ഇസ്ലാമാബാദ്: ഇറാനുമായുള്ള സമാധാന ചര്ച്ചകള് പുനരാരംഭിക്കാന് അമേരിക്കന് പ്രതിനിധി സംഘം തിങ്കളാഴ്ച പാകിസ്താനിലെത്തും. എന്നാല്, തങ്ങള് മുന്നോട്ടുവെച്ച വ്യവസ്ഥകള് അംഗീകരിച്ചില്ലെങ്കില് ഇറാന്റെ വൈദ്യുതി നിലയങ്ങളും പാലങ്ങളും തകര്ക്കുമെന്ന കടുത്ത ഭീഷണിയുമായി യുഎസ് പ്രസിഡന്റ് ഡൊണാള്ഡ് ട്രംപ് രംഗത്തെത്തി. രണ്ടാഴ്ചത്തെ താല്ക്കാലിക വെടിനിര്ത്തല് അവസാനിക്കാന് ഒരു ദിവസം മാത്രം ബാക്കിനില്ക്കെയാണ് ട്രംപിന്റെ ഈ നീക്കം.
സോഷ്യല് മീഡിയയിലൂടെയാണ് ട്രംപ് തന്റെ നിലപാട് വ്യക്തമാക്കിയത്. 'ഞങ്ങള് വളരെ ന്യായമായ ഒരു കരാറാണ് മുന്നോട്ടുവെക്കുന്നത്. അവര് അത് സ്വീകരിക്കുമെന്ന് ഞാന് പ്രതീക്ഷിക്കുന്നു. അല്ലാത്തപക്ഷം, ഇറാന്റെ ഓരോ പവര് പ്ലാന്റും പാലവും തകര്ക്കാന് അമേരിക്ക മടിക്കില്ല. ഇനി വിട്ടുവീഴ്ചയ്ക്കില്ല ട്രംപ് കുറിച്ചു. ഹോര്മുസ് കടലിടുക്കില് ചരക്ക് കപ്പലുകള്ക്ക് നേരെ ഇറാന് വെടിവെപ്പ് നടത്തിയത് വെടിനിര്ത്തല് കരാറിന്റെ ലംഘനമാണെന്നും അദ്ദേഹം ആരോപിച്ചു.
അതേസമയം, ചര്ച്ചയില് പങ്കെടുക്കുമെന്ന് ഇറാന് ഇതുവരെ സ്ഥിരീകരിച്ചിട്ടില്ല. ഇറാനിയന് തുറമുഖങ്ങള്ക്കു മേല് അമേരിക്ക ഏര്പ്പെടുത്തിയ ഉപരോധം നീക്കാതെ ചര്ച്ചയ്ക്കില്ലെന്ന നിലപാടിലാണ് ടെഹ്റാന്. വൈസ് പ്രസിഡന്റ് ജെ.ഡി വാന്സ്, പ്രസിഡന്റിന്റെ മരുമകന് ജാരെഡ് കുഷ്നര്, സ്റ്റീവ് കുഷ്നര് എന്നിവരടങ്ങിയ സംഘമാണ് അമേരിക്കയെ പ്രതിനിധീകരിക്കുക. ആണവ വിഷയങ്ങളിലും ഹോര്മുസ് കടലിടുക്കിലെ ഗതാഗത നിയന്ത്രണത്തിലും ഇരുരാജ്യങ്ങളും തമ്മില് ഇപ്പോഴും വലിയ അഭിപ്രായവ്യത്യാസങ്ങള് നിലനില്ക്കുന്നുണ്ടെന്ന് ഇറാന്റെ മുഖ്യ ചര്ച്ചാ പ്രതിനിധി മുഹമ്മദ് ബാഖര് ഖാലിബാഫ് പറഞ്ഞു.
എട്ടു ആഴ്ചയായി തുടരുന്ന യുദ്ധം ലോകത്തെ എണ്ണ വിതരണത്തെ സാരമായി ബാധിച്ചിരിക്കുകയാണ്. ലോകത്തെ മൊത്തം എണ്ണക്കടത്തിന്റെ അഞ്ചിലൊന്ന് നടക്കുന്ന ഹോര്മുസ് കടലിടുക്ക് ഇറാന് അടച്ചിട്ടത് ആഗോള വിപണിയില് എണ്ണവില കുതിച്ചുയരാന് കാരണമായി. കടലിടുക്ക് തുറക്കുമെന്ന് കഴിഞ്ഞ വെള്ളിയാഴ്ച ഇറാന് അറിയിച്ചിരുന്നെങ്കിലും, അമേരിക്ക ഉപരോധം നീക്കാന് തയ്യാറാകാത്തതിനെ തുടര്ന്ന് ശനിയാഴ്ച ഈ തീരുമാനം പിന്വലിച്ചു. ഇതോടെ തിങ്കളാഴ്ച വിപണി തുറക്കുമ്പോള് എണ്ണവിലയില് വീണ്ടും വന് വര്ദ്ധനവുണ്ടാകുമെന്ന് സാമ്പത്തിക വിദഗ്ധര് വിലയിരുത്തുന്നു.
ചര്ച്ചകള്ക്ക് വേദിയാകുന്ന പാകിസ്താന് തലസ്ഥാനമായ ഇസ്ലാമാബാദില് കനത്ത സുരക്ഷയാണ് ഏര്പ്പെടുത്തിയിരിക്കുന്നത്. അമേരിക്കന് പ്രതിനിധികള്ക്കായി സുരക്ഷാ സജ്ജീകരണങ്ങളുമായി രണ്ട് യുഎസ് സി-17 വിമാനങ്ങള് നൂര് ഖാന് എയര്ബേസില് ഇറങ്ങി. നഗരത്തില് ഗതാഗത നിയന്ത്രണം ഏര്പ്പെടുത്തുകയും ചര്ച്ച നടക്കുന്ന സെറീന ഹോട്ടലിലെ താമസക്കാരോട് ഒഴിയാന് നിര്ദ്ദേശിക്കുകയും ചെയ്തിട്ടുണ്ട്.
ഫെബ്രുവരി 28-ന് അമേരിക്കയും ഇസ്രായേലും ഇറാനെ ആക്രമിച്ചതോടെയാണ് നിലവിലെ സംഘര്ഷങ്ങള് ആരംഭിച്ചത്. യുഎസ്-ഇസ്രായേല് ആക്രമണങ്ങളിലും ലബനനിലെ ഇസ്രായേല് അധിനിവേശത്തിലുമായി ഇതിനോടകം ആയിരക്കണക്കിന് ആളുകള് കൊല്ലപ്പെട്ടു. ഇറാന് ഗള്ഫ് രാജ്യങ്ങളിലെ യുഎസ് സൈനിക താവളങ്ങള്ക്ക് നേരെ മിസൈല്-ഡ്രോണ് ആക്രമണങ്ങള് നടത്തിയിരുന്നു.
അമേരിക്കയില് നവംബറില് നടക്കാനിരിക്കുന്ന ഇടക്കാല തെരഞ്ഞെടുപ്പും ഇന്ധനവില വര്ദ്ധനവും ട്രംപിന് രാഷ്ട്രീയമായി വലിയ സമ്മര്ദ്ദം സൃഷ്ടിക്കുന്നുണ്ട്. ഈ സാഹചര്യത്തില് ഇറാനുമായുള്ള ചര്ച്ചകള് ലോകം ഏറെ ഉറ്റുനോക്കുകയാണ്.
Related News
