വാഷിംഗ്ടണ്‍: അമേരിക്കന്‍ ചിപ്പ് ഭീമനായ എന്‍വിഡിയയുടെ സഹസ്ഥാപകനും 33 വര്‍ഷത്തോളം തലപ്പത്തിരുന്ന ആളുമായ ജെന്‍സന്‍ ഹുവാങ്ങിന്റെ രാജി വലിയ കോലാഹലങ്ങള്‍ക്കാണ് വഴിവെച്ചിരിക്കുന്നത്. വ്യക്തിപരമായ വിവാദങ്ങള്‍ക്ക് പുറമെ, അമേരിക്കയും ചൈനയും തമ്മിലുള്ള സാങ്കേതിക മത്സരത്തിലേക്കും ദേശീയ സുരക്ഷാ പ്രശ്‌നങ്ങളിലേക്കും ഈ വിഷയം വ്യാപിച്ചിരിക്കുകയാണ്. നൂതന പ്രൊസസ്സറുകള്‍ ചൈനയിലേക്ക് അനധികൃതമായി കടത്തിയതുമായി ബന്ധപ്പെട്ട് യു.എസ് അന്വേഷണം ശക്തമാക്കിയിട്ടുണ്ട്.
സിംഗപ്പൂര്‍ കേന്ദ്രീകരിച്ച് പ്രവര്‍ത്തിക്കുന്ന 'മെഗാസ്പീഡ്' എന്ന ഡാറ്റാ സെന്റര്‍ സ്ഥാപനത്തിലെ മുന്‍ എക്‌സിക്യൂട്ടീവായ ആലീസ് ഹുവാങ്ങുമായുള്ള ജെന്‍സന്‍ ഹുവാങ്ങിന്റെ ബന്ധം പുറത്തുവന്നതോടെയാണ് പ്രതിസന്ധി ആരംഭിച്ചത്. ചൈനീസ് സ്റ്റേറ്റ് സെക്യൂരിറ്റി മന്ത്രാലയവുമായി ബന്ധമുള്ള ഇവര്‍ ബെയ്ജിംഗിനായി പ്രവര്‍ത്തിക്കുന്നുവെന്ന് യു.എസ് രഹസ്യാന്വേഷണ ഏജന്‍സികള്‍ സംശയിക്കുന്നുണ്ട്. പുറമെ, എന്‍വിഡിയയുടെ ഹെല്‍ത്ത് കെയര്‍ വൈസ് പ്രസിഡന്റും തനിക്ക് കീഴില്‍ പ്രവര്‍ത്തിച്ചിരുന്നതുമായ കിംബെര്‍ലി പവലുമായുള്ള ബന്ധവും പുറത്തുവന്നു. തുടര്‍ന്ന് ജീവനക്കാര്‍ക്ക് അയച്ച കത്തിലൂടെ ഹുവാങ് തന്റെ അനൗദ്യോഗിക ബന്ധങ്ങള്‍ സമ്മതിക്കുകയും കുടുംബത്തോടും സഹപ്രവര്‍ത്തകരോടും മാപ്പ് ചോദിക്കുകയും ചെയ്തു.
ചൈനീസ് വിപണിയിലേക്ക് യു.എസ് ഏര്‍പ്പെടുത്തിയ നിയന്ത്രണങ്ങള്‍ മറികടന്ന് എന്‍വിഡിയയുടെ അത്യാധുനിക ചിപ്പുകള്‍ അനധികൃതമായി എത്തിയെന്ന ബ്ലൂംബെര്‍ഗിന്റെ വെളിപ്പെടുത്തലാണ് കേസിന്റെ ഗൗരവം വര്‍ദ്ധിപ്പിച്ചത്. എന്‍വിഡിയയുടെ ബിസിനസ്സ് പങ്കാളിയായ സിംഗപ്പൂരിലെ 'അബേരിയ ക്ലൗഡ് സര്‍വീസസ്' വഴി ആലീസ് ഹുവാങ്ങിന്റെ മെഗാസ്പീഡിലേക്ക് ചിപ്പുകള്‍ കൈമാറുകയും തുടര്‍ന്ന് ഷാങ്ഹായിലെ ഡാറ്റാ സെന്ററുകളില്‍ ഇവ ഉപയോഗിക്കുകയും ചെയ്തതായി റിപ്പോര്‍ട്ടുകള്‍ വ്യക്തമാക്കുന്നു.
