.jpg)
ഷിംല: ഗാന്ധി കുടുംബത്തിനെതിരെ സമൂഹമാധ്യമത്തിലൂടെ നടത്തിയ പരാമര്‍ശങ്ങളുടെ പേരില്‍ ബി.ജെ.പി എം.പിയും നടിയുമായ കങ്കണ റണാവത്തിനെതിരെ ഹിമാചല്‍ പ്രദേശ് പൊലീസ് കേസെടുത്തു. പൊതുസമാധാനം തകര്‍ക്കാനും വിവിധ വിഭാഗങ്ങള്‍ക്കിടയില്‍ വിദ്വേഷം വളര്‍ത്താനും ഇടയാക്കുന്ന പ്രകോപനപരമായ പരാമര്‍ശങ്ങളാണ് കങ്കണ നടത്തിയതെന്ന പരാതിയിലാണ് നടപടി.
ഷിംല സ്വദേശിയും വിരമിച്ച സൈനിക ഉദ്യോഗസ്ഥനുമായ ക്യാപ്റ്റന്‍ അതുല്‍ ശര്‍മ നല്‍കിയ പരാതിയുടെ അടിസ്ഥാനത്തിലാണ് എഫ്.ഐ.ആര്‍ രജിസ്റ്റര്‍ ചെയ്തത്. നവംബര്‍ 10ന് കങ്കണയുടെ സമൂഹമാധ്യമ അക്കൗണ്ടില്‍ പങ്കുവെച്ച കുറിപ്പില്‍ മുന്‍ പ്രധാനമന്ത്രി ഇന്ദിരാഗാന്ധിയുടെയും മക്കളായ സഞ്ജയ് ഗാന്ധി, രാജീവ് ഗാന്ധി എന്നിവരുടെയും മരണങ്ങളെക്കുറിച്ച് പ്രകോപനപരമായ സൂചനകളുണ്ടായിരുന്നുവെന്നാണ് പരാതിയിലെ ആരോപണം.
കോണ്‍ഗ്രസ് നേതാവ് സോണിയ ഗാന്ധിയെ ദുരൂഹതയുണര്‍ത്തുന്ന വിദേശ പൗര എന്ന നിലയില്‍ ചിത്രീകരിച്ചതിനെയും പരാതിക്കാരന്‍ ചോദ്യം ചെയ്തു. ഗാന്ധി കുടുംബത്തില്‍ സോണിയ എത്തുന്നതും തുടര്‍ന്ന് ഗാന്ധി കുടുംബത്തിലെ അംഗങ്ങള്‍ ഓരോരുത്തരായി കൊല്ലപ്പെടുന്നതും ഒടുവില്‍ അവര്‍ സര്‍ക്കാര്‍ തലപ്പത്തെത്തുന്നതും ബന്ധപ്പെടുത്തിയാണ് പോസ്റ്റ്.
സഞ്ജയ് ഗാന്ധിയുടെ മരണത്തിനുശേഷം മനേക ഗാന്ധി കുടുംബവസതി വിട്ടുപോയ കാര്യവും പോസ്റ്റില്‍ പരാമര്‍ശിച്ചിരുന്നു.
ഇത്തരം പരാമര്‍ശങ്ങള്‍ രാഷ്ട്രീയ വിമര്‍ശനത്തിന്റെ പരിധി കടന്നതാണെന്നും പൊതുജനങ്ങള്‍ക്കിടയില്‍ ശത്രുതയും അസ്വസ്ഥതയും സൃഷ്ടിക്കുമെന്നും പരാതിക്കാരന്‍ ആരോപിച്ചു. തെറ്റിദ്ധരിപ്പിക്കുന്ന വിവരങ്ങള്‍ പ്രചരിപ്പിച്ച് ഭീതിയും വിവിധ വിഭാഗങ്ങള്‍ക്കിടയില്‍ വിദ്വേഷവും വളര്‍ത്താനുള്ള ശ്രമമാണിതെന്നും പരാതിയില്‍ പറയുന്നു.
എഫ്.ഐ.ആര്‍ രജിസ്റ്റര്‍ ചെയ്തതായി ഷിംല പൊലീസ് സൂപ്രണ്ട് ഗൗരവ് സിങ് സ്ഥിരീകരിച്ചു. സംഭവത്തില്‍ അന്വേഷണം ആരംഭിച്ചതായും പൊലീസ് അറിയിച്ചു.
1981 കാലഘട്ടത്തിലേതെന്ന് കരുതുന്ന ഗാന്ധി കുടുംബത്തിന്റെ പഴയൊരു വീഡിയോ സമൂഹമാധ്യമങ്ങളില്‍ വീണ്ടും പ്രചരിച്ചതിനു പിന്നാലെയാണ് കങ്കണയുടെ പരാമര്‍ശങ്ങള്‍ പുറത്തുവന്നത്. ഇന്ദിരാഗാന്ധി, സോണിയ ഗാന്ധി, മനേക ഗാന്ധി, രാഹുല്‍ ഗാന്ധി, പ്രിയങ്ക ഗാന്ധി എന്നിവര്‍ ഒരുമിച്ചുള്ള കുടുംബവിരുന്നിന്റെ ദൃശ്യങ്ങളാണ് വീഡിയോയിലുള്ളത്.
Related News
