റിയാദ്: യുണൈറ്റഡ് അറബ് എമിറേറ്റ്സ് (UAE), ബഹ്റൈന്, ഖത്തര്, കുവൈറ്റ്, ജോര്ദാന് എന്നീ രാജ്യങ്ങളുടെ പരമാധികാരത്തിന് മേല് ഇറാന് നടത്തുന്ന കടന്നുകയറ്റത്തെ ശക്തമായ ഭാഷയില് അപലപിച്ച് സൗദി അറേബ്യ. ഇറാന്റെ നടപടി അന്താരാഷ്ട്ര നിയമങ്ങളുടെ നഗ്നമായ ലംഘനമാണെന്ന് സൗദി വിദേശകാര്യ മന്ത്രാലയം പുറത്തിറക്കിയ പ്രസ്താവനയില് വ്യക്തമാക്കി.
ഇറാന്റെ ഭാഗത്തുനിന്നുണ്ടായ ആക്രമണങ്ങളെ നേരിടാന് സഹോദര രാജ്യങ്ങളായ യുഎഇ, ബഹ്റൈന്, ഖത്തര്, കുവൈറ്റ്, ജോര്ദാന് എന്നിവര്ക്ക് സൗദി അറേബ്യ പൂര്ണ്ണ ഐക്യദാര്ഢ്യം പ്രഖ്യാപിച്ചു. ഈ രാജ്യങ്ങളുടെ സുരക്ഷയ്ക്കായി സൗദിയുടെ എല്ലാ സജ്ജീകരണങ്ങളും വിഭവങ്ങളും വിട്ടുനല്കാന് തയ്യാറാണെന്ന് മന്ത്രാലയം അറിയിച്ചു.
ഇറാന്റെ ഇത്തരം നടപടികള് പശ്ചിമേഷ്യയുടെ സുരക്ഷയെയും സ്ഥിരതയെയും അപകടത്തിലാക്കുന്നു. ഇതിന്റെ പ്രത്യാഘാതങ്ങള് ഗുരുതരമായിരിക്കുമെന്ന് സൗദി മുന്നറിയിപ്പ് നല്കി. സമാധാന അന്തരീക്ഷം തകര്ക്കുന്ന ഇറാന്റെ നീക്കങ്ങളെ അപലപിക്കാനും ശക്തമായ നടപടികള് സ്വീകരിക്കാനും രാജ്യാന്തര സമൂഹത്തോട് സൗദി അറേബ്യ ആഹ്വാനം ചെയ്തു.
ഫോട്ടോ: ഇറാന് ബഹറൈനുനേരെ നടത്തിയ ആക്രമണം.
Related News
