ദുബായ്: പശ്ചിമേഷ്യയില്‍ നിലനില്‍ക്കുന്ന കടുത്ത സുരക്ഷാ വെല്ലുവിളികളുടെ പശ്ചാത്തലത്തില്‍ യുണൈറ്റഡ് അറബ് എമിറേറ്റ്സ് (യുഎഇ) വ്യോമപാത താല്‍ക്കാലികമായി അടച്ചു. ഇതേത്തുടര്‍ന്ന് രാജ്യത്തെ എല്ലാ പ്രധാന വിമാനത്താവളങ്ങളുടെയും പ്രവര്‍ത്തനം തിങ്കളാഴ്ച മുതല്‍ നിര്‍ത്തിവെച്ചതായി ജനറല്‍ സിവില്‍ ഏവിയേഷന്‍ അതോറിറ്റി (GCAA) അറിയിച്ചു. യാത്രാ സുരക്ഷയും വ്യോമപാതയുടെ സംരക്ഷണവും മുന്‍നിര്‍ത്തിയാണ് ഈ അടിയന്തര നടപടി.

ദുബായ് ഇന്റര്‍നാഷണല്‍ എയര്‍പോര്‍ട്ട് , അല്‍ മക്തൂം , അബുദാബി സായിദ് ഇന്റര്‍നാഷണല്‍ എയര്‍പോര്‍ട്ട്, ഷാര്‍ജ ഇന്റര്‍നാഷണല്‍ എയര്‍പോര്‍ട്ട് എന്നിവിടങ്ങളില്‍ നിന്നുള്ള സര്‍വീസുകള്‍ പൂര്‍ണ്ണമായും നിര്‍ത്തിവെച്ചു. വിമാനത്താവളങ്ങളിലേക്ക് യാത്രക്കാര്‍ വരരുതെന്ന് അധികൃതര്‍ കര്‍ശന നിര്‍ദ്ദേശം നല്‍കിയിട്ടുണ്ട്.

എമിറേറ്റ്സ്: മാര്‍ച്ച് 3 ചൊവ്വാഴ്ച ഉച്ചയ്ക്ക് 3 മണി വരെ എല്ലാ സര്‍വീസുകളും റദ്ദാക്കി.

ഫ്‌ലൈ ദുബായ്: മാര്‍ച്ച് 3 ഉച്ചയ്ക്ക് 3 മണി വരെ സര്‍വീസുകള്‍ ഉണ്ടാകില്ല.

എയര്‍ അറേബ്യ: മാര്‍ച്ച് 3 ഉച്ചയ്ക്ക് 3 മണി വരെ യുഎഇ സര്‍വീസുകളും, മാര്‍ച്ച് 4 വരെ ലെബനന്‍, ജോര്‍ദാന്‍, സിറിയ, ഇറാഖ് സര്‍വീസുകളും നിര്‍ത്തിവെച്ചു.

ഇത്തിഹാദ് എയര്‍വേയ്സ്: തിങ്കളാഴ്ച ഉച്ചയ്ക്ക് 2 മണി വരെ സര്‍വീസുകള്‍ നിര്‍ത്തിവെച്ചു.

എയര്‍ ഇന്ത്യ, എയര്‍ ഇന്ത്യ എക്‌സ്പ്രസ്, ഇന്‍ഡിഗോ തുടങ്ങിയ ഇന്ത്യന്‍ വിമാനക്കമ്പനികളും പാകിസ്ഥാന്‍ ഇന്റര്‍നാഷണല്‍ എയര്‍ലൈന്‍സും സര്‍വീസുകള്‍ റദ്ദാക്കുകയോ വഴിതിരിച്ചുവിടുകയോ ചെയ്തിട്ടുണ്ട്.

വിമാനത്താവളങ്ങളില്‍ കുടുങ്ങിയ ട്രാന്‍സിറ്റ് യാത്രക്കാരുടെ താമസം, ഭക്ഷണം ഉള്‍പ്പെടെയുള്ള മുഴുവന്‍ ചിലവുകളും യുഎഇ സര്‍ക്കാര്‍ വഹിക്കുമെന്ന് സിവില്‍ ഏവിയേഷന്‍ അതോറിറ്റി അറിയിച്ചു. ഏകദേശം 20,200 യാത്രക്കാരെയാണ് ഇതുവരെ ഇത്തരത്തില്‍ സുരക്ഷിതമായി മാറ്റിപ്പാര്‍പ്പിച്ചത്.

യാത്രക്കാര്‍ക്ക് ടിക്കറ്റ് തുക തിരികെ ലഭിക്കുന്നതിനോ മറ്റൊരു ദിവസത്തേക്ക് യാത്ര മാറ്റുന്നതിനോ സൗകര്യമുണ്ടാകും. ഇതിനായി അതത് വിമാനക്കമ്പനികളുടെ വെബ്‌സൈറ്റോ ട്രാവല്‍ ഏജന്റുകളെയോ ബന്ധപ്പെടണം.