അല് ഖോബാര്: നിയമസഭാ തിരഞ്ഞെടുപ്പ് ഫലം പുറത്തുവരുമ്പോള് കേരളത്തില് യുഡിഎഫ് ശക്തമായ തിരിച്ചുവരവ് നടത്തുമെന്ന് ഒഐസിസി അല് ഖോബാര് ഏരിയ കമ്മിറ്റി സംഘടിപ്പിച്ച തിരഞ്ഞെടുപ്പ് വിലയിരുത്തല് യോഗം അഭിപ്രായപ്പെട്ടു.
സംസ്ഥാനത്ത് ശക്തമായ ഭരണവിരുദ്ധ വികാരം നിലനില്ക്കുന്നതായി യോഗം വിലയിരുത്തി. ഇടത് നേതാക്കളുടെ ആഡംബര ജീവിതവും ഭരണതലത്തിലെ അഴിമതിയും ആശാ വര്ക്കര്മാര് ഉള്പ്പെടെയുള്ളവരുടെ സമരങ്ങളോട് സര്ക്കാര് സ്വീകരിച്ച നിഷേധാത്മക സമീപനവും ഇതിന് കാരണമായതായി യോഗം നിരീക്ഷിച്ചു.
ആരോഗ്യമന്ത്രി വീണ ജോര്ജിനെതിരെ കെഎസ്യു നേതാക്കള് നടത്തിയ കരിങ്കൊടി പ്രതിഷേധവുമായി ബന്ധപ്പെട്ട് മുഖ്യമന്ത്രിയും സ്പീക്കറും ആരോഗ്യ മന്ത്രിയും ചേര്ന്ന് നടത്തിയ കൂടിയാലോചനകളും തുടര്ന്നുള്ള കള്ളപ്രചാരണങ്ങളും ജനങ്ങള് തിരിച്ചറിഞ്ഞിട്ടുണ്ട്. പ്രതിപക്ഷം സ്വീകരിച്ച വിഷയാധിഷ്ഠിത സമീപനം പ്രശംസനീയമാണ്. ജനങ്ങള് പ്രതീക്ഷയോടെ നോക്കുന്നത് യുഡിഎഫിനെയാണെന്നും ഉയര്ന്ന പോളിങ് ശതമാനം യുഡിഎഫ് തരംഗത്തിന് വഴിയൊരുക്കുമെന്നും യോഗം വിലയിരുത്തി.
ഇടതുപക്ഷവും ബിജെപിയും തമ്മിലുള്ള അവിശുദ്ധ രാഷ്ട്രീയ ധാരണ ജനങ്ങള് തിരിച്ചറിഞ്ഞു കഴിഞ്ഞു. എസ്ഡിപിഐയെ കൂട്ടുപിടിച്ച ഇടത് നിലപാട് പഴയ പിഡിപി ബന്ധത്തിന്റെ ആവര്ത്തനമായി മാറും. ബാലറ്റ് മെഷീനുകള് സൂക്ഷിച്ചിരിക്കുന്ന സ്ട്രോങ് റൂം തുറക്കുന്നതുമായി ബന്ധപ്പെട്ട വിവാദങ്ങളില് ഇടതുപക്ഷവും ബിജെപിയും പുലര്ത്തുന്ന മൗനം സംശയാസ്പദമാണെന്നും യോഗത്തില് അഭിപ്രായമുയര്ന്നു.
ഒഐസിസി അല് ഖോബാര് ഏരിയ കമ്മിറ്റി പ്രസിഡന്റ് എ.കെ. സജൂബ് അധ്യക്ഷത വഹിച്ചു. ഗ്ലോബല് കമ്മിറ്റി പ്രതിനിധി ജോണ് കോഷി, കിഴക്കന് പ്രവിശ്യ കമ്മിറ്റി ജനറല് സെക്രട്ടറി സക്കീര് പറമ്പില്, വനിതാ കമ്മിറ്റി സംഘടനാ ചുമതലയുള്ള ജനറല് സെക്രട്ടറി ഹുസ്ന ആസിഫ്, വൈസ് പ്രസിഡന്റ് റജീബ്, ജനറല് സെക്രട്ടറി ഷിബിന് ആറ്റുവ, സെക്രട്ടറിമാരായ കോയ സുബൈര്, സകീര് പി എന്നിവര് സംസാരിച്ചു.
സംഘടനാ ചുമതലയുള്ള ജനറല് സെക്രട്ടറി സുബൈര് പാറക്കല് സ്വാഗതവും ട്രഷറര് ഷൈന് കരുനാഗപ്പള്ളി നന്ദിയും രേഖപ്പെടുത്തി.
Related News
