ജിദ്ദ- സൗദി ടൂറിസം അതോറിറ്റിയുമായി സഹകരിച്ച് ആഭ്യന്തര എയര്‍പോര്‍ട്ടുകളില്‍നിന്നും ജി.സി.സി രാജ്യങ്ങളില്‍നിന്നും റെഡ് സീ, അല്‍-ഉല എന്നിവിടങ്ങളിലേക്ക് യാത്ര ചെയ്യുന്നവര്‍ക്കായി സൗദി എയര്‍ലൈന്‍സ് 10 ശതമാനം ഡിസ്‌കൗണ്ട് പ്രഖ്യാപിച്ചു. മെയ് 13 മുതല്‍ ജൂണ്‍ 20 വരെയുള്ള യാത്രകള്‍ക്കാണ് ഈ ആനുകൂല്യം ലഭിക്കുക. വിനോദസഞ്ചാര മേഖലയെ പ്രോത്സാഹിപ്പിക്കുന്നതിന്റെ ഭാഗമായാണ് ഈ പുതിയ പ്രൊമോഷണല്‍ ഓഫര്‍ അവതരിപ്പിച്ചിരിക്കുന്നത്.

സൗദി എയര്‍ലൈന്‍സിന്റെ വെബ്‌സൈറ്റ് വഴിയോ സ്മാര്‍ട്ട്‌ഫോണ്‍ ആപ്ലിക്കേഷന്‍ വഴിയോ ടിക്കറ്റ് ബുക്ക് ചെയ്യുന്നവര്‍ക്ക് EID10 എന്ന പ്രൊമോ കോഡ് ഉപയോഗിച്ച് ഈ ഇളവ് സ്വന്തമാക്കാം. മെയ് 13 വരെയാണ് ടിക്കറ്റുകള്‍ ബുക്ക് ചെയ്യാനുള്ള കാലാവധി. നിലവില്‍ റിയാദില്‍നിന്ന് ചുവന്ന കടല്‍ തീരത്തേക്ക് ദിവസേന ഒരു സര്‍വീസും വാരാന്ത്യങ്ങളില്‍ രണ്ട് സര്‍വീസുകളും സൗദി എയര്‍ലൈന്‍സ് നടത്തുന്നുണ്ട്. കൂടാതെ ജിദ്ദയില്‍നിന്ന് ആഴ്ചയില്‍ നാല് സര്‍വീസുകളും അല്‍-ഉലയിലേക്ക് റിയാദ്, ജിദ്ദ എന്നിവിടങ്ങളില്‍നിന്ന് നിശ്ചിത സര്‍വീസുകളും ലഭ്യമാണ്.

യാത്രക്കാരുടെ അനുഭവം മെച്ചപ്പെടുത്തുന്നതിനായി ആര്‍ട്ടിഫിഷ്യല്‍ ഇന്റലിജന്‍സ് സാങ്കേതികവിദ്യ ഉപയോഗിച്ചുള്ള ഡിജിറ്റല്‍ സേവനങ്ങളും വിമാനത്തിനുള്ളില്‍ അതിവേഗ ഇന്റര്‍നെറ്റ് സൗകര്യവും എയര്‍ലൈന്‍സ് ഉറപ്പാക്കുന്നുണ്ട്. അത്യാധുനിക വിനോദ സംവിധാനങ്ങളും പരിഷ്‌കരിച്ച സീറ്റുകളും ഉള്‍പ്പെടെയുള്ള ആധുനികവല്‍ക്കരണ പദ്ധതികള്‍ വിമാനങ്ങളില്‍ നടപ്പിലാക്കി വരികയാണ്. സൗദി അറേബ്യയുടെ സാംസ്‌കാരിക പൈതൃകവും ആധുനിക വിനോദസഞ്ചാര കേന്ദ്രങ്ങളും സന്ദര്‍ശിക്കാന്‍ ആഗ്രഹിക്കുന്നവര്‍ക്ക് ഓഫര്‍ മികച്ച അവസരമൊരുക്കുന്നു.