റിയാദ്: സ്വകാര്യ മേഖലയിലെ 94 സാങ്കേതിക എഞ്ചിനീയറിംഗ് തസ്തികകളിലെ സൗദിവല്‍ക്കരണ നിരക്ക് 35 ശതമാനമായി ഉയര്‍ത്തിയതായി മാനവ വിഭവശേഷി സാമൂഹിക വികസന മന്ത്രാലയവും മുനിസിപ്പാലിറ്റി-ഭവന മന്ത്രാലയവും സംയുക്തമായി പ്രഖ്യാപിച്ചു. 2027 മെയ് 9 മുതല്‍ ഈ പുതിയ തീരുമാനം പ്രാബല്യത്തില്‍ വരും.

തൊഴില്‍ വിപണി തന്ത്രത്തിന്റെയും സൗദി വിഷന്‍ 2030-ന്റെയും ലക്ഷ്യങ്ങള്‍ക്ക് അനുസൃതമായി, സ്‌പെഷ്യലൈസ്ഡ് തൊഴിലുകളില്‍ സൗദിവല്‍ക്കരണം വ്യാപിപ്പിക്കുക, ദേശീയ പ്രതിഭകളെ ശാക്തീകരിക്കുക, തൊഴില്‍ വിപണിയിലെ അവരുടെ പങ്കാളിത്തം വര്‍ദ്ധിപ്പിക്കുക എന്നിവ ലക്ഷ്യമിട്ടാണ് ഈ സുപ്രധാന തീരുമാനം നടപ്പിലാക്കുന്നത്.

പുതിയ തീരുമനപ്രകാരം, ലക്ഷ്യമിട്ട തസ്തികകളില്‍ അഞ്ചോ അതിലധികമോ ജീവനക്കാരെ ജോലിക്കു നിര്‍ത്തിയിട്ടുള്ള സ്വകാര്യ സ്ഥാപനങ്ങള്‍ 35 ശതമാനം സൗദിവല്‍ക്കരണ നിരക്ക് പാലിക്കേണ്ടതുണ്ട്. സ്ഥാപനങ്ങളുടെ തലത്തിലായിരിക്കും ഇത് കണക്കാക്കുക. ഇതിനുമുമ്പ്, 2025 ജൂലൈ 27 മുതല്‍ ഈ തസ്തികകളില്‍ 30 ശതമാനം സൗദിവല്‍ക്കരണം മന്ത്രാലയം നടപ്പിലാക്കിയിരുന്നു.

സിവില്‍ എഞ്ചിനീയറിംഗ് ടെക്‌നീഷ്യന്‍, ഇലക്ട്രിക്കല്‍ എഞ്ചിനീയറിംഗ് ടെക്‌നീഷ്യന്‍, മെക്കാനിക്കല്‍ എഞ്ചിനീയറിംഗ് ടെക്‌നീഷ്യന്‍, ഇലക്ട്രോണിക് എഞ്ചിനീയറിംഗ് ടെക്‌നീഷ്യന്‍, സര്‍വേയിംഗ് ടെക്‌നീഷ്യന്‍, മെക്കാനിക്കല്‍ മെയിന്റനന്‍സ് ടെക്‌നീഷ്യന്‍, ആര്‍ക്കിടെക്ചറല്‍ ഡ്രാഫ്റ്റ്സ്മാന്‍ തുടങ്ങി വിവിധ എഞ്ചിനീയറിംഗ്-സാങ്കേതിക തസ്തികകളാണ് ഇതില്‍ ഉള്‍പ്പെടുന്നത്. സൗദി സ്റ്റാന്‍ഡേര്‍ഡ് ക്ലാസിഫിക്കേഷന്‍ ഓഫ് ഒക്യുപേഷന്‍സ് പ്രകാരമുള്ള എല്ലാ സ്ഥാപനങ്ങള്‍ക്കും ഈ നിയമം ബാധകമായിരിക്കും.

സ്വകാര്യ സ്ഥാപനങ്ങള്‍ക്ക് ഈ തീരുമാനം നടപ്പിലാക്കാന്‍ ആവശ്യമായ വിവിധ പ്രോത്സാഹനങ്ങളും പിന്തുണകളും മാനവ വിഭവശേഷി മന്ത്രാലയം വാഗ്ദാനം ചെയ്യുന്നുണ്ട്. റിക്രൂട്ട്മെന്റ്, പരിശീലനം, യോഗ്യത നേടല്‍, തൊഴില്‍ സ്ഥിരത എന്നിവയില്‍ ആവശ്യമായ സഹായങ്ങളും മന്ത്രാലയത്തിന്റെ സൗദിവല്‍ക്കരണ പിന്തുണാ പദ്ധതികളുടെ മുന്‍ഗണനയും ഇതിലൂടെ ലഭ്യമാകും.

നിയമത്തിന്റെ വിശദാംശങ്ങളും ഉള്‍പ്പെട്ടിരിക്കുന്ന തസ്തികകളും നടപ്പിലാക്കുന്നതിനുള്ള മാര്‍ഗ്ഗനിര്‍ദ്ദേശങ്ങളും അടങ്ങിയ പ്രൊസീജറല്‍ ഗൈഡ് മന്ത്രാലയത്തിന്റെ ഔദ്യോഗിക വെബ്സൈറ്റില്‍ ലഭ്യമാക്കിയിട്ടുണ്ട്. തൊഴിലുടമകള്‍ക്ക് തങ്ങളുടെ ബാധ്യതകള്‍ കൃത്യമായി മനസ്സിലാക്കാനും നിയമം പാലിക്കാനും ഇത് സഹായകരമാകും.