വാഷിങ്ടണ്‍: ഇറാനെതിരായ യുദ്ധം അവസാനിപ്പിക്കുന്നതിനുള്ള നയതന്ത്ര നീക്കങ്ങളില്‍ പുരോഗതിയുണ്ടെന്നും സൈനികാക്രമണങ്ങള്‍ പുനരാരംഭിക്കാനുള്ള സാധ്യത വളരെ കുറവാണെന്നും അമേരിക്കന്‍ പ്രസിഡന്റ് ഡോണള്‍ഡ് ട്രംപ്. ഖത്തര്‍ പ്രധാനമന്ത്രിയും മധ്യസ്ഥനുമായ ശൈഖ് മുഹമ്മദ് ബിന്‍ അബ്ദുറഹ്മാന്‍ അല്‍ഥാനിയുമായി വൈറ്റ് ഹൗസില്‍ നടത്തിയ കൂടിക്കാഴ്ചയ്ക്കു പിന്നാലെയാണ് ട്രംപിന്റെ പ്രഖ്യാപനം. ഇറാനുമായുള്ള സംഘര്‍ഷം സൈനികമായി ഫലത്തില്‍ അവസാനിച്ചുവെന്നും നിലവിലെ സ്ഥിതി നിലനിര്‍ത്താനാണ് അമേരിക്ക ശ്രമിക്കുന്നതെന്നും അദ്ദേഹം പറഞ്ഞു.
ഇറാനുമായുള്ള ചര്‍ച്ചകള്‍ നന്നായി മുന്നോട്ടുപോകുകയാണെന്നും യുദ്ധം അധികം വൈകാതെ അവസാനിക്കുമെന്നാണ് പ്രതീക്ഷയെന്നും ട്രംപ് വ്യക്തമാക്കി. ഇറാന്‍ അമേരിക്കയുമായി മാന്യമായ രീതിയില്‍ സംസാരിക്കുന്നുണ്ടെന്നും അദ്ദേഹം അവകാശപ്പെട്ടു. എന്നാല്‍ സാഹചര്യം മാറിയാല്‍ സൈനിക നടപടിക്ക് അമേരിക്ക സജ്ജമാണെന്നും മുന്നറിയിപ്പ് നല്‍കി. ഇറാന്റെ ആണവപദ്ധതി സംബന്ധിച്ച് ദീര്‍ഘകാല പരിഹാരം ഉറപ്പാക്കേണ്ടതുണ്ടെന്നും അദ്ദേഹം കൂട്ടിച്ചേര്‍ത്തു.
എന്നാല്‍ അമേരിക്കയുമായി ചര്‍ച്ചകള്‍ നടക്കുന്നുവെന്ന ട്രംപിന്റെ അവകാശവാദത്തെ ഇറാന്‍ സുരക്ഷാ കൗണ്‍സില്‍ സെക്രട്ടറി മുഹ്‌സിന്‍ റെസായി തള്ളി. സാങ്കല്‍പ്പിക ചര്‍ച്ചകളെക്കുറിച്ച് വ്യാജവാര്‍ത്തകള്‍ പ്രചരിപ്പിക്കുന്നത് അവസാനിപ്പിക്കണമെന്ന് അദ്ദേഹം എക്‌സില്‍ കുറിച്ചു. ഇറാന്‍ മുന്നോട്ടുവെച്ച ഏഴ് നിബന്ധനകള്‍ അമേരിക്ക അംഗീകരിക്കണമെന്നും ആവശ്യപ്പെട്ടു. അമേരിക്ക ഇറാനോട് കീഴടങ്ങേണ്ട സമയമാണിതെന്നായിരുന്നു അദ്ദേഹത്തിന്റെ പരാമര്‍ശം.
യുദ്ധം അവസാനിപ്പിക്കുന്നതിനുള്ള ഇറാന്റെ നിബന്ധനകളില്‍ അമേരിക്കയുടെ നാവിക ഉപരോധം പിന്‍വലിക്കല്‍, സാമ്പത്തിക ഉപരോധങ്ങള്‍ നീക്കല്‍, യുദ്ധനാശത്തിന് നഷ്ടപരിഹാരം നല്‍കല്‍, മേഖലയുടെ വിവിധ ഭാഗങ്ങളിലെ ശത്രുത അവസാനിപ്പിക്കല്‍ എന്നിവ ഉള്‍പ്പെടുന്നതായാണ് റിപ്പോര്‍ട്ടുകള്‍. എന്നാല്‍ ഈ ആവശ്യങ്ങളോട് വാഷിങ്ടണ്‍ ഇതുവരെ പൂര്‍ണമായ അനുകൂല നിലപാട് സ്വീകരിച്ചിട്ടില്ല. നയതന്ത്ര ചര്‍ച്ചകളില്‍ നിര്‍ണായക പുരോഗതി ഉണ്ടായിട്ടില്ലെന്ന് അമേരിക്കന്‍ വിദേശകാര്യ സെക്രട്ടറി മാര്‍ക്കോ റൂബിയോ നേരത്തെ വ്യക്തമാക്കിയിരുന്നു.
സംഘര്‍ഷം അവസാനിക്കുമെന്ന പ്രതീക്ഷയില്‍ ആഗോള എണ്ണവിലയില്‍ വലിയ ഇടിവുണ്ടായി. ഇന്ധനവില വര്‍ധനയെയും പണപ്പെരുപ്പത്തെയും കുറിച്ചുള്ള ആശങ്കകള്‍ കുറഞ്ഞതോടെ അമേരിക്കന്‍ ഓഹരിവിപണിയിലും മുന്നേറ്റമുണ്ടായി.
Related News
