റിയാദ്- സൗദി അറേബ്യയുടെ വിവിധ ഭാഗങ്ങളില് വരും ദിവസങ്ങളില് ശക്തമായ മഴ പെയ്യാന് സാധ്യതയുണ്ടെന്ന കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പിനെത്തുടര്ന്ന്, മുന്കരുതല് നടപടിയായി ഈ വര്ഷത്തെ ഈദുല് ഫിത്ര് നമസ്കാരം പള്ളികളില് മാത്രമായി പരിമിതപ്പെടുത്താന് ഇസ്ലാമിക കാര്യ മന്ത്രാലയം നിര്ദ്ദേശിച്ചു. ആരാധകരുടെ സുരക്ഷ മുന്നിര്ത്തി മഴ ബാധിക്കാന് സാധ്യതയുള്ള ഇടങ്ങളില് തുറന്ന ഈദ്ഗാഹുകള് ഒഴിവാക്കാനാണ് നിര്ദ്ദേശം.
കാലാവസ്ഥാ പ്രവചനം ചുരുക്കത്തില്:
നാളെ മുതല് അടുത്ത തിങ്കളാഴ്ച വരെ രാജ്യത്തിന്റെ വിവിധ ഭാഗങ്ങളില് ഇടിമിന്നലോടു കൂടിയ മഴയ്ക്ക് സാധ്യതയുണ്ടെന്ന് നാഷണല് സെന്റര് ഫോര് മെറ്റീരിയോളജി അറിയിച്ചു.
മക്ക മേഖല: മക്ക നഗരം, ത്വാഇഫ്, ഖുലൈസ് തുടങ്ങി വിവിധയിടങ്ങളില് കനത്ത മഴയ്ക്കും മിന്നല് പ്രളയത്തിനും സാധ്യതയുണ്ട്. ജിദ്ദ, റാബിഗ് എന്നിവിടങ്ങളില് മിതമായി മഴ ലഭിച്ചേക്കും.
റിയാദ് മേഖല: വാദി അല്-ദവാസിര് ഉള്പ്പെടെയുള്ള തെക്കന് ഭാഗങ്ങളില് കനത്ത മഴയ്ക്കും ആലിപ്പഴ വര്ഷത്തിനും സാധ്യതയുണ്ട്. തലസ്ഥാനമായ റിയാദ്, അല്-ഖര്ജ് തുടങ്ങിയ ഇടങ്ങളില് നേരിയതോ മിതമായതോ ആയ മഴയാണ് പ്രതീക്ഷിക്കുന്നത്.
മന്ത്രാലയത്തിന്റെ ഈ തീരുമാനപ്രകാരം, മോശം കാലാവസ്ഥയുള്ള പ്രദേശങ്ങളിലെ വിശ്വാസികള് സുരക്ഷിതരായിരിക്കാന് നിര്ദ്ദേശങ്ങള് പാലിക്കണമെന്ന് അധികൃതര് അഭ്യര്ത്ഥിച്ചു.
Related News
