റിയാദ്: പൊതുജനാരോഗ്യം സംരക്ഷിക്കുന്നതിനും ഭക്ഷ്യസുരക്ഷാ മാനദണ്ഡങ്ങള്‍ കര്‍ശനമാക്കുന്നതിനുമായി ഇന്ത്യയുള്‍പ്പെടെ 40 രാജ്യങ്ങളില്‍ നിന്നുള്ള കോഴിയിറച്ചി, മുട്ട എന്നിവയുടെ ഇറക്കുമതിക്ക് സൗദി ഫുഡ് ആന്‍ഡ് ഡ്രഗ് അതോറിറ്റി (SFDA) സമ്പൂര്‍ണ്ണ നിരോധനം ഏര്‍പ്പെടുത്തി. കൂടാതെ, മറ്റ് 16 രാജ്യങ്ങളിലെ ചില പ്രവിശ്യകളില്‍ നിന്നും നഗരങ്ങളില്‍ നിന്നും ഭാഗിക നിരോധനവും ഏര്‍പ്പെടുത്തിയിട്ടുണ്ട്.

ലോകമെമ്പാടും പടര്‍ന്നുപിടിക്കുന്ന പക്ഷപ്പനി പോലുള്ള രോഗങ്ങളുടെ വ്യാപനം കണക്കിലെടുത്താണ് ഈ മുന്‍കരുതല്‍ നടപടി. അന്താരാഷ്ട്ര റിപ്പോര്‍ട്ടുകളുടെയും ആരോഗ്യ സാഹചര്യങ്ങളുടെയും അടിസ്ഥാനത്തില്‍ 2004 മുതല്‍ വിവിധ ഘട്ടങ്ങളിലായാണ് ഈ രാജ്യങ്ങളെ പട്ടികയില്‍ ഉള്‍പ്പെടുത്തിയത്.

നിരോധനം ഏര്‍പ്പെടുത്തിയ പ്രധാന രാജ്യങ്ങള്‍:
ഇന്ത്യ, അഫ്ഗാനിസ്ഥാന്‍, ജര്‍മ്മനി, ഇന്തോനേഷ്യ, ഇറാന്‍, ചൈന, ഇറാഖ്, ദക്ഷിണ കൊറിയ, വടക്കന്‍ കൊറിയ, യുണൈറ്റഡ് കിംഗ്ഡം (യുകെ), ഈജിപ്ത്, മെക്‌സിക്കോ, ജപ്പാന്‍ തുടങ്ങിയ 40 രാജ്യങ്ങള്‍ക്കാണ് സമ്പൂര്‍ണ്ണ നിരോധനം.

കൂടാതെ അമേരിക്ക, ഓസ്ട്രേലിയ, ഇറ്റലി, ഫ്രാന്‍സ്, കാനഡ, മലേഷ്യ തുടങ്ങി 16 രാജ്യങ്ങളില്‍ ഭാഗിക നിരോധനവുമുണ്ട്. ആഗോള ആരോഗ്യ സാഹചര്യങ്ങള്‍ക്കനുസരിച്ച് ഈ പട്ടികയില്‍ കൃത്യമായ ഇടവേളകളില്‍ മാറ്റം വരുത്തുമെന്ന് അതോറിറ്റി വ്യക്തമാക്കി.

ചില പ്രത്യേക നിബന്ധനകളോടെ ഇറക്കുമതിക്ക് ഇളവുകള്‍ അനുവദിച്ചിട്ടുണ്ട്. ന്യൂകാസില്‍ ഡിസീസ് വൈറസിനെ നശിപ്പിക്കാന്‍ ആവശ്യമായ രീതിയില്‍ താപ സംസ്‌കരണമോ മറ്റ് പ്രോസസിംഗോ നടത്തിയ ഉല്‍പ്പന്നങ്ങള്‍ക്ക് നിരോധനത്തില്‍ ഇളവുണ്ട്. ഉല്‍പ്പന്നങ്ങള്‍ മതിയായ രീതിയില്‍ സംസ്‌കരിച്ചതാണെന്ന് തെളിയിക്കുന്ന ഒറിജിനല്‍ രാജ്യത്തെ ഔദ്യോഗിക അതോറിറ്റിയുടെ സര്‍ട്ടിഫിക്കറ്റ് ഹാജരാക്കണം. അതോറിറ്റി അംഗീകരിച്ച സ്ഥാപനങ്ങളില്‍ നിന്നുള്ള ഉല്‍പ്പന്നങ്ങള്‍ മാത്രമായിരിക്കണം ഇവ.

ഭക്ഷ്യവിപണിയിലെ സുരക്ഷ ഉറപ്പാക്കാന്‍ വിട്ടുവീഴ്ചയില്ലാത്ത നിരീക്ഷണമാണ് സൗദി ഭരണകൂടം നടത്തിവരുന്നത്.