ദുബായ്- ഫെബ്രുവരി 28-ന് ഇറാനുനേരെ ഉണ്ടായ യുഎസ്-ഇസ്രായേല്‍ ആക്രമണങ്ങള്‍ക്ക് മറുപടിയായി ഹോര്‍മുസ് കടലിടുക്ക് ഇറാന്‍ അടച്ചതിനെത്തുടര്‍ന്ന്, മേഖലയില്‍ പത്തോളം കപ്പലുകള്‍ ആക്രമിക്കപ്പെട്ടതായി ഡാറ്റാ അനാലിസിസ് ഗ്രൂപ്പുകള്‍ റിപ്പോര്‍ട്ട് ചെയ്യുന്നു. ലോകത്തിലെ എണ്ണ വ്യാപാരത്തിന്റെ 20 ശതമാനവും കടന്നുപോകുന്ന ഈ സുപ്രധാന പാതയിലെ കപ്പല്‍ ഗതാഗതം ഇതോടെ ഏതാണ്ട് പൂര്‍ണ്ണമായും നിലച്ച മട്ടാണ്. കെപ്ലര്‍ എന്ന അനലിറ്റിക്‌സ് സ്ഥാപനത്തിന്റെ കണക്കനുസരിച്ച്, ഒരാഴ്ചയ്ക്കുള്ളില്‍ ഓയില്‍ ടാങ്കറുകളുടെ എണ്ണത്തില്‍ 90 ശതമാനം കുറവുണ്ടായി.

കഴിഞ്ഞ ഒരാഴ്ചക്കിടെയുണ്ടായ ഒമ്പത് ആക്രമണങ്ങളില്‍ നാലെണ്ണത്തിലായി ഏഴ് പേര്‍ കൊല്ലപ്പെട്ടതായി അന്താരാഷ്ട്ര മാരിടൈം ഓര്‍ഗനൈസേഷന്‍ സ്ഥിരീകരിച്ചു. മാര്‍ച്ച് 2-ന് സ്‌കൈലൈറ്റ്, എംകെഡി ഫിയം, സ്റ്റെന ഇംപെറേറ്റീവ് എന്നീ കപ്പലുകള്‍ക്ക് നേരെ നടന്ന ആക്രമണങ്ങളില്‍ ഓരോ മരണം വീതം റിപ്പോര്‍ട്ട് ചെയ്തിട്ടുണ്ട്. മാര്‍ച്ച് 6-ന് 'മുസഫ 2' എന്ന കപ്പലിന് നേരെ നടന്ന ആക്രമണത്തിലാണ് നാല് പേര്‍ കൊല്ലപ്പെട്ടത്. ഈ കപ്പല്‍ രണ്ട് ദിവസത്തിന് ശേഷം മുങ്ങിയതായും മൂന്ന് ഇന്തോനേഷ്യന്‍ ജീവനക്കാരെ കാണാതായതായും ജക്കാര്‍ത്ത സ്ഥിരീകരിച്ചു.

നേരത്തെ ആക്രമിക്കപ്പെട്ട കപ്പലുകളെ സഹായിക്കാന്‍ എത്തുന്ന രക്ഷാപ്രവര്‍ത്തന കപ്പലുകളെപ്പോലും ലക്ഷ്യം വെക്കുന്ന അപകടകരമായ രീതിയാണ് ഇപ്പോള്‍ കണ്ടുവരുന്നതെന്ന് വെസ്റ്റേണ്‍ മാരിടൈം അലയന്‍സ് അറിയിച്ചു. കപ്പലുകള്‍ മുക്കുന്നതിനേക്കാള്‍, വാണിജ്യ ഗതാഗതം തടസ്സപ്പെടുത്തുകയും ഭീതി പടര്‍ത്തുകയും ചെയ്യുക എന്ന ലക്ഷ്യത്തോടെയാണ് ഇറാന്റെ റെവല്യൂഷണറി ഗാര്‍ഡ് ഡ്രോണ്‍, മിസൈല്‍ ആക്രമണങ്ങള്‍ നടത്തുന്നതെന്ന് നിരീക്ഷകര്‍ കരുതുന്നു. എന്നാല്‍ കടലിടുക്ക് അടയ്ക്കുന്ന കാര്യത്തില്‍ ഇറാനില്‍ നിന്ന് വിരുദ്ധമായ സന്ദേശങ്ങളാണ് വരുന്നത്; എല്ലാ എണ്ണക്കപ്പലുകളും കത്തിക്കുമെന്ന് സൈനിക ഉപദേഷ്ടാവ് മുന്നറിയിപ്പ് നല്‍കിയപ്പോള്‍, കടലിടുക്ക് അടയ്ക്കാന്‍ ഉദ്ദേശമില്ലെന്നാണ് വിദേശകാര്യ മന്ത്രി വ്യക്തമാക്കിയത്.

മേഖലയിലെ സുരക്ഷ ഉറപ്പാക്കാന്‍ അന്താരാഷ്ട്ര തലത്തില്‍ നീക്കങ്ങള്‍ സജീവമാണ്. കപ്പലുകള്‍ക്ക് സുരക്ഷാ അകമ്പടി നല്‍കാന്‍ യുഎസ് നേവി തയ്യാറെടുക്കുമ്പോള്‍, ഹോര്‍മുസ് കടലിടുക്കിലും സൂയസ് കനാലിലും നാവിക ഗതാഗതം പുനഃസ്ഥാപിക്കാന്‍ സൈനിക സഖ്യം രൂപീകരിക്കുമെന്ന് ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ പ്രഖ്യാപിച്ചു. ഏഷ്യന്‍ രാജ്യങ്ങളുടെ ഊര്‍ജ്ജ ഇറക്കുമതിയെ നേരിട്ട് ബാധിക്കുന്ന ഈ പ്രതിസന്ധി ആഗോളതലത്തില്‍ വലിയ സാമ്പത്തിക പ്രത്യാഘാതങ്ങള്‍ ഉണ്ടാക്കുമെന്നാണ് വിലയിരുത്തപ്പെടുന്നത്.