ടെഹ്റാന്: അമേരിക്കയുമായും ഇസ്രായേലുമായും നിലനില്ക്കുന്ന യുദ്ധം അവസാനിപ്പിക്കാന് ലക്ഷ്യമിട്ടുള്ള ഏത് മധ്യസ്ഥ ചര്ച്ചകള്ക്കും കടുത്ത നിബന്ധനകള് മുന്നോട്ടുവെച്ച് ഇറാന്. വെറുമൊരു വെടിനിര്ത്തല് മാത്രമല്ല, ഭാവിയില് തങ്ങള്ക്കെതിരെ ആക്രമണം ഉണ്ടാകില്ലെന്ന ഉറപ്പും ലഭിക്കണമെന്ന് ഇറാന് ഗവണ്മെന്റ് വക്താവ് ഫാത്തിമ മൊഹാജിറാനി വ്യക്തമാക്കി.
മധ്യസ്ഥതയ്ക്കായി വെടിനിര്ത്തലിനൊപ്പം തന്നെ ആക്രമണങ്ങള് പൂര്ണ്ണമായും നിര്ത്തലാക്കണമെന്നും, ഇനി ഇത്തരം നീക്കങ്ങള് ഉണ്ടാവില്ലെന്ന് ഉറപ്പ് നല്കണമെന്നും ഇറാന് ആവശ്യപ്പെടുന്നു.
'ഇന്ന് നമ്മുടെ ജനങ്ങള് ഗൗരവമായി ആവശ്യപ്പെടുന്നത് ഈ ഉറപ്പാണ്. അവര്ക്ക് ഈ സുരക്ഷാ ബോധം അത്യാവശ്യമാണ്,' എന്ന് തസ്നിം വാര്ത്താ ഏജന്സിയോട് സംസാരിക്കവെ വക്താവ് പറഞ്ഞു. 'ഞങ്ങളല്ല ഈ യുദ്ധം തുടങ്ങിയത്, പക്ഷേ ഞങ്ങള് ഇത് അവസാനിപ്പിക്കും,' എന്ന ഉറച്ച നിലപാടാണ് ഇറാന് സ്വീകരിച്ചിരിക്കുന്നത്.
കഴിഞ്ഞ കുറച്ച് ദിവസങ്ങളായി ഇറാനിലെ സിവിലിയന് മേഖലകളിലും സൈനിക കേന്ദ്രങ്ങളിലും യുഎസും ഇസ്രായേലും ശക്തമായ ആക്രമണം തുടരുകയാണ്. ഇറാന്റെ പരമോന്നത നേതാവ് ആയത്തുള്ള അലി ഖാംനഇ കൊല്ലപ്പെട്ടതിന് പിന്നാലെ മേഖലയില് സംഘര്ഷം അതീവ ഗുരുതരമായി തുടരുന്ന സാഹചര്യത്തിലാണ് ഇറാന്റെ പുതിയ പ്രസ്താവന.
സമാധാന ശ്രമങ്ങള്ക്കായി ചില രാജ്യങ്ങള് മുന്നോട്ട് വന്നിട്ടുണ്ടെന്ന് ഇറാനിയന് പ്രസിഡന്റ് മസൂദ് പെസെഷ്കിയാന് നേരത്തെ സൂചിപ്പിച്ചിരുന്നു. എന്നാല് അമേരിക്കന് പ്രസിഡന്റ് ഡൊണാള്ഡ് ട്രംപ് 'നിരുപാധിക കീഴടങ്ങല്' എന്ന ആവശ്യത്തില് ഉറച്ചുനില്ക്കുന്നത് ചര്ച്ചകളെ പ്രതിസന്ധിയിലാക്കുന്നുണ്ട്.
.jpg)
