ന്യൂഡല്‍ഹി: ഡല്‍ഹി കലാപ ഗൂഢാലോചനക്കേസില്‍ ജയിലില്‍ കഴിയുന്ന മുന്‍ ജെ.എന്‍.യു വിദ്യാര്‍ഥി നേതാക്കളായ ഉമര്‍ ഖാലിദിനും ഷര്‍ജീല്‍ ഇമാമിനും സുപ്രിം കോടതി ജാമ്യം നിഷേധിച്ചു. ജസ്റ്റിസുമാരായ അരവിന്ദ് കുമാര്‍, എന്‍.വി അന്‍ജാരിയാ എന്നിവരടങ്ങുന്ന ബെഞ്ചാണ് ഇവരുടെ ഹര്‍ജി തള്ളിയത്. അതേസമയം, കേസില്‍ പ്രതികളായ മറ്റ് അഞ്ചുപേര്‍ക്ക് കര്‍ശന വ്യവസ്ഥകളോടെ കോടതി ജാമ്യം അനുവദിച്ചു.

ഗുല്‍ഫിഷ ഫാത്തിമ, മീരാന്‍ ഹൈദര്‍, ഷിഫാഉര്‍റഹ്‌മാന്‍, മുഹമ്മദ് സലീം ഖാന്‍, ഷദാബ് അഹമ്മദ് എന്നിവര്‍ക്കാണ് ദീര്‍ഘകാലത്തെ ജയില്‍വാസത്തിന് ശേഷം കോടതി ജാമ്യം നല്‍കിയത്. ആകെ ഒമ്പത് പേരാണ് ജാമ്യാപേക്ഷ നല്‍കിയിരുന്നതെങ്കിലും ഇന്ന് ഏഴുപേരുടെ ഹര്‍ജിയിലാണ് വിധി വന്നത്. 12 ഓളം കര്‍ശന വ്യവസ്ഥകളാണ് ജാമ്യം ലഭിച്ചവര്‍ക്ക് കോടതി മുന്നോട്ടുവച്ചിരിക്കുന്നത്. വ്യവസ്ഥകള്‍ ലംഘിച്ചാല്‍ ജാമ്യം റദ്ദാക്കുമെന്നും കോടതി മുന്നറിയിപ്പ് നല്‍കി.

ഉമര്‍ ഖാലിദിനും ഷര്‍ജീല്‍ ഇമാമിനും കുറ്റകൃത്യത്തില്‍ പങ്കുള്ളതായി പ്രഥമദൃഷ്ട്യാ തോന്നുന്നുണ്ടെന്ന ഡല്‍ഹി പോലീസിന്റെ വാദം കോടതി അംഗീകരിച്ചു. അഞ്ച് വര്‍ഷമായി വിചാരണ തുടങ്ങിയിട്ടില്ല എന്നത് മാത്രം ജാമ്യം അനുവദിക്കാനുള്ള കാരണമായി കാണാന്‍ കഴിയില്ലെന്ന് കോടതി വ്യക്തമാക്കി. ഡല്‍ഹി ഹൈക്കോടതിയുടെ മുന്‍ വിധി ശരിവെച്ചുകൊണ്ടായിരുന്നു സുപ്രിം കോടതിയുടെ നടപടി.

ഉമര്‍ ഖാലിദിനും ഷര്‍ജീലിനും ഒരു വര്‍ഷത്തിന് ശേഷം വീണ്ടും ജാമ്യാപേക്ഷയുമായി കോടതിയെ സമീപിക്കാമെന്ന് ബെഞ്ച് അറിയിച്ചു. കൂടാതെ വിചാരണ നടപടികള്‍ വേഗത്തിലാക്കണമെന്നും കോടതി നിര്‍ദേശിച്ചു.

2020 സെപ്റ്റംബര്‍ മുതല്‍ ജയിലില്‍ കഴിയുന്ന പ്രതികള്‍ക്ക് വേണ്ടി മുതിര്‍ന്ന അഭിഭാഷകരായ കപില്‍ സിബല്‍, അഭിഷേക് മനു സിങ്വി എന്നിവരാണ് കോടതിയില്‍ ഹാജരായത്. സാധാരണ പ്രതിഷേധം മാത്രമാണ് തങ്ങള്‍ നടത്തിയതെന്നും ഡല്‍ഹി പോലീസ് ആരോപിക്കുന്ന തരത്തിലുള്ള ഗൂഢാലോചന നടന്നിട്ടില്ലെന്നും പ്രതിഭാഗം വാദിച്ചു. എന്നാല്‍, കലാപം മുന്‍കൂട്ടി ആസൂത്രണം ചെയ്തതാണെന്ന കണ്ടെത്തലില്‍ കോടതി ഉറച്ചുനിന്നു. 2020ല്‍ പൗരത്വ ഭേദഗതി നിയമത്തിനെതിരായ പ്രതിഷേധങ്ങള്‍ക്കു പിന്നാലെ നടന്ന കലാപത്തില്‍ ഗൂഢാലോചന നടത്തിയെന്ന കുറ്റം ചുമത്തിയാണ് ഡല്‍ഹി പൊലീസ് ഉമര്‍ ഖാലിദിനെയും ഷര്‍ജീല്‍ ഇമാമിനെയും അറസ്റ്റ് ചെയ്ത് യുഎപിഎ ചുമത്തിയത്. ഇരുവരുടെയും ജാമ്യാപേക്ഷ 2022 മുതല്‍ കോടതിയിലാണ്.

നേരത്തെ, സഹോദരിയുടെ വിവാഹത്തില്‍ പങ്കെടുക്കുന്നതിനായി ഡിസംബര്‍ 11ന് ഉമര്‍ ഖാലിദിന് കര്‍ക്കദൂമ കോടതി ഇടക്കാല ജാമ്യം അനുവദിച്ചിരുന്നു. യു.എ.പി.എ ഉള്‍പ്പെടെയുള്ള കടുത്ത നിയമങ്ങള്‍ ചുമത്തപ്പെട്ട ഈ കേസില്‍ അഞ്ചുപേര്‍ക്ക് ജാമ്യം ലഭിച്ചത് നിയമവൃത്തങ്ങളില്‍ നിര്‍ണ്ണായകമായാണ് വിലയിരുത്തപ്പെടുന്നത്.