ജിദ്ദ- മൃതദേഹങ്ങള്‍ കൊണ്ടുപോകുന്ന വാഹനങ്ങള്‍ സജ്ജീകരിക്കുന്നതിനായി സൗദി സ്റ്റാന്‍ഡേര്‍ഡ്സ്, മെട്രോളജി ആന്‍ഡ് ക്വാളിറ്റി ഓര്‍ഗനൈസേഷന്‍ പുതിയ കര്‍ശനമായ മാര്‍ഗനിര്‍ദ്ദേശങ്ങള്‍ പുറപ്പെടുവിച്ചു. പൊതുജനാരോഗ്യം സംരക്ഷിക്കുന്നതിനും മൃതദേഹങ്ങളോടുള്ള ആദരവ് ഉറപ്പാക്കുന്നതിനുമായി ഏറ്റവും ഉയര്‍ന്ന അന്താരാഷ്ട്ര സുരക്ഷാ മാനദണ്ഡങ്ങള്‍ പാലിച്ചാണ് കരട് നിയമം തയ്യാറാക്കിയിരിക്കുന്നത്. നഗരത്തിനകത്തുള്ള ഗതാഗതത്തിനായി 'മോഡല്‍ എ' എന്നും, നഗരങ്ങള്‍ക്കിടയിലുള്ള ദീര്‍ഘദൂര യാത്രകള്‍ക്കായി 'മോഡല്‍ ബി' എന്നും വാഹനങ്ങളെ രണ്ട് വിഭാഗങ്ങളായി തരംതിരിച്ചിട്ടുണ്ട്.

വാഹനത്തിന്റെ സുരക്ഷയെയോ റോഡ് ഉപയോക്താക്കളെയോ ബാധിക്കാത്ത രീതിയില്‍ വേണം മാറ്റങ്ങള്‍ വരുത്താനെന്ന് അതോറിറ്റി വ്യക്തമാക്കി. മൃതദേഹം സൂക്ഷിക്കുന്ന ക്യാബിന് കുറഞ്ഞത് 1400 mm ഉയരവും 2900 mm നീളവും 1600 mm വീതിയും ഉണ്ടായിരിക്കണം. ഉള്‍ഭാഗം എളുപ്പത്തില്‍ വൃത്തിയാക്കാന്‍ സാധിക്കുന്നതും രാസവസ്തുക്കളാല്‍ നശിക്കാത്തതുമായ സ്റ്റെയിന്‍ലെസ് സ്റ്റീല്‍ അല്ലെങ്കില്‍ വിനൈല്‍ പോലുള്ള വസ്തുക്കള്‍ കൊണ്ട് നിര്‍മ്മിച്ചതായിരിക്കണം. തുണി പോലുള്ളവ ഉപയോഗിക്കാന്‍ പാടില്ലാത്തതും തറ ഭാഗം ചോര്‍ച്ചയില്ലാത്തതും തെന്നാത്തതുമായ മെറ്റീരിയല്‍ ആയിരിക്കണം.

നഗരങ്ങളില്‍ ഉപയോഗിക്കുന്ന വാഹനങ്ങളില്‍ താപനില 20-25 ഡിഗ്രി സെല്‍ഷ്യസിനിടയിലും, ദീര്‍ഘദൂര യാത്രകള്‍ക്കുള്ള വാഹനങ്ങളില്‍ 0-4 ഡിഗ്രി സെല്‍ഷ്യസിനിടയിലും നിലനിര്‍ത്തണം. ഡ്രൈവര്‍ക്ക് താപനില നിരീക്ഷിക്കാന്‍ പ്രത്യേക സംവിധാനവും ക്യാബിനിലേക്ക് വായു കടക്കാത്ത രീതിയിലുള്ള വിഭജനവും നിര്‍ബന്ധമാണ്. കൂടാതെ, ഫയര്‍ എക്സ്റ്റിംഗുഷര്‍, ഫസ്റ്റ് എയ്ഡ് കിറ്റ്, ഗുണമേന്മയുള്ള ലൈറ്റിംഗ് എന്നിവ വാഹനത്തിലുണ്ടായിരിക്കണം. നിയമങ്ങള്‍ പാലിക്കാത്ത വാഹനങ്ങള്‍ക്കെതിരെ നടപടിയുണ്ടാകുമെന്നും അതോറിറ്റി മുന്നറിയിപ്പ് നല്‍കി.