ന്യൂഡല്‍ഹി: ഐസിഎസ്ഇ (പത്താം ക്ലാസ്), ഐഎസ്സി (പന്ത്രണ്ടാം ക്ലാസ്) പരീക്ഷാഫലങ്ങള്‍ കൗണ്‍സില്‍ ഫോര്‍ ദ ഇന്ത്യന്‍ സ്‌കൂള്‍ സര്‍ട്ടിഫിക്കറ്റ് എക്സാമിനേഷന്‍സ് പ്രഖ്യാപിച്ചു. കേരളത്തിലെ സ്‌കൂളുകള്‍ മികച്ച വിജയശതമാനമാണ് ഇത്തവണ കൈവരിച്ചത്. കേരളത്തില്‍ പത്താം ക്ലാസില്‍ 99.96 ശതമാനവും പന്ത്രണ്ടാം ക്ലാസില്‍ 99.97 ശതമാനവുമാണ് വിജയം. ദേശീയതലത്തില്‍ ഐസിഎസ്ഇക്ക് 99.18 ശതമാനവും ഐഎസ്സിക്ക് 99.13 ശതമാനവുമാണ് ആകെ വിജയശതമാനം. കൗണ്‍സിലിന്റെ ഔദ്യോഗിക വെബ്‌സൈറ്റായ cisce.org വഴിയും ഡിജിലോക്കര്‍, എസ്എംഎസ് സംവിധാനങ്ങള്‍ വഴിയും ഫലം ലഭ്യമാണ്.

കേരളത്തില്‍ 166 സ്‌കൂളുകളില്‍ നിന്നായി 7,861 വിദ്യാര്‍ഥികളാണ് പത്താം ക്ലാസ് പരീക്ഷ എഴുതിയത്. ഇതില്‍ 7,858 പേര്‍ വിജയിച്ചപ്പോള്‍ മൂന്ന് പേര്‍ മാത്രമാണ് പരാജയപ്പെട്ടത്. പന്ത്രണ്ടാം ക്ലാസില്‍ 85 സ്‌കൂളുകളില്‍ നിന്നായി പരീക്ഷയെഴുതിയ 3,058 വിദ്യാര്‍ഥികളില്‍ ഒരാള്‍ ഒഴികെ മറ്റെല്ലാവരും (3,057 പേര്‍) ഉപരിപഠനത്തിന് യോഗ്യത നേടി. പരീക്ഷയെഴുതിയ വിദ്യാര്‍ഥികളില്‍ ആണ്‍കുട്ടികളെക്കാള്‍ നേരിയ മുന്നേറ്റം പെണ്‍കുട്ടികള്‍ കാഴ്ചവെച്ചു.

പത്താം ക്ലാസ് പരീക്ഷയില്‍ പെണ്‍കുട്ടികളുടെ വിജയശതമാനം 99.98-ഉം ആണ്‍കുട്ടികളുടേത് 99.95-ഉമാണ്. പന്ത്രണ്ടാം ക്ലാസ് പരീക്ഷയില്‍ കേരളത്തിലെ മുഴുവന്‍ പെണ്‍കുട്ടികളും വിജയിച്ചു എന്ന പ്രത്യേകതയുമുണ്ട്. ആണ്‍കുട്ടികളുടെ വിജയശതമാനം 99.94 ആണ്. റെക്കോഡ് വിജയത്തിന്റെ തിളക്കത്തില്‍ വിദ്യാര്‍ഥികളും അധ്യാപകരും ആവേശത്തിലാണ്.