ലണ്ടന്: പ്രകൃതിഭംഗിയും ചരിത്രപൈതൃകവും സാംസ്കാരിക വൈവിധ്യവും പരിസ്ഥിതി സംരക്ഷണവും ഒത്തുചേരുന്ന 20 വിനോദസഞ്ചാര കേന്ദ്രങ്ങളെ 2026ലെ യാത്രകള്ക്കായി തിരഞ്ഞെടുത്ത് ബി.ബി.സി. ട്രാവല് പട്ടിക പുറത്തിറക്കി. ബി.ബി.സി.യുടെ മാധ്യമപ്രവര്ത്തകരും വിവിധ രാജ്യങ്ങളിലെ യാത്രാ വിദഗ്ധരും സുസ്ഥിര വിനോദസഞ്ചാര രംഗത്തെ പ്രമുഖരുമാണ് പട്ടിക തയ്യാറാക്കിയത്. പ്രാദേശിക ജനവിഭാഗങ്ങള്ക്ക് സാമ്പത്തിക നേട്ടമുണ്ടാക്കുകയും പ്രകൃതിയും സാംസ്കാരിക പൈതൃകവും സംരക്ഷിക്കുകയും ചെയ്യുന്ന സ്ഥലങ്ങള്ക്കാണ് മുന്ഗണന. പട്ടികയിലെ ആദ്യത്തെ പേര് അബുദാബിയുടേതാണ്.
യുഎഇയിലെ അബുദാബിയാണ് പട്ടികയിലെ ശ്രദ്ധേയ കേന്ദ്രങ്ങളിലൊന്ന്. സായിദ് നാഷണല് മ്യൂസിയം, നാച്വറല് ഹിസ്റ്ററി മ്യൂസിയം, ടീംലാബ് ഫിനോമിന തുടങ്ങിയ സാംസ്കാരിക ആകര്ഷണങ്ങളാണ് നഗരത്തെ ശ്രദ്ധേയമാക്കുന്നത്. അള്ജീരിയയിലെ പുരാതന റോമന് നഗരാവശിഷ്ടങ്ങളും സഹാറ മരുഭൂമിയും ചരിത്രസഞ്ചാരികളെ ആകര്ഷിക്കുന്നു.
ചിലിയിലെ കൊല്ചാഗ്വ താഴ്വര മുന്തിരിത്തോട്ടങ്ങള്ക്കും വൈന് ടൂറിസത്തിനും പേരുകേട്ടതാണ്. കുക്ക് ദ്വീപുകളിലെ നീലക്കടലും പവിഴപ്പുറ്റുകളും പോളിനേഷ്യന് സംസ്കാരവും മറ്റൊരു ആകര്ഷണം. പരിസ്ഥിതി സംരക്ഷണത്തിനും ജൈവവൈവിധ്യത്തിനും പ്രാധാന്യം നല്കുന്ന കോസ്റ്റാറിക്കയും പട്ടികയിലുണ്ട്.
സ്കോട്ട്ലന്ഡിലെ ഹെബ്രിഡീസ് ദ്വീപുകള് പുരാതന ശിലാവൃത്തങ്ങള്ക്കും കടല്ത്തീരങ്ങള്ക്കും വിസ്കി പാരമ്പര്യത്തിനും പേരുകേട്ടതാണ്. ജപ്പാനിലെ ഇഷികാവയില് ഭൂകമ്പത്തിനുശേഷം പുനര്നിര്മാണം നടത്തുന്ന പ്രദേശങ്ങളിലെ കുടുംബങ്ങള്ക്കും കരകൗശല തൊഴിലാളികള്ക്കും പിന്തുണ നല്കുന്ന വിനോദസഞ്ചാരത്തിനാണ് പ്രാധാന്യം.
ഇന്തോനേഷ്യയിലെ കൊമോഡോ ദ്വീപുകള് അപൂര്വ കൊമോഡോ ഡ്രാഗണുകള്ക്കും സമുദ്രജൈവവൈവിധ്യത്തിനും പ്രസിദ്ധമാണ്. മെക്സിക്കോയിലെ ലൊറേറ്റോ തിമിംഗലങ്ങളുടെയും കടലാമകളുടെയും ആവാസകേന്ദ്രമാണ്. മോണ്ടെനെഗ്രോയിലെ കോട്ടോര് ഉള്ക്കടലും മലനിരകളിലെ ഹൈക്കിങ് പാതകളും സഞ്ചാരികളെ ആകര്ഷിക്കുന്നു.
അമേരിക്കയിലെ ഒറിഗണ് തീരം, ഫിന്ലന്ഡിലെ ഔലു, ഫിലഡല്ഫിയ, കംബോഡിയയിലെ ഫ്നോംപെന്, പോര്ച്ചുഗലിലെ ഗ്വിമറായസ്, കെനിയയിലെ സാംബുരു, ഡൊമിനിക്കന് റിപ്പബ്ലിക്കിലെ സാന്റോ ഡൊമിംഗോ, കാനഡയിലെ സ്ലോകാന് താഴ്വര, ഓസ്ട്രേലിയയിലെ ഉലുരു, ഉറുഗ്വേ എന്നിവയും പട്ടികയില് ഉള്പ്പെടുന്നു.
2026ല് പ്രത്യേക പ്രാധാന്യമുള്ള നിരവധി പരിപാടികളും ഇവിടങ്ങളിലുണ്ട്. അമേരിക്കയുടെ 250ാം വാര്ഷികാഘോഷം ഫിലഡല്ഫിയയുടെ ആകര്ഷണമാണ്. ഫിന്ലന്ഡിലെ ഔലു യൂറോപ്യന് സാംസ്കാരിക തലസ്ഥാനമായും പോര്ച്ചുഗലിലെ ഗ്വിമറായസ് യൂറോപ്യന് ഹരിത തലസ്ഥാനമായും ശ്രദ്ധ നേടുന്നു. ഓസ്ട്രേലിയയിലെ ഉലുരുവില് തദ്ദേശീയരായ അനാംഗു ജനതയുടെ നേതൃത്വത്തില് പുതിയ അഞ്ചുദിവസത്തെ യാത്രാപാതയും ഒരുക്കുന്നുണ്ട്.
വിനോദസഞ്ചാരം വെറും കാഴ്ചകള് കാണാനുള്ള യാത്രയല്ലെന്നും പ്രാദേശിക സമൂഹങ്ങളുടെ ജീവിതത്തിനും പ്രകൃതിസംരക്ഷണത്തിനും സംഭാവന നല്കുന്ന അനുഭവമാകണമെന്നും പട്ടിക ഓര്മിപ്പിക്കുന്നു.