ന്യൂയോര്ക്ക്: ആണവായുധ വ്യാപന നിരോധന കരാര് ലോകരാഷ്ട്രങ്ങള് പൂര്ണ്ണമായി നടപ്പിലാക്കണമെന്ന് സൗദി അറേബ്യ. ന്യൂയോര്ക്കില് നടന്ന 11-ാമത് എന്.പി.ടി അവലോകന സമ്മേളനത്തിലും യുഎന് ചര്ച്ചകളിലും സംസാരിക്കവെ സൗദി സ്ഥിരം പ്രതിനിധി ഡോ. അബ്ദുല് അസീസ് അല് വാസലാണ് രാജ്യത്തിന്റെ നിലപാടുകള് വ്യക്തമാക്കിയത്. ആണവ സുരക്ഷയ്ക്കൊപ്പം ഗസ്സയിലെ അടിയന്തര വെടിനിര്ത്തലും സ്വതന്ത്ര ഫലസ്തീന് രാഷ്ട്ര രൂപീകരണവും അനിവാര്യമാണെന്ന് സൗദി ആവര്ത്തിച്ചു.
ആഗോള ആണവ വ്യാപന നിരോധന സംവിധാനത്തിന്റെ അടിസ്ഥാന ശിലയാണ് എന്.പി.ടി കരാറെന്ന് ഡോ. അല് വാസല് ചൂണ്ടിക്കാട്ടി. നിരായുധീകരണം, സമാധാനപരമായ ആണവോര്ജ്ജ ഉപയോഗം എന്നിവയില് തുല്യമായ ഊന്നല് നല്കണം. ആണവായുധങ്ങള് പൂര്ണ്ണമായും ഇല്ലാതാക്കുക എന്നത് മാത്രമാണ് അവ ഉയര്ത്തുന്ന ഭീഷണിയില് നിന്നുള്ള ഏക മോചനം. ഐഎഇഎ മാനദണ്ഡങ്ങള് പാലിച്ച് സമാധാനപരമായ ആവശ്യങ്ങള്ക്കായി ആണവോര്ജ്ജം വികസിപ്പിക്കാന് അംഗരാജ്യങ്ങള്ക്ക് അവകാശമുണ്ടെന്നും അദ്ദേഹം പറഞ്ഞു.
ഇറാന് തങ്ങളുടെ ആണവ പദ്ധതികളുടെ സുതാര്യത ഉറപ്പാക്കാന് ഐഎഇഎയുമായി പൂര്ണ്ണമായി സഹകരിക്കണമെന്ന് സൗദി ആവശ്യപ്പെട്ടു. മധ്യേഷ്യയെ ആണവായുധ വിമുക്ത മേഖലയാക്കി മാറ്റുന്നതിന് ഇസ്രായേല് കരാറില് ഒപ്പുവെക്കാത്തത് വലിയ തടസ്സമാണെന്നും സൗദി പ്രതിനിധി കുറ്റപ്പെടുത്തി.
ഗസ്സയിലും ലബനനിലും തുടരുന്ന ഇസ്രായേല് ആക്രമണങ്ങളെ സൗദി അറേബ്യ ശക്തമായ ഭാഷയില് അപലപിച്ചു. മേഖലയിലെ സംഘര്ഷം കൂടുതല് വഷളാകുന്നത് തടയാന് അന്താരാഷ്ട്ര സമൂഹം ഇടപെടണം. സൗദി മുന്നോട്ടുവെച്ച പ്രധാന ആവശ്യങ്ങള് ഇവയാണ്: ഗസ്സയില് ഉടനടി വെടിനിര്ത്തല് നടപ്പിലാക്കുക. ഇസ്രായേല് സൈന്യം ഗസ്സയില് നിന്ന് പൂര്ണ്ണമായി പിന്മാറുകയും നിര്ബന്ധിത കുടിയൊഴിപ്പിക്കല് അവസാനിപ്പിക്കുകയും ചെയ്യുക.
1967-ലെ അതിര്ത്തികള് അടിസ്ഥാനമാക്കി സ്വതന്ത്ര ഫലസ്തീന് രാഷ്ട്രം യാഥാര്ത്ഥ്യമാക്കുക. ജെറുസലേമിന്റെ ചരിത്രപരവും നിയമപരവുമായ പദവി മാറ്റാനുള്ള നീക്കങ്ങളില് നിന്ന് പിന്തിരിയുക.
അന്താരാഷ്ട്ര നിയമങ്ങള് ലംഘിച്ചുള്ള ഇസ്രായേലിന്റെ അനധികൃത കുടിയേറ്റ പ്രവര്ത്തനങ്ങള് സമാധാന ശ്രമങ്ങളെ അട്ടിമറിക്കുന്നതാണെന്നും സൗദി അറേബ്യ ചൂണ്ടിക്കാട്ടി.
.jpg)
Related News
