ഹൈദരാബാദ്: ഹൈദരാബാദിലെ മാധാപൂരില് ശനിയാഴ്ച രാത്രിയുണ്ടായ വാഹനാപകടത്തില് മലയാളി യുവതി മരിച്ചു. മലപ്പുറം സ്വദേശിനി ഹാനിയ ആയിഷ (22) ആണ് മരിച്ചത്. ആയിഷയുടെ കൂടെയുണ്ടായിരുന്ന ഭര്ത്താവ് അബ്ദുല് ബാസിത്തിന് (26) അപകടത്തില് ഗുരുതരമായി പരിക്കേറ്റു.
ഹൈദരാബാദിലെ മലബാര് ഗോള്ഡ് ഷോറൂമിലെ ജീവനക്കാരായ ആയിഷയും ബാസിത്തും കൂക്കട്ട്പള്ളിയില് സിനിമ കണ്ട് മടങ്ങുകയായിരുന്നു. ശനിയാഴ്ച രാത്രി വൈകി മാധാപൂരിലെ മൈന്ഡ് സ്പേസിന് സമീപം വെച്ച് കര്ണാടക രജിസ്ട്രേഷനിലുള്ള ഡി.സി.എം വാന് ഇവരുടെ സ്കൂട്ടറില് ഇടിക്കുകയായിരുന്നു. ഇടിയുടെ ആഘാതത്തില് ബാസിത് റോഡിലേക്ക് തെറിച്ചുവീണപ്പോള്, ആയിഷ വാനിന്റെ അടിയില് കുടുങ്ങിപ്പോയി.
അപകടത്തിന് പിന്നാലെ വാന് നിര്ത്താന് തയ്യാറാകാതെ ഡ്രൈവര് വാഹനം ഓടിച്ചുപോവുകയായിരുന്നു. വാനിന്റെ അടിയില് കുടുങ്ങിയ ആയിഷയെയും സ്കൂട്ടറിനെയും ഒരു കിലോമീറ്ററോളം ദൂരം വാന് വലിച്ചിഴച്ചു. നടുക്കുന്ന ഈ കാഴ്ച കണ്ടുനിന്ന വഴിയാത്രക്കാര് വാന് പിന്തുടര്ന്ന് തടഞ്ഞെങ്കിലും ഡ്രൈവര് ഓടി രക്ഷപ്പെട്ടു. വാനിലുണ്ടായിരുന്ന ക്ലീനറെ നാട്ടുകാര് പിടികൂടി പോലീസില് ഏല്പ്പിച്ചു.
നാട്ടുകാര് ചേര്ന്ന് ഉടന് തന്നെ ഇരുവരെയും സമീപത്തെ എ.ഐ.ജി ആശുപത്രിയില് എത്തിച്ചെങ്കിലും ആശുപത്രിയില് എത്തുന്നതിന് മുന്പേ ആയിഷയുടെ മരണം സംഭവിച്ചിരുന്നു. തീവ്രപരിചരണ വിഭാഗത്തില് കഴിയുന്ന ബാസിത്തിന്റെ നില ഗുരുതരമായി തുടരുകയാണ്. മൃതദേഹം പോസ്റ്റ്മോര്ട്ടം നടപടികള്ക്കായി മാറ്റിയിട്ടുണ്ട്. ഒളിവില് പോയ ഡ്രൈവര്ക്കായി മാധാപൂര് പോലീസ് തിരച്ചില് ഊര്ജിതമാക്കി.
Related News
