത്തിക്കൊണ്ടുവരാന്‍ ശ്രമങ്ങള്‍ നടന്നുകൊണ്ടിരിക്കുന്നു. പ്രമാണങ്ങളെ തങ്ങളുടെ താല്‍പര്യങ്ങള്‍ക്കനുസരിച്ച് ദുര്‍വ്യാഖ്യാനിച്ച്, പ്രമാണവിരുദ്ധമായ ആചാരങ്ങളും അനുഷ്ഠാനങ്ങളും ആട്ടവും പാട്ടും സംഗീതവും ലഹരിയും കോര്‍ത്തിണക്കി സ്രഷ്ടാവും സൃഷ്ടിയും ഒന്നാണെന്ന അദ്വൈത സിദ്ധാന്തത്തിലേക്ക് വിശ്വാസികളെ വഴിനടത്താന്‍ ശ്രമിക്കുന്ന ആധുനിക സൂഫിസത്തെ വെള്ളപൂശാന്‍ ശ്രമിക്കുന്നവര്‍ പൂര്‍വസൂരികളുടെ മാര്‍ഗത്തെയാണ് നിഷേധിക്കാന്‍ ശ്രമിക്കുന്നത്. ഈ കാലഘട്ടത്തില്‍ താന്‍ സൂഫിയാണെന്ന് വാദിക്കുകയും പ്രഖ്യാപിക്കുകയും ചെയ്യുന്നവര്‍ക്ക് സലഫികളാണെന്ന് പറയാന്‍ യോഗ്യതയില്ലെന്നും അദ്ദേഹം വ്യക്തമാക്കി.
യഥാര്‍ത്ഥത്തില്‍ 'സൂഫി' എന്ന പ്രയോഗത്തിന് ഫിലോസഫിയുമായി യാതൊരു ബന്ധവുമില്ല. മുന്‍കാലങ്ങളില്‍ ജീവിച്ചിരുന്ന ഇത്തരം വികലവിശ്വാസം പേറുന്നവര്‍ ഭൗതികവിരക്തി പ്രകടമാക്കാന്‍ സ്ഥിരമായി 'സൂഫ്' (കമ്പിളി) വസ്ത്രങ്ങള്‍ മാത്രം ധരിക്കുകയും, അതടിസ്ഥാനത്തില്‍ സൂഫ് അഥവാ കമ്പിളി എന്ന പദത്തിലേക്ക് ചേര്‍ത്ത് വിളിക്കപ്പെടുകയുമാണുണ്ടായത് എന്ന് ശൈഖുല്‍ ഇസ്ലാം ഇബ്നു തൈമിയ്യയെ പോലുള്ള പണ്ഡിതന്മാരുടെ ഉദ്ധരണികള്‍ ഉദ്ധരിച്ച് അദ്ദേഹം വിശദീകരിച്ചു. സൂഫിസമെന്ന ഓമനപ്പേരിട്ട് ഇസ്ലാമിന്റെ പേരില്‍ പുതിയ ലിബറല്‍ ചിന്തകള്‍ കടത്തിക്കൂട്ടാന്‍ ശ്രമിക്കുന്നത് തിരിച്ചറിഞ്ഞ് യാഥാര്‍ത്ഥ്യം മനസ്സിലാക്കാനും ശരിയായ വിശ്വാസത്തിലേക്ക് മടങ്ങാനും വിശ്വാസികള്‍ തയ്യാറാകണമെന്ന് അദ്ദേഹം പറഞ്ഞു.
സൗത് ദഅവാ സെന്റര്‍ ഓഡിറ്റോറിയത്തില്‍ നടന്ന പരിപാടി തൈസീര്‍ ജാലിയാത് ദഅവാ വിഭാഗം മേധാവി ശൈഖ് സഈദ് ഉദ്ഘാടനം ചെയ്തു. ജെ.ഡി.സി.സി. പ്രസിഡന്റ് സുനീര്‍ പുളിക്കല്‍ അധ്യക്ഷത വഹിച്ചു. അനസ് ബിന്‍ മാലിക് മദ്രസ പ്രിന്‍സിപ്പല്‍ മുഹമ്മദ് റഫീഖ് സുല്ലമി ആമുഖ ഭാഷണം നിര്‍വഹിച്ചു. സല്‍മാന്‍ ബാലുശ്ശേരി, യൂസുഫ് ചോലക്കല്‍, നൗഫല്‍ പീടിയേക്കല്‍, അബ്ദുല്‍ ജബ്ബാര്‍ തിരൂരങ്ങാടി, അബ്ദുല്‍ ഗനി ചെംനാട്, റൗനഖ് പുത്തൂര്‍ പള്ളിക്കല്‍, അബ്ബാസ് പുല്‍പ്പറ്റ, സത്താര്‍ അല്‍ ഹികമി തുടങ്ങിയവര്‍ നേതൃത്വം നല്‍കി. ജെ.ഡി.സി.സി. ജനറല്‍ സെക്രട്ടറി ഫൈസല്‍ വാഴക്കാട് നന്ദി പറഞ്ഞു.
Related News
