ദുബായ്- യുഎഇക്ക് നേരെ ഇന്നുണ്ടായ 3 ബാലിസ്റ്റിക് മിസൈലുകളെയും 129 ഡ്രോണുകളെയും പ്രതിരോധ സേന വിജയകരമായി നേരിട്ടതായി യുഎഇ പ്രതിരോധ മന്ത്രാലയം അറിയിച്ചു. ഇതില്‍ 121 ഡ്രോണുകള്‍ തകര്‍ക്കപ്പെട്ടു, 8 എണ്ണം രാജ്യത്തിന്റെ വിവിധ ഭാഗങ്ങളില്‍ പതിച്ചു. ഇറാന്‍ നടത്തുന്ന നഗ്‌നമായ അധിനിവേശം ആരംഭിച്ചത് മുതല്‍ ഇതുവരെ രാജ്യത്തിന് നേരെ വിക്ഷേപിച്ച 189 ബാലിസ്റ്റിക് മിസൈലുകളില്‍ 175 എണ്ണവും തകര്‍ക്കാന്‍ സാധിച്ചു. 13 എണ്ണം കടലിലും ഒന്ന് കരയിലുമാണ് പതിച്ചത്. കൂടാതെ 941 ഇറാനിയന്‍ ഡ്രോണുകളില്‍ 876 എണ്ണവും തടഞ്ഞുനിര്‍ത്തി, 65 എണ്ണം രാജ്യത്തിനുള്ളില്‍ പതിച്ചു. ഇതിനിടെ 8 ക്രൂസ് മിസൈലുകള്‍ കണ്ടെത്തുകയും നശിപ്പിക്കുകയും ചെയ്തിട്ടുണ്ട്, ഇത് ചില നാശനഷ്ടങ്ങള്‍ക്ക് കാരണമായി.

ഈ ആക്രമണങ്ങള്‍ക്കിടെ പാകിസ്ഥാന്‍, നേപ്പാള്‍, ബംഗ്ലാദേശ് സ്വദേശികളായ മൂന്ന് പേര്‍ മരണപ്പെടുകയും യുഎഇ, ഇന്ത്യ, ഈജിപ്ത്, ഫിലിപ്പീന്‍സ് തുടങ്ങി വിവിധ രാജ്യക്കാരായ 78 പേര്‍ക്ക് നിസാര പരിക്കുകള്‍ ഏല്‍ക്കുകയും ചെയ്തിട്ടുണ്ട്. രാജ്യത്തിന്റെ വിവിധ ഭാഗങ്ങളില്‍ കേട്ട സ്‌ഫോടന ശബ്ദങ്ങള്‍ വ്യോമ പ്രതിരോധ സംവിധാനങ്ങള്‍ മിസൈലുകളെയും ഡ്രോണുകളെയും തകര്‍ക്കുന്നതിന്റേതാണെന്ന് മന്ത്രാലയം സ്ഥിരീകരിച്ചു. ആക്രമണങ്ങള്‍ മൂലം ചില സിവിലിയന്‍ സ്വത്തുക്കള്‍ക്ക് ചെറുതും ഇടത്തരവുമായ നാശനഷ്ടങ്ങള്‍ സംഭവിച്ചിട്ടുണ്ട്.