തിരുവനന്തപുരം: കേരള രാഷ്ട്രീയത്തില്‍ പുതിയ യുഗപ്പിറവി കുറിച്ചുകൊണ്ട് നിയമസഭാ തിരഞ്ഞെടുപ്പില്‍ മൂന്ന് സീറ്റുകളില്‍ ബി.ജെ.പി ഉജ്ജ്വല വിജയം നേടി. തലസ്ഥാനത്തെ നിര്‍ണ്ണായക മണ്ഡലങ്ങളായ നേമവും കഴക്കൂട്ടവും പിടിച്ചെടുത്ത ബി.ജെ.പി, കൊല്ലം ജില്ലയിലെ ചാത്തന്നൂരിലും അട്ടിമറി വിജയം കരസ്ഥമാക്കി. ഇതാദ്യമായാണ് കേരള നിയമസഭയില്‍ ബി.ജെ.പിക്ക് മൂന്ന് അംഗങ്ങള്‍ ഉണ്ടാകുന്നത്.

കേരളം ഉറ്റുനോക്കിയ നേമത്ത് മന്ത്രി വി. ശിവന്‍കുട്ടിയെ അട്ടിമറിച്ചാണ് ബി.ജെ.പി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ വിജയക്കൊടി പാറിച്ചത്. 4165 വോട്ടുകളുടെ ഭൂരിപക്ഷത്തിനാണ് രാജീവ് ചന്ദ്രശേഖര്‍ നിയമസഭയിലെത്തുന്നത്. 2021-ല്‍ നഷ്ടപ്പെട്ട ബി.ജെ.പിയുടെ ഏക സിറ്റിംഗ് സീറ്റ് ഇതോടെ പാര്‍ട്ടി തിരിച്ചുപിടിച്ചു. ലോക്സഭാ തിരഞ്ഞെടുപ്പിലെ മികച്ച പ്രകടനവും ബി.ജെ.പിയുടെ ശക്തമായ അടിത്തറയും രാജീവ് ചന്ദ്രശേഖറിന് തുണയായി.

തീപാറുന്ന പോരാട്ടം നടന്ന കഴക്കൂട്ടം മണ്ഡലത്തില്‍ മുന്‍ കേന്ദ്രമന്ത്രി വി. മുരളീധരന്‍ ബി.ജെ.പിക്ക് വേണ്ടി വിജയം കൊയ്തു. എല്‍.ഡി.എഫ് സ്ഥാനാര്‍ഥിയും മുന്‍ മന്ത്രിയുമായ കടകംപള്ളി സുരേന്ദ്രനെ 428 വോട്ടുകള്‍ക്കാണ് മുരളീധരന്‍ പരാജയപ്പെടുത്തിയത്. അവസാന റൗണ്ടുകളില്‍ കൈപ്പിടിയിലൊതുക്കിയ 46,564 വോട്ടുകളോടെ മുരളീധരന്‍ കഴക്കൂട്ടത്തിന്റെ അമരത്തെത്തി.

കൊല്ലം ജില്ലയിലെ ചാത്തന്നൂര്‍ മണ്ഡലത്തില്‍ ബി.ബി. ഗോപകുമാറിലൂടെ ബി.ജെ.പി ചരിത്രപരമായ മുന്നേറ്റം നടത്തി. നാലായിരത്തിലേറെ വോട്ടുകള്‍ക്കാണ് എന്‍.ഡി.എ സ്ഥാനാര്‍ഥിയായ ഗോപകുമാര്‍ വിജയിച്ചത്. സി.പി.ഐയുടെ കുത്തക മണ്ഡലമായിരുന്ന ചാത്തന്നൂരില്‍ താമര വിരിഞ്ഞത് രാഷ്ട്രീയ നിരീക്ഷകരെപ്പോലും അത്ഭുതപ്പെടുത്തിയിരിക്കുകയാണ്.