റിയാദ്: പ്രവാസികളുടെ അവകാശങ്ങളും ക്ഷേമവും സംരക്ഷിക്കേണ്ട സര്‍ക്കാര്‍ അവരെ കൂടുതല്‍ സാമ്പത്തിക ബാധ്യതയിലേക്ക് തള്ളിവിടരുതെന്നും, നോര്‍ക്ക കെയര്‍ ഇന്‍ഷുറന്‍സ് പ്രീമിയം വര്‍ധന പുനഃപരിശോധിച്ച് പ്രവാസികള്‍ക്കും കുടുംബങ്ങള്‍ക്കും താങ്ങാനാകുന്ന നിരക്ക് നിശ്ചയിക്കണമെന്നും ആവശ്യപ്പെട്ട് കേളി കലാസാംസ്‌കാരിക വേദിയുടെ നേതൃത്വത്തില്‍ പ്രവാസി അവകാശ സംരക്ഷണ സദസ്സ് സംഘടിപ്പിച്ചു. ബത്ത ലൂഹ ഓഡിറ്റോറിയത്തില്‍ നടന്ന പരിപാടിയില്‍ വിവിധ പ്രവാസി സംഘടനകളുടെ പ്രതിനിധികളും ലോക കേരള സഭാംഗങ്ങളും മാധ്യമപ്രവര്‍ത്തകരും പങ്കെടുത്തു.
നാടിന്റെ സമ്പദ്ഘടനയ്ക്ക് വലിയ സംഭാവന നല്‍കുന്ന പ്രവാസികളുടെ ജീവിതസുരക്ഷയും കുടുംബങ്ങളുടെ ക്ഷേമവും ഉറപ്പാക്കുന്നത് സര്‍ക്കാരിന്റെ ഉത്തരവാദിത്തമാണെന്ന് സദസ്സില്‍ പങ്കെടുത്തവര്‍ ചൂണ്ടിക്കാട്ടി. വിദേശത്ത് അധ്വാനിച്ച് കുടുംബത്തിന്റെ ജീവിതം മുന്നോട്ടുകൊണ്ടുപോകുന്ന സാധാരണക്കാരായ പ്രവാസികള്‍ക്ക് ആശ്വാസമാകേണ്ട ഇന്‍ഷുറന്‍സ് പദ്ധതി, ഉയര്‍ന്ന പ്രീമിയം കാരണം അപ്രാപ്യമാകരുത്. പ്രവാസികളുടെ സാമ്പത്തിക ശേഷിയും കുടുംബങ്ങളുടെ ആവശ്യങ്ങളും പരിഗണിച്ച് എല്ലാവര്‍ക്കും പ്രയോജനപ്പെടുന്ന രീതിയില്‍ പ്രീമിയം പുനര്‍നിശ്ചയിക്കണം. പ്രവാസികളുടെ അവകാശങ്ങള്‍ സംരക്ഷിക്കുന്നതിലും അവരുടെ കുടുംബങ്ങള്‍ക്ക് സുരക്ഷ ഉറപ്പാക്കുന്നതിലും സര്‍ക്കാര്‍ ഉത്തരവാദിത്തത്തോടെ ഇടപെടണമെന്ന് വിവിധ സംഘടനകളെ പ്രതിനിധീകരിച്ചെത്തിയവര്‍ ഏകകണ്ഠമായി ആവശ്യപ്പെട്ടു.
കേളി പ്രസിഡന്റ് ഗഫൂര്‍ ആനമങ്ങാട് അധ്യക്ഷത വഹിച്ച ചടങ്ങില്‍ വൈസ് പ്രസിഡന്റ് റഫീഖ് ചാലിയം ആമുഖ പ്രഭാഷണം നടത്തി. കേളി രക്ഷാധികാരി സമിതി അംഗവും എന്‍.ആര്‍.കെ (ചഞഗ) കണ്‍വീനറുമായ സുരേന്ദ്രന്‍ കൂട്ടായി സദസ്സ് ഉദ്ഘാടനം ചെയ്തു. കേളി ജോയിന്റ് സെക്രട്ടറി ഷാജി റസാഖ് പ്രമേയം അവതരിപ്പിച്ചു.
ഒ.ഐ.സി.സി പ്രതിനിധി അബ്ദുള്ള വല്ലാഞ്ചിറ, ലോക കേരള സഭാംഗം ഇബ്രാഹിം സുബ്ഹാന്‍, ന്യൂ ഏജ് രക്ഷാധികാരി സെക്രട്ടറി മുഹമ്മദ് സാലി, കേളി രക്ഷാധികാരി ആക്ടിങ് സെക്രട്ടറി ഷമീര്‍ കുന്നുമ്മല്‍, രക്ഷാധികാരി സമിതി അംഗം സീബാ കൂവോട്, കുടുംബവേദി ട്രഷറര്‍ സീന സെബിന്‍, കേളി സാംസ്‌കാരിക വിഭാഗം കണ്‍വീനര്‍ സതീഷ് വളവില്‍ എന്നിവര്‍ സംസാരിച്ചു. കേളി സെക്രട്ടറി സുനില്‍ കുമാര്‍ സ്വാഗതവും ആക്ടിങ് ട്രഷറര്‍ സിംനേഷ് നന്ദിയും പറഞ്ഞു.
Related News
