റിയാദ്: വിശുദ്ധ റമദാന്‍ വ്രതാരംഭത്തോടനുബന്ധിച്ച് സൗദി ഭരണാധികാരി സല്‍മാന്‍ രാജാവിനും കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരനും വിവിധ ഇസ്ലാമിക രാഷ്ട്രത്തലവന്മാരില്‍ നിന്ന് ആശംസകള്‍ പ്രവഹിക്കുന്നു. ചൊവ്വാഴ്ച വൈകുന്നേരം മാസപ്പിറവി ദൃശ്യമായതോടെ ബുധനാഴ്ച വ്രതാരംഭമായിരിക്കുമെന്ന് സൗദി സുപ്രീം കോടതി പ്രഖ്യാപിച്ചിരുന്നു. ഇതിന് പിന്നാലെയാണ് ലോകനേതാക്കള്‍ സൗദി ഭരണകൂടത്തെയും ജനങ്ങളെയും ആശംസകള്‍ അറിയിച്ചതെന്ന് സൗദി പ്രസ് ഏജന്‍സി റിപ്പോര്‍ട്ട് ചെയ്തു.

ഇസ്ലാമിക രാജ്യങ്ങളിലെ ഭരണാധികാരികള്‍ സന്ദേശങ്ങളിലൂടെയും ഫോണ്‍ കോളുകളിലൂടെയും റമദാന്‍ ആശംസകള്‍ നേര്‍ന്നു. ലോകനേതാക്കളുടെ സ്‌നേഹത്തിനും പ്രാര്‍ത്ഥനയ്ക്കും സല്‍മാന്‍ രാജാവും കിരീടാവകാശിയും നന്ദി അറിയിച്ച് മറുപടി നല്‍കി. വരാനിരിക്കുന്ന പുണ്യമാസം ഇസ്ലാമിക ലോകത്തിന് നന്മയും അനുഗ്രഹവും സമാധാനവും സുസ്ഥിരതയും നല്‍കട്ടെ എന്ന് ഭരണാധികാരികള്‍ പ്രത്യാശ പ്രകടിപ്പിച്ചു.

സൗദിയിലെമ്പാടും ബുധനാഴ്ച പുലര്‍ച്ചെ മുതല്‍ വിശ്വാസികള്‍ വ്രതാനുഷ്ഠാനത്തിലേക്ക് കടന്നതോടെ പുണ്യമാസത്തിന്റെ സുകൃതത്തിലേക്ക് ലോകമെമ്പാടുമുള്ള മുസ്ലിം ഉമ്മത്തും ചേരുകയാണ്.