ലണ്ടന്/മനാമ: പശ്ചിമേഷ്യയില് നിലനില്ക്കുന്ന യുദ്ധസമാനമായ സാഹചര്യത്തെത്തുടര്ന്ന് ഏപ്രില് മാസത്തില് നടക്കാനിരുന്ന ബഹ്റൈന്, സൗദി അറേബ്യന് ഗ്രാന്ഡ് പ്രീ മത്സരങ്ങള് റദ്ദാക്കി. ഫോര്മുല വണ് അധികൃതരും അന്താരാഷ്ട്ര ഓട്ടോമൊബൈല് ഫെഡറേഷനും (FIA) സംയുക്തമായാണ് ഈ തീരുമാനമെടുത്തത്.
ഏപ്രിലിലെ മത്സരങ്ങള്ക്ക് പകരം മറ്റ് വേദികള് പരിഗണിച്ചിരുന്നെങ്കിലും നിലവിലെ സാഹചര്യത്തില് പകരം മത്സരങ്ങള് വേണ്ടെന്ന് അധികൃതര് തീരുമാനിച്ചു. ഇതോടെ ഫോര്മുല വണ്ണിന് പുറമെ ഫോര്മുല 2, ഫോര്മുല 3, എഫ്. വണ് അക്കാദമി (F1 ACADEMY) റൗണ്ടുകളും നിശ്ചയിച്ച പ്രകാരം നടക്കില്ല.
വിദ്യാര്ത്ഥികളുടെയും പ്രവാസികളുടെയും സുരക്ഷ പോലെ തന്നെ കായിക താരങ്ങളുടെയും ആരാധകരുടെയും സുരക്ഷയ്ക്കാണ് മുന്ഗണന നല്കുന്നതെന്ന് എഫ്. വണ് സി.ഇ.ഒ സ്റ്റെഫാനോ ഡൊമെനിക്കാലി പറഞ്ഞു. 'പ്രയാസകരമായ തീരുമാനമാണെങ്കിലും ഇപ്പോഴത്തെ സാഹചര്യത്തില് ഇതാണ് ഉചിതം,' അദ്ദേഹം വ്യക്തമാക്കി. മേഖലയില് എത്രയും വേഗം സമാധാനം തിരിച്ചുവരട്ടെ എന്ന് എഫ്.ഐ.എ പ്രസിഡന്റ് മുഹമ്മദ് ബിന് സുലായം ആശംസിച്ചു.
മത്സരങ്ങള് റദ്ദാക്കാനുള്ള തീരുമാനത്തെ സൗദി അറേബ്യയും ബഹ്റൈനും പൂര്ണ്ണമായി പിന്തുണച്ചു. ആരാധകരെ വീണ്ടും സ്വീകരിക്കാന് കാത്തിരിക്കുകയാണെന്ന് ബഹ്റൈന് ഇന്റര്നാഷണല് സര്ക്യൂട്ട് ചീഫ് എക്സിക്യൂട്ടീവ് ഷെയ്ഖ് സല്മാന് ബിന് ഈസ അല് ഖലീഫ പറഞ്ഞു. സുരക്ഷാ മുന്കരുതലുകള് കണക്കിലെടുത്തുള്ള ഈ തീരുമാനത്തോട് പൂര്ണ്ണമായി സഹകരിക്കുമെന്ന് സൗദി മോട്ടോര്സ്പോര്ട്ട് കമ്പനി ചെയര്മാന് ഖാലിദ് ബിന് സുല്ത്താന് അല് ഫൈസല് രാജകുമാരനും വ്യക്തമാക്കി.
Related News
