ടെഹ്റാന്- അമേരിക്കക്കും ഇസ്രായേലിനും എതിരെ കുറഞ്ഞത് ആറുമാസമെങ്കിലും കടുത്ത യുദ്ധം തുടരാന് തങ്ങള്ക്ക് ശേഷിയുണ്ടെന്ന് ഇറാന്റെ റെവല്യൂഷണറി ഗാര്ഡ് പ്രഖ്യാപിച്ചു. നിലവിലെ സാഹചര്യത്തില് മേഖലയിലുടനീളമുള്ള ഇരുനൂറിലധികം അമേരിക്കന്, ഇസ്രായേലി ലക്ഷ്യങ്ങളെ തങ്ങള് ഇതിനോടകം ആക്രമിച്ചു കഴിഞ്ഞതായും സേന അവകാശപ്പെട്ടു.
നിലവിലെ സൈനിക നീക്കങ്ങളുടെ വേഗത്തില് ചുരുങ്ങിയത് ആറുമാസമെങ്കിലും ശക്തമായ പോരാട്ടം തുടരാന് ഇസ്ലാമിക് റിപ്പബ്ലിക് ഓഫ് ഇറാന്റെ സായുധ സേനക്ക് സാധിക്കുമെന്ന് റെവല്യൂഷണറി ഗാര്ഡ് വക്താവ് അലി മുഹമ്മദ് നായേനിയെ ഉദ്ധരിച്ച് ഫാര്സ് വാര്ത്താ ഏജന്സി റിപ്പോര്ട്ട് ചെയ്തു. ശത്രുക്കളുടെ ഏത് നീക്കത്തെയും പ്രതിരോധിക്കാന് സന്നദ്ധമാണെന്ന സന്ദേശമാണ് ഇതിലൂടെ ഇറാന് നല്കുന്നത്.
പുതിയ പരമോന്നത നേതാവ് മുജ്തബ ഖാംനഇയുടെ കീഴില് ഇറാന് തങ്ങളുടെ സൈനിക കരുത്ത് വര്ദ്ധിപ്പിച്ചിരിക്കുകയാണ്. തങ്ങളുടെ പക്കലുള്ള ആയുധശേഖരത്തിന്റെ ഒരു ഭാഗം മാത്രമാണ് ഇതുവരെ ഉപയോഗിച്ചിട്ടുള്ളതെന്നും വരും ദിവസങ്ങളില് കൂടുതല് ആധുനികമായ ആയുധങ്ങള് പുറത്തെടുക്കുമെന്നും വക്താവ് സൂചിപ്പിച്ചു. അമേരിക്കയുടെയും ഇസ്രായേലിന്റെയും നീക്കങ്ങളെ തടയാന് തക്കവണ്ണം തന്ത്രപരമായ മാറ്റങ്ങള് സേന വരുത്തിയിട്ടുണ്ട്.
അതേസമയം, മേഖലയില് സംഘര്ഷം കടുക്കുന്ന സാഹചര്യത്തില് ലോകരാജ്യങ്ങള് ആശങ്ക രേഖപ്പെടുത്തിയിട്ടുണ്ട്. ഇറാന്റെ പ്രത്യാക്രമണങ്ങള് തടയാന് അമേരിക്കയും ഇസ്രായേലും പ്രതിരോധ സംവിധാനങ്ങള് ശക്തമാക്കിയിരിക്കുകയാണ്. വരും ദിവസങ്ങളില് യുദ്ധം കൂടുതല് മേഖലകളിലേക്ക് വ്യാപിക്കുമോ എന്ന ആശങ്കയിലാണ് അന്താരാഷ്ട്ര സമൂഹം.
Related News
