ജിദ്ദ - മീഡിയവണ്‍ സൂപ്പര്‍ കപ്പ് 2025 ഫുട്‌ബോള്‍ മാമാങ്കത്തിന് വ്യാഴാഴ്ച പന്തുരുളും. 23, 24 തീയതികളില്‍ ജിദ്ദ ഒളിംപിക് വില്ലേജ് സ്റ്റേഡിയത്തില്‍ നടക്കുന്ന മത്സരങ്ങളില്‍ എട്ട് ടീമുകള്‍ മാറ്റുരക്കും. മത്സരങ്ങളുടെ ഫിക്‌സ്ചര്‍ റിലീസ് ചടങ്ങ് സീസണ്‍സ് ഓഡിറ്റോറിയത്തില്‍ ജിദ്ദ നാഷനല്‍ ഹോസ്പിറ്റല്‍ ഗ്രൂപ്പ് മാനേജിംഗ് ഡയറക്ടര്‍ വി.പി മുഹമ്മദാലി ഉദ്ഘാടനം ചെയ്തു.

23 ന് നടക്കുന്ന ആദ്യ മാച്ചില്‍ അല്‍ഗര്‍നി പ്ലാസ്റ്റിക്, വെല്‍കണക്ട് എഫ്.സിയെ നേരിടും. രണ്ടാമത്തെ മത്സരത്തില്‍ അബീര്‍ സലാമത്തക് എഫ്.സി, അറബ് ഡ്രീംസിനേയും മൂന്നാമത്തെ മാച്ചില്‍ റീം എഫ്.സി, ഡെക്‌സോപാക്കിനേയും നേരിടും. അല്‍ അംരി ഗ്രൂപ്പ് തബൂക്കും എച്ച്.എം.ആര്‍ എവര്‍ ഗ്രീനുമാണ് നാലാമത്തെ മാച്ചില്‍ ഏറ്റുമുട്ടുക.

24 വെള്ളിയാഴ്ച രണ്ട് സെമിഫൈനലുകളും ഫൈനലും അരങ്ങേറും. രണ്ടു ദിവസങ്ങളിലായി കുട്ടികളുടെ രണ്ട് സൗഹൃദ മത്സരങ്ങളും നടക്കും. നയന്‍സ് അടിസ്ഥാനത്തിലാണ് സൂപ്പര്‍ കപ്പ് മത്സരങ്ങള്‍. കുട്ടികളുടെ മത്സരങ്ങള്‍ ഇലവന്‍സ് അടിസ്ഥാനത്തിലായിരിക്കും.

ചടങ്ങില്‍ മീഡിയവണ്‍ സാരഥികളായ നജുമുദ്ദീന്‍, ഫസല്‍ മുഹമ്മദ്, സിഫ് സെക്രട്ടറി അബു കാട്ടൂപ്പാറ എന്നിവര്‍ ആശംസ നേര്‍ന്നു. മത്സരങ്ങളുടെ ചട്ടങ്ങളും നിബന്ധനകളും ടെക്‌നിക്കല്‍ കമ്മിറ്റി കണ്‍വീനര്‍ യൂസുഫലി കൂട്ടില്‍ വിശദീകരിച്ചു. തുടര്‍ന്ന് ട്രോഫി ലോഞ്ചിംഗ് അരങ്ങേറി. ജമാല്‍പാഷ, മിര്‍സ ശരീഫ് എന്നിവര്‍ ഗാനങ്ങള്‍ ആലപിച്ചു. ബഷീര്‍ ചുള്ളിയന്‍ അധ്യക്ഷത വഹിച്ചു. സൂപ്പര്‍ കപ്പ് ജനറല്‍ കണ്‍വീനര്‍ അബ്ഷീര്‍ സ്വാഗതവും മീഡിയവണ്‍ റിപ്പോര്‍ട്ടര്‍ സാബിത് നന്ദിയും പറഞ്ഞു.