തിരുവനന്തപുരം: തിരുവനന്തപുരം ലൈറ്റ് മെട്രോയുടെ ആദ്യ ഘട്ട അലൈന്മെന്റിന് മുഖ്യമന്ത്രിയുടെ അംഗീകാരമായി. കൊച്ചി മെട്രോ റെയില് ലിമിറ്റഡ് (കെഎംആര്എല്) മുഖേനയാണ് പദ്ധതി നടപ്പിലാക്കുക. ടെക്നോപാര്ക്കിന്റെ മൂന്ന് ഫേസുകള്, വിമാനത്താവളം, തമ്പാനൂര് ബസ് സ്റ്റാന്റ്, റെയില്വേ സ്റ്റേഷന്, സെക്രട്ടറിയേറ്റ്, മെഡിക്കല് കോളേജ്, എന്നിവ ബന്ധിപ്പിക്കുന്ന ആദ്യ ഘട്ട അലൈന്മെന്റാണ് അംഗീകരിച്ചത്.
പാപ്പനംകോട് നിന്ന് ആരംഭിച്ച് കിള്ളിപ്പാലം, പാളയം, ശ്രീകാര്യം, കഴക്കൂട്ടം, ടെക്നോപാര്ക്ക്, കൊച്ചുവേളി, വിമാനത്താവളം വഴി ഈഞ്ചക്കലില് അവസാനിക്കും. 31 കിലോമീറ്റര് ദൈര്ഘ്യമുള്ള പാതയില് 27 സ്റ്റേഷനുകള് ഉണ്ടായിരിക്കും. കഴക്കൂട്ടം/ടെക്നോപാര്ക്ക്/കാര്യവട്ടം എന്നിവയായിരിക്കും ഇന്റര്ചേഞ്ച് സ്റ്റേഷനുകള്.
തിരുവനന്തപുരം മെട്രോയുടെ മുന്നൊരുക്കത്തിന്റെ ഭാഗമായി ശ്രീകാര്യം, ഉള്ളൂര്, പട്ടം എന്നീ മേല്പ്പാലങ്ങളുടെ നിര്മ്മാണ ചുമതല കൊച്ചി മെട്രോ റെയില് ലിമിറ്റഡിനെ ഏല്പ്പിച്ചിരുന്നു.
മുന്പ് ലൈറ്റ് മെട്രോ ആയാണ് പദ്ധതി വിഭാവനം ചെയ്തിരുന്നത്. എന്നാല്, കൊച്ചി മെട്രോ റെയില് ലിമിറ്റഡ് നടത്തിയ സമഗ്ര മൊബിലിറ്റി പഠനത്തില് വളര്ന്നു വരുന്ന തിരുവനന്തപുരം നഗരത്തിന്റെ ഭാവി ഗതാഗത ആവശ്യങ്ങള് നിറവേറ്റാന് ലൈറ്റ് മെട്രോ മതിയാവില്ലെന്ന് കണ്ടെത്തുകയും, കൊച്ചിയിലേതിന് സമാനമായ പരമ്പരാഗത മെട്രോ സംവിധാനമാണ് ഏറ്റവും അനുയോജ്യമെന്ന് ശുപാര്ശ ചെയ്യുകയും ചെയ്തു. ഈ ശുപാര്ശയുടെ അടിസ്ഥാനത്തിലാണ് ഇപ്പോള് അംഗീകാരം നല്കിയിരിക്കുന്നത്.
മുഖ്യമന്ത്രിയുടെ അംഗീകാരത്തിന് പിന്നാലെ, അംഗീകരിച്ച അലൈന്മെന്റ് അനുസരിച്ച് വിശദമായ പദ്ധതി റിപ്പോര്ട്ട് തയ്യാറാക്കി കേന്ദ്ര സര്ക്കാരിന്റെ അന്തിമ അനുമതിക്കായി സമര്പ്പിക്കാനുള്ള നടപടികളിലേക്ക് കെഎംആര്എല് കടക്കും. മെട്രോയുടെ മുന്നൊരുക്കത്തിന്റെ ഭാഗമായി ശ്രീകാര്യം, ഉള്ളൂര്, പട്ടം എന്നിവിടങ്ങളിലെ മേല്പ്പാലങ്ങളുടെ നിര്മ്മാണ ചുമതല കെഎംആര്എലിനെ ഏല്പ്പിച്ചിരുന്നു. ഇതില് ശ്രീകാര്യം മേല്പ്പാലത്തിന്റെ നിര്മ്മാണം അതിവേഗം പുരോഗമിക്കുകയാണ്.
മെട്രോ യാഥാര്ത്ഥ്യമാകുന്നതോടെ തലസ്ഥാന നഗരത്തിന്റെ അടിസ്ഥാന സൗകര്യ വികസനത്തിനും നഗരവല്ക്കരണത്തിനും വലിയ ഉത്തേജനമാകും എന്നാണ് സര്ക്കാര് വിലയിരുത്തല്.
.jpg)
Related News