മലേഷ്യയിലും സിംഗപ്പൂരിലും ഇതുമായി ബന്ധപ്പെട്ട അന്വേഷണങ്ങള്‍ പുരോഗമിക്കുകയാണ്. മെഗാസ്പീഡിന്റെ അനുബന്ധ സ്ഥാപനമായ 'സ്പീഡ് മാട്രിക്‌സ്' വഴി ഇറക്കുമതി ചെയ്ത ആര്‍ട്ടിഫിഷ്യല്‍ ഇന്റലിജന്‍സ് ചിപ്പുകള്‍ മറ്റ് രാജ്യങ്ങളിലേക്ക് കടത്തിയിട്ടുണ്ടോ എന്ന് മലേഷ്യന്‍ വ്യവസായ മന്ത്രാലയം പരിശോധിക്കുന്നുണ്ട്. സിംഗപ്പൂരില്‍ അന്വേഷണം നേരിടുന്ന ആലീസ് ഹുവാങ് ചാരവൃത്തി നടത്തിയതിന് തെളിവുകളില്ലെങ്കിലും, തെറ്റായ വിവരങ്ങള്‍ നല്‍കിയതിന് രാജ്യത്ത് പ്രവേശിക്കുന്നതില്‍ വിലക്കേര്‍പ്പെടുത്തിയിട്ടുണ്ട്.
രാഷ്ട്രീയ രംഗത്തും ഹുവാങ്ങിന്മേല്‍ സമ്മര്‍ദ്ദം ശക്തമാണ്. ഡിസംബര്‍ ഒന്നിന് യു.എസ് കോണ്‍ഗ്രസിന് മുമ്പാകെ ഹാജരായി വിശദീകരണം നല്‍കണമെന്ന് മൂന്ന് ഹൗസ് കമ്മിറ്റികള്‍ ആവശ്യപ്പെട്ടിട്ടുണ്ട്. സെനറ്റ് ബാങ്കിംഗ് കമ്മിറ്റി ചെയര്‍മാന്‍ ടിം സ്‌കോട്ടും ഹുവാങ്ങിനെയും കൊമേഴ്‌സ് സെക്രട്ടറി ഹോവാര്‍ഡ് ലാറ്റ്നിക്കിനെയും വിളിച്ചു വരുത്തുമെന്ന് മുന്നറിയിപ്പ് നല്‍കിയിട്ടുണ്ട്. യു.എസ് സാങ്കേതികവിദ്യ ചൈനയിലേക്ക് ചോരുന്നതില്‍ മേല്‍നോട്ടം വഹിക്കുന്നതിലെ വീഴ്ചകള്‍ ഇതിനിടെ ചോദ്യം ചെയ്യപ്പെടുന്നുണ്ട്. അതേസമയം, കയറ്റുമതി നിയന്ത്രണങ്ങള്‍ ദുരുപയോഗം ചെയ്യുന്നത് ആഗോള വിതരണ ശൃംഖലയെ തകര്‍ക്കുമെന്ന് ചൈന മുന്നറിയിപ്പ് നല്‍കി.
രാജി പ്രഖ്യാപനത്തിന് പിന്നാലെ എന്‍വിഡിയ ഓഹരികളില്‍ വന്‍ ഇടിവ് രേഖപ്പെടുത്തി. വ്യാപാരത്തിനിടെ 14 ശതമാനത്തോളം ഇടിഞ്ഞ ഓഹരികള്‍ പിന്നീട് 4.3 ശതമാനം നഷ്ടത്തോടെയാണ് ക്ലോസ് ചെയ്തത്. കഴിഞ്ഞ ഒക്ടോബറിലെ റെക്കോര്‍ഡ് ഉയരത്തില്‍നിന്ന് ഓഹരികള്‍ 30 ശതമാനത്തിലധികം ഇടിഞ്ഞിട്ടുണ്ട്. സ്ഥിരമായ ഒരു സി.ഇ.ഒയെ കണ്ടെത്തുന്നതുവരെ ഇടക്കാല സി.ഇ.ഒ കൊളറ്റ് ക്രിസ് കമ്പനിയുടെ പ്രവര്‍ത്തനങ്ങള്‍ക്ക് നേതൃത്വം നല്‍കും.
Related News
