ആലപ്പുഴ: മാവേലിക്കര നഗരസഭയിലെ മുന്‍ കൗണ്‍സിലറെ ലഹരിക്കടിമയായ മകന്‍ കൊലപ്പെടുത്തി. മാവേലിക്കര ഉമ്പര്‍നാട് ഇട്ടിയപ്പന്‍വിള വൃന്ദാവന്‍ കനകമ്മ സോമരാജന്‍ (68) ആണ് കൊല്ലപ്പെട്ടത്. ഏക മകനെ പൊലീസ് കസ്റ്റഡിയില്‍ എടുത്തു. മകന്‍ ഉണ്ണി എന്നു വിൡക്കുന്ന കൃഷ്ണദാസിനെയാണ് പൊലീസ് കസ്റ്റഡിയിലെടുത്തത്. സ്വത്ത് സംബന്ധിച്ച തര്‍ക്കത്തില്‍ മകന്‍ അമ്മയെ വെട്ടിക്കൊലപ്പെടുത്തുകയായിരുന്നുവെന്നു സംശയിക്കുന്നു. കൊലപാതക വിവരം മകന്‍ തന്നെ പൊലീസില്‍ വിളിച്ചറിയിക്കുകയായിരുന്നു.

ലഹരിക്കടിമയായിരുന്ന കൃഷ്ണദാസ് ഡീ അഡിക്ഷന്‍ സെന്ററില്‍ ലഹരി മുക്ത ചികിത്സ കഴിഞ്ഞ് വീട്ടില്‍ എത്തിയതായിരുന്നു. വീട് വില്‍ക്കുന്നതിനെ ചൊല്ലി മാതാവുമായി സ്വത്ത് തര്‍ക്കമുള്ളതായി ബന്ധുക്കള്‍ പറയുന്നു. കൊല്ലപ്പെട്ട കനകമ്മ സോമരാജ് സി.പി.ഐ പ്രാദേശിക നേതാവായിരുന്നു. കൃഷ്ണദാസിനെ പൊലീസ് ചോദ്യം ചെയ്തു വരുന്നു.