മലപ്പുറം: സൗദി ഭരണാധികാരി സല്മാന് ബിന് അബ്ദുല് അസീസ് രാജാവിന്റെ പ്രത്യേക അതിഥികളായി ഈ വര്ഷത്തെ ഹജ്ജ് കര്മ്മം നിര്വഹിക്കാന് കേരളത്തില് നിന്നുള്ള പ്രമുഖ പണ്ഡിതരായ കുഞ്ഞിമുഹമ്മദ് പറപ്പൂരും ഡോ. ശൈഖ് മുഹമ്മദ് കിഴിശ്ശേരിയും തിരഞ്ഞെടുക്കപ്പെട്ടു. ലോകത്തിന്റെ വിവിധ ഭാഗങ്ങളില് നിന്നുള്ള വിശിഷ്ട വ്യക്തികള്ക്കായി സൗദി സര്ക്കാര് നടപ്പിലാക്കുന്ന 'ഗസ്റ്റ്സ് ഓഫ് കസ്റ്റോഡിയന് ഓഫ് ദ ടു ഹോളി മോസ്ക്സ്' പദ്ധതിയുടെ ഭാഗമായാണ് ഈ ആദരം.
കേരളത്തിലെ വൈജ്ഞാനിക-വിദ്യാഭ്യാസ രംഗങ്ങളില് വ്യക്തിമുദ്ര പതിപ്പിച്ച വ്യക്തിയാണ് കുഞ്ഞിമുഹമ്മദ് പറപ്പൂര്. മദീനയിലെ കിങ് ഫഹദ് ഖുര്ആന് പ്രിന്റിംഗ് കോംപ്ലക്സ് വിതരണം ചെയ്യുന്ന വിശുദ്ധ ഖുര്ആനിന്റെ മലയാളത്തിലേക്കുള്ള ആശയവിവര്ത്തനം നിര്വഹിച്ചവരില് ഒരാളാണ് ഇദ്ദേഹം.
പുളിക്കല് മദീനത്തുല് ഉലൂമില് നിന്ന് പ്രൊഫസറായി വിരമിച്ച ഡോ. ശൈഖ് മുഹമ്മദ് നിലവില് മഞ്ചേരി ഇ.ടി.സി.എസ് കോളേജ് പ്രിന്സിപ്പലായി സേവനമനുഷ്ഠിക്കുന്നു. മലബാര് മേഖലയില് ആദ്യമായി ഒരു അറബിക് റിസര്ച്ച് സെന്റര് സ്ഥാപിക്കുന്നതില് അദ്ദേഹം വലിയ പങ്കുവഹിച്ചു. കാലിക്കറ്റ് സര്വകലാശാലയുടെ 'എം.എം. ഗനി' അവാര്ഡ് അടക്കമുള്ള പുരസ്കാരങ്ങള് ഇദ്ദേഹത്തിന് ലഭിച്ചിട്ടുണ്ട്. കേരള സര്ക്കാരിന്റെ പാഠപുസ്തക പരിഷ്കരണ സമിതിയില് അറബിക് വിഭാഗം അഡൈ്വസര് കൂടിയാണ് അദ്ദേഹം.
വൈജ്ഞാനിക-സാമൂഹിക രംഗങ്ങളില് നല്കി വരുന്ന വിലപ്പെട്ട സംഭാവനകള് പരിഗണിച്ചാണ് ഇരുവരെയും ഈ വിശിഷ്ട പദവിയിലേക്ക് തിരഞ്ഞെടുത്തത്. കേരളത്തില് നിന്നുള്ള അതിഥികള് മെയ് 18-ന് വിശുദ്ധ ഭൂമിയിലേക്ക് തിരിക്കും. മെയ് 17-ന് ഡല്ഹിയിലെ സൗദി എംബസിയില് ഇവര്ക്ക് യാത്രയയപ്പ് നല്കും. സൗദി അറേബ്യയുടെ പരിപൂര്ണ്ണ ആതിഥേയത്വത്തില് ഹജ്ജ് നിര്വഹിക്കാന് സാധിക്കുന്നത് വലിയൊരു അംഗീകാരമാണെന്ന് ഇരുവരും പ്രതികരിച്ചു.
Related News
