റിയാദ്: അത്യാധുനിക ഫുട്‌ബോള്‍ ഗവേഷണങ്ങള്‍ പ്രോത്സാഹിപ്പിക്കുന്നതിനായി സൗദി അറേബ്യയിലെ കിംഗ് അബ്ദുള്ള യൂണിവേഴ്‌സിറ്റി ഓഫ് സയന്‍സ് ആന്‍ഡ് ടെക്‌നോളജിയെ (കൗസ്റ്റ്) തങ്ങളുടെ ഔദ്യോഗിക ഗവേഷണ സ്ഥാപനമായി ഫിഫ തിരഞ്ഞെടുത്തു. പശ്ചിമേഷ്യയില്‍ നിന്നും ഏഷ്യയില്‍ നിന്നും ഈ പദവി ലഭിക്കുന്ന ആദ്യ സ്ഥാപനമാണ് കൗസ്റ്റ് എന്ന് സൗദി പ്രസ് ഏജന്‍സി റിപ്പോര്‍ട്ട് ചെയ്തു. ലോകത്തെ അഞ്ചാമത്തെ ഫിഫ ഗവേഷണ കേന്ദ്രമായാണ് കൗസ്റ്റ് അംഗീകരിക്കപ്പെട്ടിരിക്കുന്നത്.

കായികരംഗത്തെ അക്കാദമിക് ഗവേഷണങ്ങളുമായും വ്യവസായവുമായും ബന്ധിപ്പിക്കുന്നതില്‍ കൗസ്റ്റ് നടത്തുന്ന മികച്ച പ്രവര്‍ത്തനങ്ങള്‍ക്കുള്ള അംഗീകാരമാണിതെന്ന് സര്‍വകലാശാല പ്രസിഡന്റ് പ്രൊഫ. സര്‍ എഡ്വേര്‍ഡ് ബേണ്‍ പറഞ്ഞു. സൗദി വിഷന്‍ 2030-ന്റെ ഭാഗമായി കായിക മേഖലയില്‍ സുസ്ഥിരതയും നവീനതയും കൊണ്ടുവരാനുള്ള രാജ്യത്തിന്റെ ശ്രമങ്ങള്‍ക്ക് ഇത് വലിയ കരുത്ത് പകരും. നിര്‍മ്മിത ബുദ്ധി ഉപയോഗിച്ചുള്ള അത്യാധുനിക പഠനങ്ങളാണ് ഈ സഹകരണത്തിലൂടെ പ്രധാനമായും ലക്ഷ്യമിടുന്നത്.

ഫിഫയുമായുള്ള ഈ പങ്കാളിത്തത്തിലെ ആദ്യ പദ്ധതി പഴയ ലോകകപ്പ് മത്സരങ്ങളുടെ ദൃശ്യങ്ങള്‍ ആധുനിക എഐ അല്‍ഗോരിതം ഉപയോഗിച്ച് വിശകലനം ചെയ്യുക എന്നതാണ്. പതിറ്റാണ്ടുകളായുള്ള മത്സര വീഡിയോകളെ കൃത്യമായ ഡാറ്റയാക്കി മാറ്റുന്നതിലൂടെ ഫുട്‌ബോളിന്റെ വളര്‍ച്ചയെക്കുറിച്ച് ആഴത്തില്‍ പഠിക്കാന്‍ സാധിക്കും. കൂടാതെ, ഖത്തര്‍ ലോകകപ്പിലെയും വനിതാ ലോകകപ്പിലെയും കളിക്കാരുടെ നീക്കങ്ങളും പന്തിന്റെ ഗതിയും നിരീക്ഷിച്ചുള്ള വിവരങ്ങള്‍ ശേഖരിച്ച് കളിക്കാരുടെ പ്രകടനം മെച്ചപ്പെടുത്തുന്നതിനുള്ള വിശകലനങ്ങളും പദ്ധതിയുടെ ഭാഗമായി നടക്കും.