ദമാം: സൗദി അറേബ്യന്‍ കായിക ഭൂപടത്തില്‍ ഒരു നാഴികക്കല്ലായി മാറാന്‍ പോകുന്ന ദമാം-അല്‍-കോബാറിലെ അത്യാധുനിക ഫുട്‌ബോള്‍ സ്റ്റേഡിയത്തിന്റെ നിര്‍മ്മാണ പ്രവര്‍ത്തനങ്ങള്‍ അതിവേഗം മുന്നേറുന്നു. സ്റ്റീല്‍ സ്ട്രക്ചര്‍ വര്‍ക്കുകള്‍ പൂര്‍ത്തിയായതോടെ പദ്ധതിയുടെ പ്രധാന ഘട്ടം പിന്നിട്ടിരിക്കുകയാണ്.

100 കോടി ഡോളര്‍ മുതല്‍മുടക്കില്‍ സൗദി അരാംകോയുടെ മേല്‍നോട്ടത്തിലാണ് ലോകോത്തര നിലവാരമുള്ള ഈ കായിക സമുച്ചയം യാഥാര്‍ത്ഥ്യമാകുന്നത്. ഈ സ്റ്റേഡിയം കേവലമൊരു ഫുട്‌ബോള്‍ വേദിയല്ല, മറിച്ച് സംയോജിതവും മള്‍ട്ടി-ഉപയോഗ സ്വഭാവമുള്ള ഒരു കായിക കേന്ദ്രമാണ്.

കാണികള്‍ക്ക് ചൂടേറിയ കാലാവസ്ഥയിലും സുഖകരമായ അനുഭവം നല്‍കുന്ന അതിനൂതന ശീതീകരണ സാങ്കേതികവിദ്യ, അതിഥികള്‍ക്കായി എല്ലാ സൗകര്യങ്ങളോടും കൂടിയ പ്രീമിയം ലോഞ്ചുകളും സ്യൂട്ടുകളും, അംഗപരിമിതര്‍ക്കുള്ള പ്രത്യേക സൗകര്യങ്ങള്‍, വിശാലമായ ഉദ്യാനം എന്നിവ സ്റ്റേഡിയത്തിന്റെ സവിശേഷതകളാണ്.

2027 ഏഷ്യാ കപ്പിനും 2034 ലോകകപ്പിനും വേദിയാകുന്ന 47,000 സീറ്റിംഗ് കപ്പാസിറ്റിയുള്ള ഈ സ്റ്റേഡിയം സൗദി അറേബ്യ ആതിഥേയത്വം വഹിക്കുന്ന പ്രധാന ടൂര്‍ണമെന്റുകള്‍ക്കെല്ലാം വേദിയാകും. നിര്‍മ്മാണം പൂര്‍ത്തിയാകുന്നതോടെ പ്രമുഖ ഫുട്‌ബോള്‍ ക്ലബ്ബായ അല്‍-ഖാദിസിയ ക്ലബ്ബിന്റെ ഹോം ഗ്രൗണ്ടായി ഇത് മാറും.


പദ്ധതി ലക്ഷ്യമിട്ട സമയപരിധിയില്‍ പൂര്‍ത്തിയാക്കാന്‍ 7,000-ത്തിലധികം തൊഴിലാളികളാണ് വ്യത്യസ്ത ഷിഫ്റ്റുകളിലായി 24 മണിക്കൂറും വിശ്രമമില്ലാതെ പ്രവര്‍ത്തിക്കുന്നത്. അടുത്ത വര്‍ഷം സ്റ്റേഡിയത്തിന്റെ നിര്‍മ്മാണം പൂര്‍ത്തിയാക്കാനാണ് ലക്ഷ്യമിടുന്നത്. ഗതാഗതം സുഗമമാക്കാന്‍ പ്രധാനപ്പെട്ട മൂന്ന് റോഡുകളില്‍ നിന്ന് സ്റ്റേഡിയത്തിലേക്ക് ഓവര്‍ബ്രിഡ്ജുകളും നടപ്പാതകളും നിര്‍മ്മിക്കുന്നുണ്ട്. ഇത് പൊതുജനങ്ങള്‍ക്കും ടീമുകള്‍ക്കും സുഗമമായ പ്രവേശനം ഉറപ്പാക്കും. ഈ ലോകോത്തര നിലവാരമുള്ള കായിക കേന്ദ്രം സൗദി അറേബ്യയുടെ കിഴക്കന്‍ പ്രവിശ്യയിലെ കായിക വികസനത്തിന് പുത്തന്‍ ഉണര്‍വ് നല്‍കും.