മനാമ: ബഹ്റൈന് മലയാളി ബിസിനസ് ഫോറത്തിന്റെ (ബി.എം.ബി.എഫ്.) 26ാം വാര്ഷികാഘോഷവും, കൂട്ടായ്മയുടെ ജീവകാരുണ്യ പദ്ധതിയായ 'ഹെല്പ്പ് & ഡ്രിങ്ക്' 12-ാം സീസണ് വാര്ഷിക സര്ട്ടിഫിക്കറ്റ് വിതരണവും ഉമ്മുല് ഹസ്സം കിംസ് ഹെല്ത്ത് ഓഡിറ്റോറിയത്തില് നടന്നു. ചടങ്ങില് ജീവകാരുണ്യ പ്രവര്ത്തനങ്ങളില് പങ്കാളികളായ വോളണ്ടിയര്മാര്ക്കും സ്ഥാപനങ്ങള്ക്കും പ്രശംസാപത്രങ്ങള് നല്കി ആദരിച്ചു.
ബഹ്റൈന് മലയാളി ബിസിനസ് ഫോറം ചെയര്മാനും ജനറല് സെക്രട്ടറിയുമായ ബഷീര് അമ്പലായി അധ്യക്ഷത വഹിച്ചു. പ്രവാസി ഭാരതീയ സമ്മാന് ജേതാവും മുതിര്ന്ന പ്രവാസിയുമായ സോമന് ബേബി, ബഹ്റൈന് ഡെയ്ലി ട്രിബ്യൂണ് ചെയര്മാന് പി. ഉണ്ണികൃഷ്ണന്, മുന് പ്രവാസി കമ്മീഷന് അംഗം സുബൈര് കണ്ണൂര്, ന്യൂ ഇന്ത്യന് സ്കൂള് പ്രിന്സിപ്പല് ഡോ. ഗോപിനാഥ് മേനോന്, കാത്തു സച്ചിദേവ്, വേള്ഡ് മലയാളി കൗണ്സില് വള്ളുവനാട് പ്രൊവിന്സ് ജനറല് സെക്രട്ടറി ചന്ദ്രപ്രകാശ് ഇടമന, ഇന്ത്യന് സ്കൂള് ഭരണസമിതി അംഗം നജീബ് കടലായി, ബിജു ജോര്ജ്, കെ.എം.സി.സി. ഭാരവാഹി ഒ.കെ. കാസിം, ഫോര് പി.എം. ന്യൂസ് ഡയറക്ടര് പ്രദീപ് പുറവങ്കര, അല് റാഷിദ് പൂള് ഗ്രൂപ്പ് ചെയര്മാനും ബി.എം.ബി.എഫ്. രക്ഷാധികാരിയുമായ അനീഷ് കെ.വി., പ്രോഗ്രാം കോര്ഡിനേറ്റര് പി.കെ. വേണുഗോപാല് എന്നിവര് വിശിഷ്ടാതിഥികളായി പങ്കെടുത്ത് സംസാരിച്ചു.
ബഹ്റൈനിലെ സാമൂഹിക-സാംസ്കാരിക രംഗത്തെ പ്രമുഖരുടെ സാന്നിധ്യത്തിലായിരുന്നു ആദരിക്കല് ചടങ്ങ്. കിംസ് ഹെല്ത്തിന്റെ സഹകരണത്തോടെ ബി.എം.ബി.എഫ്. അംഗങ്ങള് അവതരിപ്പിച്ച നൃത്തനൃത്യങ്ങളും ഗാനമേളയും ചടങ്ങിന് മാറ്റുകൂട്ടി. ഹെല്പ്പ് & ഡ്രിങ്ക് കണ്വീനര് കാസിം പാടത്തകായില് നന്ദി രേഖപ്പെടുത്തി.