വാഷിംഗ്ടണ്: മിഡില് ഈസ്റ്റില് നിലനില്ക്കുന്ന വെടിനിര്ത്തല് കരാര് ലംഘിച്ച് ഹോര്മുസ് കടലിടുക്കില് ഇറാന് ഡ്രോണ് ആക്രമണം നടത്തിയതായി യുഎസ് പ്രസിഡന്റ് ഡൊണാള്ഡ് ട്രംപ്. ഈ പ്രവൃത്തി അങ്ങേയറ്റം 'മണ്ടത്തരമാണെന്ന്' അദ്ദേഹം തന്റെ ട്രൂത്ത് സോഷ്യല് പ്ലാറ്റ്ഫോമിലൂടെ വിശേഷിപ്പിച്ചു.
വലിയൊരു ചരക്ക് കപ്പലിന്റെ മുകള്ത്തട്ടില് ഒരു ഡ്രോണ് പതിച്ചതായാണ് റിപ്പോര്ട്ട്. ആക്രമിക്കാന് ശ്രമിച്ച മറ്റ് മൂന്ന് ഡ്രോണുകളെ അമേരിക്കന് സേന വെടിവെച്ചിട്ടു. വ്യാഴാഴ്ച ഒമാന് തീരത്ത് ഒരു കപ്പലിന് നേരെ ആക്രമണം നടന്നതായി ബ്രിട്ടീഷ് സൈന്യം നേരത്തെ സ്ഥിരീകരിച്ചിരുന്നു. ട്രംപിന്റെ പരാമര്ശം ഇതിനെ ലക്ഷ്യം വെച്ചുള്ളതാണെന്നാണ് സൂചന.
ഇരുരാജ്യങ്ങളും തമ്മില് യുദ്ധം പൂര്ണ്ണമായി അവസാനിപ്പിക്കുന്നതിനായുള്ള നിര്ണ്ണായക ചര്ച്ചകള് നടക്കവേയാണ് ഈ ആക്രമണം ഉണ്ടായിരിക്കുന്നത്. വെടിനിര്ത്തല് കരാര് നിലനില്ക്കെ ഉണ്ടായ ഈ പ്രകോപനം മേഖലയിലെ സമാധാനാന്തരീക്ഷത്തെ വീണ്ടും ആശങ്കയിലാഴ്ത്തിയിരിക്കുകയാണ്. ആക്രമണത്തിനിരയായ കപ്പലിന്റെ പേരോ മറ്റ് വിവരങ്ങളോ യുഎസ് അധികൃതര് ഇതുവരെ ഔദ്യോഗികമായി പുറത്തുവിട്ടിട്ടില്ല.
സംഭവത്തില് ഇറാന് ഇതുവരെ പ്രതികരിച്ചിട്ടില്ല. വരും ദിവസങ്ങളില് ഈ വിഷയം അന്താരാഷ്ട്ര തലത്തില് വലിയ നയതന്ത്ര ചര്ച്ചകള്ക്ക് വഴിവെക്കുമെന്നാണ് വിലയിരുത്തപ്പെടുന്നത്.
Related News
