ജിസാന്‍: വാശിയേറിയ പോരാട്ടങ്ങള്‍ക്കൊടുവില്‍ ജിസാന്‍ പ്രീമിയര്‍ ക്രിക്കറ്റ് ലീഗ് (JPCL) ചാമ്പ്യന്‍സ് ട്രോഫി 2025-26 സീസണില്‍ സൂപ്പര്‍ ഏഷ്യ ക്രിക്കറ്റ് ക്ലബ് ജേതാക്കളായി. 14 ടീമുകള്‍ മാറ്റുരച്ച ടൂര്‍ണ്ണമെന്റിലെ ആവേശകരമായ ഫൈനലില്‍ അല്‍ അസ്വാദ് ക്രിക്കറ്റ് ക്ലബ്ബിനെ പരാജയപ്പെടുത്തിയാണ് സൂപ്പര്‍ ഏഷ്യ കിരീടം ചൂടിയത്.

ഫൈനലില്‍ ടോസ് നേടി ആദ്യം ബാറ്റിംഗിനിറങ്ങിയ അല്‍ അസ്വാദ് നിശ്ചിത 20 ഓവറില്‍ 154 റണ്‍സ് നേടി. മറുപടി ബാറ്റിംഗിനിറങ്ങിയ സൂപ്പര്‍ ഏഷ്യ ക്രിക്കറ്റ് ക്ലബ്ബ് 13.3 ഓവറില്‍ ലക്ഷ്യം മറികടന്ന് ഉജ്ജ്വല വിജയം കൈവരിച്ചു. 67 റണ്‍സ് നേടി ടീമിന്റെ വിജയത്തില്‍ നിര്‍ണ്ണായക പങ്കുവഹിച്ച സുബൈര്‍ ബട്ടിനെ മാന്‍ ഓഫ് ദി മാച്ച് ആയി തിരഞ്ഞെടുത്തു.

സമാപന ചടങ്ങില്‍ സാമൂഹിക പ്രവര്‍ത്തകനും സൗദി കെ.എം.സി.സി ദേശീയ സെക്രട്ടറിയുമായ ഹാരിസ് കല്ലായി മുഖ്യാതിഥിയായിരുന്നു. സൂപ്പര്‍ ഏഷ്യ ക്രിക്കറ്റ് ക്ലബ്ബിന് വിന്നേഴ്‌സ് ട്രോഫിയും പ്രൈസ് മണിയും, അല്‍ അസ്വാദ് ക്രിക്കറ്റ് ക്ലബ്ബിന് റണ്ണേഴ്‌സ് അപ്പ് ട്രോഫിയും പ്രൈസ് മണിയും അദ്ദേഹം സമ്മാനിച്ചു.

മറ്റ് ട്രോഫികള്‍ ജെ.പി.സി.എല്‍ ഭാരവാഹികളായ ഖിസ്രുഖാന്‍ ബഹ്ലൂല്‍, മുഹമ്മദ് മുസ്തഫ ബെയ്ഗ്, ജമാല്‍ പത്തപ്പിരിയം, കമാല്‍ എന്നിവര്‍ വിതരണം ചെയ്തു. ടൂര്‍ണ്ണമെന്റില്‍ പങ്കെടുത്ത എല്ലാ ടീമുകളെയും കായികതാരങ്ങളെയും അവരുടെ മികച്ച പ്രകടനത്തിന് ക്ലബ്ബ് ഭാരവാഹികളും അതിഥികളും അഭിനന്ദിച്ചു.