ജിദ്ദ : ഫോര്മുല ഇ-പ്രി അഞ്ചാം റൗണ്ടിന്റെ സെമി ഫൈനല് മത്സരം ചെങ്കടല് തീരത്തെ പുളകം കൊള്ളിച്ചു. സൗദികളും വിദേശികളുമായ ആയിരക്കണക്കിന് കാറോട്ട തല്പരര് ശനിയാഴ്ച സായാഹ്നത്തില് ജിദ്ദയില് ജനസാഗരം തീര്ത്തു. ഇന്ത്യക്ക് അഭിമാനമായി ടാറ്റാ കണ്സള്ട്ടന്സി സര്വീസിന്റെ വിജയക്കൊടി നാട്ടി ജാഗ്വാര് വിജയക്കുതിപ്പ് നടത്തി.
ഫോര്മുല ഇ. അഞ്ചാം റൗണ്ടില് അന്റോണിയോ ഫെലിക്സ് ഡി കോസ്റ്റയും അദ്ദേഹത്തിന്റെ ടീമായ ജാഗ്വാര് ടി.സി.എസ് റേസിംഗുമാണ് വിസ്മയകരമായ വിജയം കൈവരിച്ചത്. പോര്ട്ടുഗല് താരം ഡികോസ്റ്റ ഒന്നാമനായി തന്റെ ജാഗ്വാറുമായി ഫിനിഷ് ചെയ്തപ്പോള്, സെബാസ്റ്റ്യന് ബ്യൂമി രണ്ടാമതായും നിലവിലെ ചാമ്പ്യന് ഒലിവര് റൗലാന്ഡ് മൂന്നാമതായും എത്തി പോഡിയം പൂര്ത്തിയാക്കി. ഇനി വിവിധ ലോകനഗരങ്ങളില് തുടര്ന്നുള്ള അവസാന ഘട്ട മത്സരങ്ങളും ലണ്ടനില് ഫൈനല് മത്സരവും നടക്കും.
ജാഗ്വാര് ടീമിനൊപ്പമുള്ള ഡി കോസ്റ്റയുടെ ആദ്യ വിജയമാണിത്. ടീമിന്റെ മികച്ച റേസ് സ്ട്രാറ്റജിയാണ് ഈ വിജയത്തിന് പിന്നില് പ്രവര്ത്തിച്ചതെന്ന് വിലയിരുത്തപ്പെട്ടു. ഇലക്ട്രിക് സിംഗിള് സീറ്റര് മത്സര ഇനത്തില് ഇരുപത് ടീമുകളാണ് മാറ്റുരച്ചത്. മുപ്പത് റൗണ്ടുകളായിരുന്നു ദൂരം. ഇ -പ്രിയ്ക്ക് ആവേശം പകര്ന്ന് ജിദ്ദ കോര്ണിഷില് വിഖ്യാത ഗായകര് പങ്കെടുത്ത ഗാനമേളയും മറ്റ് കലാപരിപാടികളും അരങ്ങേറി. നഗരത്തെ വര്ണാഭമാക്കിയ കരിമരുന്ന് പ്രയോഗത്തോടെയാണ് ഫോര്മുല -ഇയ്ക്ക് സമാപനമായത്.
പടം : ഫോര്മുല -ഇ സെമിഫൈനല് വിജയി ജാഗ്വാര് ഇലക്ട്രിക് കാറോടിച്ച അന്റോണിയോ ഫെലിക്സ് ഡി കോസ്റ്റ.
