ജിദ്ദ: കേരള നിയമസഭാ തിരഞ്ഞെടുപ്പില്‍ യു.ഡി.എഫ് നേടിയ ഉജ്ജ്വല വിജയത്തിന്റെ ആവേശത്തില്‍ പ്രവാസലോകം. ജിദ്ദയിലെ മലയാളി സംഗമകേന്ദ്രമായ ഷറഫിയ്യയില്‍ ഒ.ഐ.സി.സി വെസ്റ്റേണ്‍ റീജിയണല്‍ കമ്മിറ്റിയുടെ നേതൃത്വത്തില്‍ പായസ വിതരണവും വിജയയാഘോഷവും സംഘടിപ്പിച്ചു. നൂറുകണക്കിന് ഒ.ഐ.സി.സി, കെ.എം.സി.സി പ്രവര്‍ത്തകരും യു.ഡി.എഫ് നേതാക്കളും ആഘോഷപരിപാടികളില്‍ പങ്കെടുത്തു.

അഴിമതിയും ധാര്‍ഷ്ട്യവും അലങ്കാരമാക്കിയ പിണറായി സര്‍ക്കാരിന്റെ പത്ത് വര്‍ഷത്തെ ദുര്‍ഭരണത്തിനെതിരെയുള്ള ശക്തമായ ജനവികാരമാണ് ഈ വിജയത്തിന് പിന്നിലെന്ന് ഒ.ഐ.സി.സി വെസ്റ്റേണ്‍ റീജിയണല്‍ കമ്മിറ്റി പ്രസിഡന്റ് ഹക്കീം പാറക്കല്‍ പറഞ്ഞു. ഭാവി കേരളത്തിന്റെ സമഗ്ര പുരോഗതി ലക്ഷ്യമിട്ട് യു.ഡി.എഫ് മുന്നോട്ടുവെച്ച നൂതനമായ ആശയങ്ങളും 'ഇന്ദിര ഗ്യാരണ്ടി' ഉള്‍പ്പെടെയുള്ള ജനപക്ഷ പദ്ധതികളും വോട്ടര്‍മാര്‍ നെഞ്ചേറ്റിയതാണ് ചരിത്ര വിജയത്തിന് കാരണമായതെന്നും അദ്ദേഹം കൂട്ടിച്ചേര്‍ത്തു. യു.ഡി.എഫിന്റെ കെട്ടുറപ്പുള്ള പ്രവര്‍ത്തനങ്ങളും മികച്ച സ്ഥാനാര്‍ത്ഥി നിര്‍ണ്ണയവും വിജയത്തിന്റെ മാറ്റുകൂട്ടി.

ചടങ്ങില്‍ കെ.എം.സി.സി ആക്ടിംഗ് പ്രസിഡന്റ് റസാഖ് മാസ്റ്റര്‍ ആശംസകള്‍ നേര്‍ന്നു. ഷറഫിയ്യയില്‍ തടിച്ചുകൂടിയ പ്രവര്‍ത്തകര്‍ മുദ്രാവാക്യങ്ങള്‍ വിളിച്ചും മധുരം പങ്കുവെച്ചും കേരളത്തിലെ ഭരണമാറ്റത്തെ ആവേശത്തോടെയാണ് വരവേറ്റത്.